ખબર

IIM અમદાવાદમાં કોરોના વિસ્ફોટ : સતત વધી રહ્યા છે કોરોનાના કેસ, તંત્ર ચિંતામાં

અમદાવાદ IIMમાં વધુ 16 લોકો કોરોના સંક્રમિત થયા છે. છેલ્લા 18 દિવસમાં IIMમાં 70 લોકો કોરોનાની ઝપેટમાં આવ્યા છે. 12 માર્ચના નરેંદ્ર મોદી સ્ટેડિયમમાં મેચ જોવા ગયેલા પાંચ વિદ્યાર્થીઓએ પોતે સંક્રમિત હોવાની માહિતી છુપાવ્યા બાદ IIMમાં સતત કોરોના વાયરસના કેસ વધી રહ્યા છે.

IIMમાં અત્યાર સુધીમાં કુલ 191 પોઝિટિવ કેસ નોંધાયા છે. જેમાં આઈઆઈએમ-એના વિદ્યાર્થીઓ, પ્રોફેસરો અને કર્મચારીઓનો પણ સમાવેશ થાય છે. 86 વિદ્યાર્થી, 4 ફેકલ્ટી, 60 સ્ટાફ સભ્યોને કોરોના થયો છે. તો અન્ય 41 લોકો પણ કોરોનાની ઝપેટમાં આવ્યા છે.

પ્રતિકાત્મક તસવીર

હોળી અને ધૂળેટી પર્વના બે દિવસમાં કેમ્પસમાં વધુ 116 ટેસ્ટ કરાતા આ પૈકી ૧૬ લોકો કોરોના પોઝિટિવ આવતા કેમ્પસમાં કોરોના સંક્રમિતોની સંખ્યા 100 ઉપર પહોંચવા પામી છે.જ્યારે જીટીયુમાં 20થી વધુ કોરોનાના કેસ નોંધાયા છે.

ઇન્સ્ટિટ્યૂટના ડેશ બોર્ડની વિગતો મુજબ, કોરોનાના કેસો વધતાં ગત 1 સપ્ટેમ્બર 2020થી IIM દ્વારા કોરોનાના ટેસ્ટ શરૂ કરવામાં આવ્યા હતા. આઈઆઈએમ કેમ્પસમાં મ્યુનિસિપલ કોર્પોરેશન દ્વારા ટેસ્ટ કેમ્પ અલગ અલગ દિવસો દરમિયાન હાથ ધરાયા હતા, જેમાં વિદ્યાર્થીઓ, પ્રોફેસરો, કોન્ટ્રેક્ટ પર કામ કરતા કર્મચારીઓ અને કમ્યુનિટી મેમ્બર્સ ઉપરાંત જેમને કોરોનાનાં લક્ષણો જણાયાં હતાં તેમના ટેસ્ટ કરવામાં આવ્યા હતા.

રાજ્યમાં છેલ્લા 24 કલાકમાં 2220 નવા કેસ નોંધાયા હતા. જ્યારે વધુ 10 લોકોના કોરોના સંક્રમણથી મૃત્યુ થયાં હતા. આજે રાજ્યમાં 1988 દર્દીઓએ કોરોનાને માત આપી છે.