નીરજ ચોપરા સાથે લગ્નના બંધનમાં બંધાયેલી હિમાની મોર પોતે પણ છે ખેલાડી, પિતા પણ ટીમ ઇન્ડિયાના હતા કેપ્ટન
હરિયાણાના આ જિલ્લાની છે નીરજ ચોપરાની દુલ્હન હિમાની મોર, આ સ્કૂલથી કર્યો છે અભ્યાસ- જાણો બધુ જ…
ઓલિમ્પિક ગોલ્ડ મેડલિસ્ટ નીરજ ચોપરા લગ્નના બંધનમાં બંધાઇ ગયો છે, નીરજે સોશિયલ મીડિયા પર તસવીરો પોસ્ટ કરીને ચાહકો સાથે આ માહિતી શેર કરી હતી. નીરજે હિમાની મોર સાથે સાત ફેરા લીધા છે. નીરજ ચોપરાએ પોતાના લગ્નની તસવીરો સોશિયલ મીડિયા પર પોસ્ટ કરતા જ થોડીવારમાં બંને X થી Google સુધી ટ્રેન્ડ કરવા લાગ્યા. લગભગ બધા જ જાણવા ઇચ્છે છે કે નીરજ ચોપરાની પત્ની હિમાની કોણ છે ? ચાહકો તો એ જાણવા માટે ઉત્સુક છે કે હિમાની કોણ છે ? અને શું કરે છે ?
આ સાથે દિગ્ગજ સ્ટાર્સથી લઈને ખેલાડીઓ સુધી તેમજ નેતાઓથી લઈને અભિનેતાઓ સુધી અનેક લોકોએ નીરજને તેના જીવનના નવા અધ્યાય માટે શુભેચ્છા પાઠવી. નીરજ ચોપરાની પત્ની હિમાની મોર હરિયાણાના સોનીપતની રહેવાસી છે. નીરજની જેમ તે પણ એક રમતગમત ખેલાડી છે અને ટેનિસ રમે છે. હિમાનીએ લિટલ એન્જલ્સ પબ્લિક સ્કૂલથી અભ્યાસ કર્યો હતો. એવું કહેવામાં આવી રહ્યું છે કે આ એ જ શાળા છે જ્યાં ભારતના નંબર-1 ટેનિસ ખેલાડી સુમિત નગાલ પણ અભ્યાસ કરી ચૂક્યા છે.
મળતી માહિતી મુજબ હિમાની અમેરિકાની ફ્રૈંકલિન પિયર્સ યુનિવર્સિટીથી સ્પોર્ટ્સ મેનેજમેન્ટ (મેજર)નો અભ્યાસ કરી રહી છે. હિમાનીએ દિલ્હી યુનિવર્સિટીમાંથી ગ્રેજ્યુએશન પૂર્ણ કર્યું છે. તે દિલ્હીના મિરાંડા હાઉસની ભૂતપૂર્વ વિદ્યાર્થી છે, જ્યાંથી તેણે રાજકીય વિજ્ઞાન અને શારીરિક શિક્ષણમાં સ્નાતકની ડિગ્રી પૂર્ણ કરી છે. આ ઉપરાંત હિમાની ફ્રૈંકલિન પિયર્સ યુનિવર્સિટીમાં સહાયક કોચ પણ રહી ચૂકી છે. હિમાની મોર એક ટેનિસ ખેલાડી છે. હિમાનીએ વર્લ્ડ યુનિવર્સિટી ટેનિસ ગેમ્સમાં ભારતનું પ્રતિનિધિત્વ કર્યું છે.
હિમાની 2017માં તાઇવાનમાં યોજાયેલી વર્લ્ડ યુનિવર્સિટી ટેનિસ ચેમ્પિયનશિપમાં ભારત માટે રમી હતી. હિમાની રાષ્ટ્રીય સ્તરથી લઈને આંતરરાષ્ટ્રીય સ્તર સુધી ટેનિસ રમી છે. ઓલ ઈન્ડિયા ટેનિસ એસોસિએશન (AITA) ની વેબસાઇટ અનુસાર, 2018માં હિમાનીનું શ્રેષ્ઠ રાષ્ટ્રીય રેન્કિંગ સિંગલ્સમાં 42 અને ડબલ્સમાં 27 હતું. હિમાની મોરનો પરિવાર ખેલાડીઓથી ભરેલો છે. હિમાનીના પિતા ચંદ્રમ મોર એક પ્રખ્યાત કબડ્ડી ખેલાડી રહી ચૂક્યા છે. તેઓ ભારતીય ટીમના કેપ્ટન પણ રહી ચૂક્યા છે.
આ ઉપરાંત, હિમાનીનો નાનો ભાઈ હિમાંશુ મોર પણ ટેનિસ ખેલાડી છે અને સ્પોર્ટ્સ ક્વોટા દ્વારા વાયુસેનામાં અધિકારી તરીકે પોસ્ટેડ છે. આ દિવસોમાં તે નાગપુરમાં પોસ્ટેડ છે. હિમાનીના બે પિતરાઈ ભાઈઓ કુસ્તીબાજ છે અને એક પિતરાઈ ભાઈ બોક્સર છે. નીરજ અને હિમાનીના લગ્નની વાત કરીએ તો બંનેએ 16 જાન્યુઆરીએ શિમલામાં ગુપ્ત રીતે લગ્ન કર્યા. નીરજના કાકાએ જણાવ્યું કે આ કપલ હનીમૂન મનાવવા માટે અમેરિકા ગયું છે. તેમના ભારત પાછા ફર્યા પછી રિસેપ્શન પાર્ટીનું આયોજન કરવામાં આવશે.
