આગના લબકારાઓ વચ્ચે જતીન જેવું સાહસ દેખાડનારા બીજા બે-પાંચ પણ હોત તો? સુરત આજે ખુબસુરત હોત કે –

0

સુરતના સરથાણા-જકાતનાકા નજીકની તક્ષશિલા આર્કેડમાં લાગેલી આગને લઈને વિવિધ પાસાંઓ સમય વીતે છે તેમ નજર સામે આવી રહ્યાં છે. પોલિસ તપાસ થઈ રહી છે, અપરાધીઓને ઝાલવામાં આવી રહ્યા છે, મૃતકોના પરિવારને સરકાર તરફથી અને લોકો તરફથી મદદ અને આશ્વાસન પણ મળી રહ્યું છે. આ ઘટનાને પગલે દેશભરમાં અને ખાસ કરીને ગુજરાતમાં ફાયર સેફ્ટીને લઈને સતર્કતા આવી છે. ફાયર એસ્ટિંગ્યૂશર (આગ સલામતી માટે રાખવામાં આવતો બાટલો) નો મુસીબતના સમયે કેમ ઉપયોગ કરી શકાય એની જાણકાર અત્યાર સુધી બહુ જૂજ લોકોને હતી. હવે સફાળા જાગેલા ક્લાસીસના માલિકો, વિવિધ કંપનીઓ વગેરેએ લોકોને અને વિદ્યાર્થીઓને આગ લાગે ત્યારે બાટલાનો ઉપયોગ કેમ કરવો એ પણ શીખવવા માંડ્યું છે.

Image Source

સારું છે. પણ રતન ગયું ને સમજણ આવી! આ કરૂણાંતિકા બની એ કદી ભૂલાશે નહી. અમુક બેદરકારીઓ ક્યારેક અસહ્ય પરિણામ લઈને આવતી હોય છે તેનું આ ઉદાહરણ છે.

તક્ષશિલા આર્કેડમાં લાગેલી આગ વખતે બહાર ઊભેલી વસ્તી અનેકગણી હતી, જ્યારે અંદર બાળકોને આગ સામે જજૂમીને બચાવનારા આંગળીના વેઢે ગણાય એટલા હતા. પણ એ હતા કોણ? તેમાંના એક-બે તો પ્રસિધ્ધીમાં આવ્યા છે. હજુ એક જવાન બાકી છે. કોણ હતો એ ખબર? ના, તો નીચેનું ટુ-ધ-પોઇન્ટ લખાણ તમારા માટે જ છે:

જતીન નાકરાણી: મોત સામે બાથ ભીડીને જીંદગીઓ સલામત કરી —

Image Source

સાવરકુંડલાના કોઈ એક ગામનો એ યુવાન સુરતમાં સ્થિત થઈને તક્ષશિલા આર્કેડના બીજા માળે ફેશન ડિઝાઇનની ઇન્સ્ટીટ્યૂટ ચલાવતો હતો. રહેવાનું પરિવાર સાથે લસણકા વિસ્તારમાં. આગ લાગી એ વખતે 24 વર્ષનો જતીન પોતાના સ્ટાફ સાથે ઓફિસમાં હતો.

આગની જાણ થઈ. વિકરાળ આગે દાદરાને તો ભરખી જ લીધો હતો, એટલે નીચે ઉતરીને જવાનું તો સપનુંય હવે કોઈને આવે તેમ નહોતું. લકડીયા દાદરાને લપેટમાં લેતી આગ અટ્ટહાસ્ય કરતી કોઈ જીવન વાંચ્છુકને જાણે કહેતી હતી, ‘તું આવે કે હું આવું…?’

જતીને સ્ટાફને સંભાળ્યો. ઇમરજન્સી વિન્ડોમાંથી પોતાના કર્મચારીઓ અને એ જ બીજા માળની એક કોચિંગ ઇન્સ્ટીટ્યૂટના ત્રણ વિદ્યાર્થીઓને બહાર કાઢ્યા.

