ભારત 24 ઓક્ટોબરે પાકિસ્તાન સામેની મેચથી ટી-20 વર્લ્ડ કપમાં પોતાના અભિયાનની શરૂઆત કરશે. આ પહેલા જ હાર્દિક પંડ્યાની ફિટનેસ પર સવાલો ઉઠી રહ્યા છે. આ સ્ટાર ઓલરાઉન્ડરે ઇન્ડિયન પ્રીમિયર લીગ (IPL) ની 14 મી સીઝનમાં અત્યાર સુધી મુંબઈ ઇન્ડિયન્સ (MI) માટે એક પણ બોલ ફેંક્યો નથી.
ICC ના નિયમો અનુસાર, BCCI પાસે હવે ટીમમાં ફેરફાર કરવા માટે 15 ઓક્ટોબર સુધીનો સમય છે. આવી સ્થિતિમાં, જો હાર્દિક ઓલરાઉન્ડર તરીકે સંપૂર્ણ રીતે ફિટ નથી, તો 15 સભ્યોની ટીમમાં તેની જગ્યાએ અન્ય ખેલાડીને સામેલ કરી શકાય છે. આ રેસમાં શાર્દુલ ઠાકુર અને દીપક ચાહરના નામ મોખરે જણાવવામાં આવી રહ્યા છે. આ બંને ખેલાડીઓને ટી-20 ટીમમાં સ્ટેન્ડબાય તરીકે પસંદ કરવામાં આવ્યા હતા.
જ્યારે પણ શાર્દુલ ઠાકુરને ભારત તરફથી રમવાની તક મળી છે ત્યારે તે છવાઈ જાય છે. તેણે આ વર્ષની શરૂઆતમાં ઓસ્ટ્રેલિયા પ્રવાસ પર બોલ અને બેટ દ્વારા ઉપયોગી યોગદાન આપીને ભારતની જીતમાં મહત્વની ભૂમિકા ભજવી હતી. તાજેતરના ઇંગ્લેન્ડ પ્રવાસમાં પણ, જ્યારે તેને તક મળી ત્યારે તેણે ઓલરાઉન્ડ પ્રદર્શન કર્યું હતું.
29 વર્ષીય શાર્દુલે અત્યાર સુધીમાં ચાર ટેસ્ટ, 15 વનડે અને 22 ટી-20 આંતરરાષ્ટ્રીય મેચ રમી છે, જેમાં તેની અનુક્રમે 14, 22 અને 31 વિકેટ છે. વન ડે ઈન્ટરનેશનલમાં શાર્દુલે 144.59ની સ્ટ્રાઇક રેટથી 107 રન બનાવ્યા છે. ટી 20 આંતરરાષ્ટ્રીયમાં 69 રન બનાવવા દરમિયાન તેનો સ્ટ્રાઇક રેટ 197.14 રહ્યો છે. IPL 2021 માં શાર્દુલે અત્યાર સુધીમાં 15 મેચમાં 18 વિકેટ લીધી છે.
તો બીજી તરફ દીપક ચાહરની વાત કરીએ તો તેણે ભારત માટે અત્યાર સુધી 5 વનડે અને 14 ટી-20 મેચમાં ભાગ લીધો છે. આ દરમિયાન ચાહરે વનડેમાં 6 અને ટી 20 આંતરરાષ્ટ્રીયમાં 20 વિકેટ લીધી છે. શાર્દુલની જેમ દીપક ચાહરમાં પણ બેટ સાથે યોગદાન આપવાની ક્ષમતા છે. તાજેતરના શ્રીલંકા પ્રવાસ પર વનડે મેચમાં તેણે ટીમને જીત અપાવવા માટે અણનમ 69 રન બનાવ્યા હતા. આઈપીએલ 2021 માં દીપક ચાહરે અત્યાર સુધીમાં 14 મેચમાં 13 વિકેટ લીધી છે. જોકે, યુએઈ લીગમાં તેના ફોર્મમાં ઘટાડો થયો છે.
વરુણ ચક્રવર્તીનું શું થશે? : પસંદગીકારો ફરીથી હાર્દિકના નામ તેમજ ‘મિસ્ટ્રી’ સ્પિનર વરુણ ચક્રવર્તીની ચર્ચા કરી શકે છે, જેમને ઘૂંટણની સમસ્યા છે. સૂત્રો કહે છે કે, ‘જો ઘૂંટણની સમસ્યાને કારણે વરુણ ટીમનો ભાગ નહીં બને, તો તેનો એકમાત્ર વિકલ્પ જોવા મળે છે અને તે છે યુઝવેન્દ્ર ચહલ. ઉમરાન મલિક પહેલાથી જ ભારતના બાયો-બબલમાં નેટ બોલર તરીકે હાજર છે. શિવમ માવીને નેટ બોલર તરીકે રાખવામાં આવે છે કે નહીં તે જોવું રસપ્રદ રહેશે.
- ટી 20 વર્લ્ડ કપ માટે ભારતીય ટીમ: વિરાટ કોહલી, રોહિત શર્મા, કેએલ રાહુલ, સૂર્યકુમાર યાદવ, ઋષભ પંત, ઇશાન કિશન, હાર્દિક પંડ્યા, રવિન્દ્ર જાડેજા, રાહુલ ચાહર, રવિ અશ્વિન, અક્ષર પટેલ, વરુણ ચક્રવર્તી, જસપ્રીત બુમરાહ, ભુવનેશ્વર કુમાર, મોહમ્મદ શમી.
- સ્ટેન્ડ બાય: શ્રેયસ ઐયર, શાર્દુલ ઠાકુર અને દીપક ચાહર.
- નેટ બોલર: ઉમરાન મલિક
