ઉધારી પર ચાલુ કરેલા ધંધાને આગળ વધારી કર્યું ટર્નઓવર 450 કરોડથી વધુનું, જાણો સફળતા સ્ટોરી ગોપાલ નમકીનના માલિકની

0

બધા જ લોકોના સપના હોય છે કે જીવનમાં જે ધંધામાં હાથ અજમાવે એ ધંધામાં ટોચ પર પહોંચે, પરંતુ બધા જ સફળતાની એ ઊંચાઈ સુધી પહોંચી શકતા નથી. સફળતાના શિખર આંબવા એ કોઈ જેવા તેવાની વાત તો નથી, એના માટે લોઢાના ચણા ચાવવા જેટલી તાકાત, સાહસિક સ્વભાવ, ભરપૂર આત્મવિશ્વાસ અને દૃઢ નિર્ણય શક્તિની જરૂર પડતી હોય છે.

જયારે પણ આપણે કોઈ પણ વ્યક્તિની સફળતાની વાતો સાંભળીએ ત્યારે જ આપણને સમજાય છે કે તેમણે સફળ થવા માટે કેટલી મહેનત કરી હશે, એ પછી જ તેઓ આ મુકામ સુધી પહોંચ્યા હશે. આવી જ સંઘર્ષ ગાથા છે ગોપાલ નમકીનના માલિકની.

Image Source

ગુજરાતના ઘર-ઘરમાં આજે ગોપાલ નમકીન ખવાય છે. નાનાથી માંડીને મોટા સુધીના દરેક વ્યક્તિને ગોપાલના નમકીન પસંદ આવે છે. ગોપાલના ગાંઠિયા, ચણાની દાળ, સેવ, સિંગ, તીખા-મોરા સેવ-મમરા અને ઘણી બધી બીજી ફરસાણની વાનગીઓ લોકપ્રિય છે. ત્યારે આજે વાત કરીએ ઘર-ઘરમાં પ્રખ્યાત એવા ગોપાલના મમરા, ફ્રાઈમ્સ, ચવાણાં અને તીખા ગાંઠિયા જેવા નાસ્તા બનાવવાની શરૂઆત કરનાર બિપીનભાઈ હદવાણીની. તો ચાલો જાણીએ એમને કેમ અને કેવી રીતે ગોપાલ નમકીનનો બિઝનેસ કરવાનું વિચાર્યું –

Image Source

મૂળ જામકંડોરણા તાલુકાનાં ભાદરા ગામના બિપીનભાઈ નાના એવા ગામડામાં ફરસાણની દૂકન ચલાવતા હતા. એ પણ પોતાના ભાઈઓ અને પિતા સાથે. પરિવાર મોટો અને નાનો ધંધો, તેમનો ધંધો નાના એવા ગામડામાં જ હોવાથી નહી નફો કે નહી નુકસાન એવી પરિસ્થિતિ સર્જાતી હતી. ગામડામાં ગ્રાહકો ઓછા હોવાથી, ધંધાને મોટો કરવા માટે થઈને તેઓએ રાજકોટ જેવા મોટા શહેરમાં જઈને ધંધો કરવાનું વિચાર્યું. વર્ષ 1990માં તેઓ રાજકોટ સ્થાયી થયા. પહેલેથી ફરસાણ બનાવવાના શોખીન અને અનુભવી હોવાથી અને બધા કુટુંબીઓ પણ આ જ વ્યવસાય સાથે સંકળાયેલા હોવાથી બધા જ પિતરાઇ ભાઈઓએ મળીને ‘ગણેશ’ બ્રાન્ડ નામે ફરસાણની કંપનીની શરૂઆત કરી.

Image Source

એ સમયે પૈસાની વધારે સગવડ તો હતી નહી એટ્લે બિપીનભાઈએ આ ધંધામાં માત્ર રૂપિયા 8500નું જ રોકાણ કરી શક્યા. અહીં પણ તેમનો ધંધો ચાલવા લાગ્યો. પહેલા ગામડાની દુકાને જે ફરસાણ બનાવી છૂટક કે પસ્તીમાં વીંટાળી આપતા હતા, એ જ ફરસાણને ગણેશ બ્રાંડના પેકિંગમાં લોકો સુધી પહોંચાડતા હતા. તેઓ ગણેશ બ્રાંડ અંતર્ગત બધુ જ ફરસાણ બનાવતા અને બધું જ ફરસાણ પેકીંગમાં દુકાનો સુધી પહોંચાડતા હતા.

Image Source

હવે ગામડેથી આવેલ બિપીનભાઈ માટે રંગીલું રાજકોટ લક્કી સાબિત થયું. એમનો એ ધંધો બધાની મહેનતથી ખૂબ જામી ગયો. એટ્લે એમને ભવિષ્યનું વિચારીને આ ધંધામાંથી પાર્ટનરશીપ છૂટી કરી અને પોતાનું કરવાનું વિચાર્યું. પણ પોતાનો ધંધો કરવા માટે તો નાણાં અને માણસો બંનેની જરૂર તો પડે જ. બિપિનભાઈ પાસે તો એટલા બધા પૈસા ન હતા કે એ રોકાણ કરી શકે કે કામ કરવા માટે માણસોને રાખી શકે. ત્યારે એમના પત્ની દક્ષાબેને 1994માં હિંમત આપી અને એમના બહેન-બનેવીએ સાથ આપ્યો.