Image Source

ત્રીજી માળનું તાંડવ —

ઉપરથી હોહા સંભળાઈ. એ ત્રીજા માળનો કોલાહલ હતો. અહી હતા – કોચીંગ ક્લાસીસના એ હતભાગી વિદ્યાર્થીઓ! અહીં ફસાયેલાની સંખ્યા પણ મોટી હતી. જતીને ભીતેથી ફાયર ઇસ્ટિંગ્યૂશર ઉતાર્યું. બાટલો હલાવી, પીન ખેચી અને અંકોળિયા દબાવતા વછૂટેલાં દ્રવ્યને છાંટ્યું સળગતા દાદરા પર. જેમ-તેમ કરીને જતીન ઉપર પહોચ્યો.

ઉપર તો ક્યાં કોઈને હોશહવાસની સ્થિતિ હતી? ચોતરફ ધૂમાડાનું દાહક ધુમ્મસ… વચ્ચે-વચ્ચે આવું-આવું કરતી આગનું ધધકારા જેવું અટ્ટહાસ્ય…! બાળકો ગૂંગળામણ અનુભવતાં હતાં. જતીને બારીનો કાચ તોડ્યો; હવા આવેને અકળામણ ઓછી થાય એ હેતુથી. પણ એ રાહતથી શું વળવાનું હતું જ્યારે પાછળથી દાનવ આવતો જ હતો મોતનો ધાબળો લઈને! જતીને મદદ તો કરી પણ શ્વાસ રૂંધાવા લાગ્યો. હવે શું થાય? પોતે તોડેલી બારીમાંથી પોતે ઠેકડો મારે નહી તો બીજું શું કરે?

Image Source

જતીને કૂદકો માર્યો. પણ કમભાગ્યે સલામત જગ્યા પર નહી! માથું, હાથો અને પાસંળીઓ સહીત અનેક ગંભીર ઇજાઓ થઈ – ભયાનક પછડાટથી. અત્યારે એ ખાનગી દવાખાનામાં વેન્ટિલેટર પર છે. બે બહેનોનો એકનો એક ભાઈ છે! ભગવાન સલામત રાખે એને!

પ્રત્યન કર્યો એને બિરદાવવાની પણ આપણી હિંમત ખરી કે નહી? બહાર ઊભા રહીને વીડિઓ ઉતારનારા ડઘાઓ કરતા આ જીવના જોખમે થતો પ્રયત્ન હજાર દરજ્જે સારો હો!

વેલ ડન જતીન!

Author: GujjuRocks Team
તમે આ લેખ GujjuRocks ના માધ્યમથી વાંચી રહ્યા છો, અમારો આ લેખ વાચવા બદલ આપનો આભાર. જો તમને આ લેખ ગમ્યો હોય તો શેર કરી વધુમાં વધુ લોકો સુધી પહોંચાડો અને તમારા પ્રતિભાવો કોમેન્ટમાં જણાવો.

આવી જ રીતે રોજિંદા જીવનમાં ઉપયોગી હોય એવી લાગણીસભર વાર્તાઓ, સ્વાસ્થ્યવર્ધક માહિતી, બોલીવુડની ખબરો, ધાર્મિક વાતો, રેસિપી તથા અન્ય રસપ્રદ માહિતીઓ મેળવવા માટે ગુજરાતીઓનું લોકપ્રિય ફેસબુક પેજ “GujjuRocks” લાઈક કરી જોડાઓ તથા હવે અમારા દરેક જોક્સ-સુવિચાર સીધા તમારા મોબાઈલમાં મેળવવા માટે અમારી મોબાઈલ એપ અહીં ક્લિક કરીને ડાઉનલોડ કરો >> GujjuRocks

લેખ ગમ્યો હોય તો લાઈક કરી મિત્રો સાથે શેયર કરજો.