ગુજરાત દેશના સૌથી સમૃદ્ધ રાજ્યોમાંનું એક છે. અહીં પર્યટનની દૃષ્ટિએ પણ ઘણી જગ્યાઓ છે. જો તમે ગુજરાતની મુલાકાત લો છો તો જોવાલાયક સ્થળોની સાથે ત્યાં મળતા સ્થાનિક સ્ટ્રીટ ફૂડનો સ્વાદ લેવાનું ક્યારેય નહિ ભૂલો. ગુજરાતના ઘણા સ્ટ્રીટ ફૂડ એટલા ફેમસ છે કે તેમણે દેશ અને દુનિયામાં ખ્યાતિ મેળવી છે. જેમાંનું એક સ્ટ્રીટ ફૂડ છે જામનગરના તીખા ઘૂઘરા… દિવાળીના તહેવારની શરૂઆત થવામાં બસ હવે ગણતરીના દિવસો જ બાકી રહ્યા છે.
દિવાળીનો તહેવાર એટલે અવનવી વાનગીઓ બનાવી અથવા તૈયાર લાવીને ખાવાનો તહેવાર. આ તહેવારમાં ઘણા લોકો ઘરે ભાત ભાતની વસ્તુઓ બનાવતા હોય છે. ત્યારે આજે અમે તમને એવી જ જામનગરની પ્રખ્યાત અને સ્વાદિષ્ટ વાનગી તીખા ઘૂઘરા બનાવવાની રીત જણાવીશું, જે ખુબ જ સરળ છે અને આ ઘૂઘરા ખાવામાં પણ ખુબ જ ટેસ્ટી છે.
તીખા ઘૂઘરા બનાવવા માટેની સામગ્રી:
4 નંગ બાફેલા બટાકા, 1 ચમચી લાલ મરચું, 1/4 ચમચી હળદર, 1 કપ ઘઉંનો લોટ
1 કપ મેંદો, ૨ ચમચી તેલ (લોટ બાંધવા), તળવા માટે જરૂરિયાત પ્રમાણેનું તેલ, મીઠું સ્વાદ અનુસાર
સ્વાદ અને સજાવટ માટે:
આંબલીની ચટણી, લીલી ચટણી (મરચા અને લીલા ધાણાની), લસણની ચટણી, જરૂર પ્રમાણે ઝીણી સેવ,જરૂર પ્રમાણેની મસાલા સીંગ
તીખા ઘૂઘરા બનાવવા માટેની રીત:
સૌ પ્રથમ ઘૂઘરા માટે મેંદા અને ઘઉંના લોટની અંદર બે ચમચી તેલ અને સ્વાદ પ્રમાણે મીઠું નાખી પાણીથી લોટને બાંધી લેવો, આ લોટ બહુ ઢીલો અથવા કઠણ ના બંધાય જાય તેનું ખાસ ધ્યાન રાખવું.
લોટ બંધાઈ ગયા બાદ તેને ભીના કપડાંની અંદર 10 મિનિટ સુધી રહેવા દેવો. બીજા એક બાઉલની અંદર બાફેલા બટાકા, લાલ મરચું, હળદર અને સ્વાદ પ્રમાણે મીઠું નાખીને બરાબર તેનું મિશ્રણ કરી લેવું. એક પેનની અંદર બી ચમચી તેલ લઈને થોડી વાર સુધી એ મિશ્રણને શેકી લેવું.
મિશ્રણ શેકાઈ ગયા બાદ તેને બાજુ પર કોઈ પ્લેટમાં કાઢી લેવું. હવે લોટમાંથી નાના નાના લુવા લઈને તેને પુરી આકારમાં વણી લેવા. પુરી તૈયાર થઇ જાય ત્યારબાદ બટાકાનું થોડું મિશ્રણ તેના ઉપર મૂકી ઘૂઘરા આકારમાં તેને બનાવી લેવા.
બધા જ ઘૂઘરા એ રીતે તૈયાર થઇ ગયા બાદ એક પેનની અંદર તેલ ગરમ કરવા માટે રાખવું. તેલ ગરમ થઇ ગયા બાદ બે-ત્રણ ઘૂઘરા અંદર નાખીને ગોલ્ડન બ્રાઉન થતા સુધી તળી લેવા. આ રીતે વારાફરથી બધા જ ઘૂઘરા તળીને તૈયાર કરી લેવા. આ ઘુઘરાને ગરમ ગરમ જ મસાલા સીંગ અને ઝીણી સેવ નાખીને અલગ અલગ ચટણીઓ ભેળવીને ખાવા.