વગર પૈસે એમના પરિવારની હિંમત અને સાથ મળ્યો એટલે બિપીનભાઈએ પોતાના જ ઘરમાં પરિવારજનોના સાથથી માત્ર 12000 રૂપિયાની થોડી વસ્તુઓ ઉધારીથી લાવીને જાત મહેનતે એક ‘ગોપાલ’ બ્રાન્ડ નામે ફરસાણ બનાવીને વેચવાની કંપની સ્થાપી.

Image Source

ન કોઈ મજૂર કે ન કોઈ ફેક્ટરી. પોતાના જ ઘરમાં અને પોતાની જ મહેનતે આ કંપનીને આગળ વધારવા માટેના પ્રયાસો શરૂ કરી, રોજ સવારે નાસ્તાના બનાવેલા પેકેટનું જાતે માર્કેટિંગ કરતાં અને પછી ઘરે આવીને એમના પરિવારજનોની મદદ લઈને ફરસાણ બનાવવામાં લાગી જતા. ફરસાણ બનાવવું, પેકિંગ કરવું અને પછી ફેરિયાઓ અને નાની નાની દુકાનો સુધી અને ગામડાઓ સુધી એ પોતે જ માલ પહોંચાડતા.

બિપીનભાઈની અથાગ મહેનત અને પરિવારનો સતત સાથ મળવાથી સોનામાં સુગંધ ભળતી હોય એવું લાગ્યું. તેઓ દિવસેને દિવસે મહેનત વધારવા લાગ્યા. જેટલા પેકેટો આપીને આવતા કે જેટલો ઓર્ડર મળતો તેનાથી ડબલ પ્રોડક્ટ બનાવી પેકિંગ કરવા લાગ્યા. અહીં તેમનો આત્મવિશ્વાસ સ્પષ્ટ દેખાઈ આવે છે.

Image Source

કહેવત છે ને કર્મ કર્યે જાવ એનું ફળ આપોઆપ જ મળશે. બિપીનભાઈનું પણ આવું જ હતું, એ પોતે કામ કરતાં ગયા અને મહેનત કરતાં ગયા. એમને સ્વપ્ને પણ નહોતું વિચાર્યું કે માત્ર બે જ વર્ષમાં નાની એવી ગોપાલ બ્રાન્ડ જે ઘરમાં ચાલતી હતી એ મોટી ફેક્ટરી બની જશે.

માત્ર બે જ વર્ષના સમયગાળા દરમ્યાન તેમણે હરિપરમાં કારખાનું શરૂ કર્યું અને ત્યારથી પ્રગતિ તેમની પ્રગતિ ચાર ગણી વધી ગઈ. ત્યારથી લઈને આજ સુધીમાં એટલે કે માત્ર 22 જ વર્ષમાં ગોપાલ બ્રાન્ડનું ટર્નઓવર રૂ. 450 કરોડ પર પહોંચાડ્યું છે.

Image Source

બિપીનભાઈની લગન અને સખત મહેનત ઉપરાંત પરિવારના સાથે આજે તેમણે ક્યાથી ક્યાં પહોંચાડ્યા. એટલે તમારા ઘરમાં પણ જો કોઈ શૂન્યમાંથી સર્જન કરવા જઈ રહ્યું છે તો એમાં સકારાત્મક સાથ આપો. એ સાથ જ પૂરતો છે એના જીવનમાં પ્રગતિના દ્વાર ખોલવા માટે.

Author: GujjuRocks Team
તમે આ લેખ GujjuRocks ના માધ્યમથી વાંચી રહ્યા છો, અમારો આ લેખ વાચવા બદલ આપનો આભાર. જો તમને આ લેખ ગમ્યો હોય તો શેર કરી વધુમાં વધુ લોકો સુધી પહોંચાડો અને તમારા પ્રતિભાવો કોમેન્ટમાં જણાવો.

આવી જ રીતે રોજિંદા જીવનમાં ઉપયોગી હોય એવી લાગણીસભર વાર્તાઓ, સ્વાસ્થ્યવર્ધક માહિતી, બોલીવુડની ખબરો, ધાર્મિક વાતો, રેસિપી તથા અન્ય રસપ્રદ માહિતીઓ મેળવવા માટે ગુજરાતીઓનું લોકપ્રિય ફેસબુક પેજ “GujjuRocks” લાઈક કરી જોડાઓ તથા હવે અમારા દરેક જોક્સ-સુવિચાર સીધા તમારા મોબાઈલમાં મેળવવા માટે અમારી મોબાઈલ એપ અહીં ક્લિક કરીને ડાઉનલોડ કરો >> GujjuRocks

લેખ ગમ્યો હોય તો લાઈક કરી મિત્રો સાથે શેયર કરજો.

LEAVE A REPLY

Please enter your comment!
Please enter your name here