IPLની કઈ ટીમમાંથી કેટલા ભારતીય ખેલાડીઓને મળી ટી-20 વર્લ્ડકપની ટિકિટ ? આ 4 ટીમોના એકપણ ખેલાડીને ના મળ્યું સ્થાન, જુઓ
IPL player got a place in the Indian team : આ દિવસોમાં ભારતમાં ઈન્ડિયન પ્રીમિયર લીગ (IPL 2024) પૂરજોશમાં ચાલી રહી છે. દરમિયાન, મંગળવારે (30 એપ્રિલ) T20 વર્લ્ડ કપ માટે ભારતીય ટીમની જાહેરાત કરવામાં આવી હતી. ટીમની જાહેરાત થતાની સાથે જ આઈપીએલ રમતા ઘણા ખેલાડીઓની કિસ્મત બદલાઈ ગઈ, જ્યારે ઘણાને નિરાશાનો સામનો કરવો પડ્યો. ભારતની T20 વર્લ્ડ કપની 15 સભ્યોની ટીમમાં સામેલ તમામ ખેલાડીઓ આ દિવસોમાં વર્તમાન લીગમાં રમી રહ્યા છે.
ખેલાડીઓના IPL પ્રદર્શનને પણ ધ્યાનમાં લેવામાં આવ્યું હતું. પરંતુ સનરાઇઝર્સ હૈદરાબાદ, ગુજરાત ટાઇટન્સ, કોલકાતા નાઇટ રાઇડર્સ અને લખનઉ સુપર જાયન્ટ્સ એવી ચાર ટીમો હતી જ્યાંથી T20 વર્લ્ડ કપની ટીમમાં કોઇપણ ભારતીય ખેલાડીની પસંદગી કરવામાં આવ્યો નથી. સનરાજર્સ હૈદરાબાદના અભિષેક શર્મા અને ટી નટરાજન ટીમમાં પસંદગી માટે દાવેદાર હતા. તો IPL 2023ના ઓરેન્જ કેપ ધારક અને આ વખતે ગુજરાત ટાઇટન્સ તરફથી કેપ્ટન શુભમન ગિલને રિઝર્વમાં પસંદ કરવામાં આવ્યો છે.
રિંકુ સિંહ કોલકાતા નાઈટ રાઈડર્સ તરફથી રિઝર્વમાં છે. એ જ રીતે કોલકાતા નાઈટ રાઈડર્સનો કેપ્ટન શ્રેયસ અય્યર પહેલેથી જ પસંદગી યાદીમાંથી ગાયબ હતો. લખનઉ સુપર જાયન્ટ્સ તરફથી તેમના કેપ્ટન કેએલ રાહુલ વિશે આશા હતી કે તે ટીમમાં જગ્યા બનાવી શકે છે, પરંતુ તે પણ ટીમમાં જગ્યા બનાવી શક્યો નહીં. આ ટીમમાંથી રવિ બિશ્નોઈને લઈને ચર્ચા ચાલી રહી હતી, જ્યારે મયંક યાદવના શરૂઆતી પ્રદર્શન બાદ માનવામાં આવી રહ્યું હતું કે તે વર્લ્ડ કપની ટીમમાં આવી શકે છે. પરંતુ લખનઉ સુપર જાયન્ટ્સ ટીમમાંથી કોઈ પણ વર્લ્ડ કપની ટીમમાં સ્થાન મેળવી શક્યું નથી.
જોકે, IPLમાં મુંબઈમાંથી સૌથી વધુ ચાર ખેલાડીઓની પસંદગી કરવામાં આવી છે. જેમાં રોહિત શર્મા, સૂર્યકુમાર યાદવ, હાર્દિક પંડ્યા, જસપ્રિત બુમરાહનો સમાવેશ થાય છે. જ્યારે પંજાબ કિંગ્સ એવી ટીમ હતી જેમાંથી એકમાત્ર ખેલાડીની પસંદગી કરવામાં આવ્યો. આ ઉપરાંત રાજસ્થાન અને દિલ્હીમાંથી ત્રણ-ત્રણ ખેલાડીઓની પસંદગી કરવામાં આવ્યા છે. T20 વર્લ્ડ કપની ટીમમાં રોયલ ચેલેન્જર્સ બેંગ્લોર અને ચેન્નાઈ સુપર કિંગ્સમાંથી 2-2 ખેલાડીઓની પસંદગી કરવામાં આવ્યા છે.
