Diwali Festival & Celebration Diwali Special Recipy રસોઈ

દિવાળી ઉપર બનાવો સ્વાદિષ્ટ ડ્રાય કચોરી, સ્વાદ એવો આવશે કે ઘરના દરેક વ્યક્તિ ખાતા રહી જશે, 10-15 દિવસ સાચવી પણ શકાશે

દિવાળીનો તહેવાર એટલે વિવિધ ફરસાણ અને મીઠાઈ સાથે મોજ માણવાનો તહેવાર. આ તહેવાર ઉપર બજારમાંથી અથવા તો ઘરમાં બનાવેલી કેટલીય જાત જાતની વાનગીઓ જોવા મળતી હોય છે. એવી જ એ કે સરસ મજાની વાનગી ડ્રાય કચોરી આજે અમે તમને બનાવતા શીખવાડીશું, જે સ્વાદમાં પણ લાજવાબ છે અને ઘરના દરેક વ્યક્તિને પણ ખુબ જ પસંદ આવશે. ચાલો જોઈએ કેવી રીતે બનાવી શકાય.

Image Source

ડ્રાય કચોરી બનાવવાની સામગ્રી:

  • 2 કપ મેંદો
  • બે ચમચી તેલ
  • અડધો કપ ચવાણું (ફરસાણ)
  • બે ચમચી ખજૂર આમલીની ચટણી
  • અડધી ચમચી હળદર
  • એક ચમચી લાલ મરચું પાઉડર
  • અડધી ચમચી ગરમ મસાલો પાઉડર
  • અડધી ચમચી આમચૂર પાવડર
  • ૧ ચમચી ધાણા
  • એક ચમચી વરિયાળી
  • અડધી ચમચી ખસખસ
  • અડધો કપ કાજુ (કાપેલા)
  • 10-12 કિસમિસ (કાપેલા)
  • 8-10  બદામ (કાપેલા)
  • ૨ ચમચી દળેલી ખાંડ
  • જરૂર પ્રમાણે તળવા માટે તેલ
  • મીઠું સ્વાદ પ્રમાણે
Image Source

ડ્રાય કચોરી બનાવવાની રીત:

  • સૌ પ્રથમ ચવાણા (ફરસાણ)નો મિક્સરની અંદર એકદમ બારીક ભૂકો કરી લો.
  • ત્યારબાદ એક પેનની અંદર થોડું તેલ ગરમ કરવા મુકો.
  • તેલ ગરમ થઇ ગયા બાદ ચવાણું અને બધા જ ડ્રાયફ્રુટ તથા બીજા મસાલા ઉમેરી બરાબર હલાવી લો અને 1 મિનીટ સુધી શેકાવા દો.
  • ત્યારબાદ આ મિશ્રણમાં ખાંડ, મીઠું અને ખજૂર-આંબલીની ચટણી ઉમેરી બરાબર હલાવી લો અને 1 મિનીટ સુધી રહેવા દો.
  • ત્યારબાદ ગેસ બંધ કરી દઈ અંદાજે ૪ થી ૫ મિનિટ સુધી આ મસાલાને ઠંડો થવા દેવો.
  • ત્યાં સુધી એક વાસણની અંદર મેંદો, મીઠું અને જરૂર પ્રમાણેનું તેલ ઉમેરી એકદમ કડક લોટ બાંધી લેવો. ત્યારબાદ તેને 10 મિનિટ સુધી ઢાંકીને રહેવા દેવો.
  • પહેલા બનાવેલા મસાલામાંથી થોડો થોડો મસાલો લઈને ગોળ ગોળ બોલ બનાવી લેવા અને એક પ્લેટમાં બાજુ ઉપર રાખી લેવા.
  • 10 મિનિટ બાદ લોટમાંથી નાનો લૂઓ લઈ તેને ગોળાકાર પુરીની જેમ વણી લેવા.
  • આ પૂરીને એકદમ પાતળી નથી રાખવાની. થોડી જાડી બનાવવી.
  • પુરી વણાઈ ગયા બાદ બનાવેલા મસાલાના બોલને પુરીની વચ્ચે મૂકી કચોરી આકારમાં વાળી લેવો. કચોરી આકારમાં વાળતી વખતે બહાર વધેલા લોટને કાઢી લેવો.
  • એક એક કરી અને આ રીતે બધી જ કચોરી તૈયાર કરી લેવી.
  • કચોરી તૈયાર થઇ ગયા બાદ એક પેનની અંદર તળવા માટે જરૂરી તેલ મુકવું.
  • તેલ ગરમ થઇ ગયા બાદ ગેસની ધીમી આંચ ઉપર કરી અને કચોરી ગોલ્ડન બ્રાઉન ના થાય ત્યાં સુધી તળ્યા કરવી.
  • તૈયાર છે તમારી સ્વાદિષ્ટ ડ્રાય કચોરી.
  • આ કચોરીને તમે 10-15 દિવસ સુધી સ્ટોર પણ કરી શકો છો.
Image Source

આ રેસિપી તમને કેવી લાગી ? કોમેન્ટ કરીને જરૂર જણાવજો. જેથી આવી જ સ્વાદ સભર રેસિપી અમે તમારા માટે લાવતા રહીએ.