Armaan-Anissa blessed with baby : કપૂર પરિવારમાં ફરી એકવાર ખુશીનો માહોલ છે. પરિવારમાં કિલકારીઓ ગુંજી ઉઠી છે. નીતુ કપૂરે જાહેરાત કરી છે કે તેનો ભત્રીજો અરમાન જૈન (Armaan Jain) અને તેની પત્ની અનીસા મલ્હોત્રા (Anissa Malhotra) માતા-પિતા બની ગયા છે. બંનેના ઘરે નાના પુત્રનો જન્મ થયો છે. કરીના કપૂરથી લઈને નીતુ કપૂરે સોશિયલ મીડિયા પર આ સારા સમાચાર શેર કર્યા છે.
જ્યારે ફોઇ બનનાર કરીના-કરિશ્મા અને રિદ્ઘિમાએ પણ સોશિયલ મીડિયા પર ખુશી વ્યક્ત કરી હતી. ઋષિ કપૂરની બહેન રીમા જૈન અને તેમના પતિ મનોજ જૈનને બે પુત્રો છે. અરમાન જૈન અને આદર જૈન. આદર જૈનનું નામ બોલિવુડ અભિનેત્રી તારા સુતરિયા સાથે જોડવામાં આવ્યું હતુ પણ છેલ્લા કેટલાક સમયથી સમાચાર છે કે તે બંનેનું બ્રેકઅપ થઇ ગયુ છે. જ્યારે અરમાન જૈન પરિવારનો મોટો પુત્ર છે. તેણે વર્ષ 2020માં અનીસા મલ્હોત્રા સાથે લગ્ન કર્યા હતા.
ત્યારે હવે બંને માતા-પિતા બની ગયા છે. તેમના ઘરે પુત્રનો જન્મ થયો છે. નીતુ કપૂરે સોશિયલ મીડિયા પર શેર કરેલી પોસ્ટમાં લખવામાં આવ્યુ છે કે, ‘દાદા મનોજ જૈન અને દાદી રીમા જૈન તેમના પૌત્રને આવકારવા માટે ખૂબ જ ઉત્સાહિત છે. અમે પરિવારમાં નવા સભ્યનું સ્વાગત કરીએ છીએ. નીતુ કપૂરની પુત્રી અને રણબીર કપૂરની બહેન રિદ્ધિમા કપૂરે અરમાન અને અનીસાને માતા-પિતા બનવા બદલ અભિનંદન પાઠવ્યા હતા.
ત્યાં કરીના કપૂર ખાને પણ ભાઈ અને ભાભી સાથે ફોટો શેર કરીને શુભેચ્છા પાઠવી હતી. આ સાથે જ જણાવ્યું કે ઘરમાં નાના મહેમાનના આગમનથી તે ખૂબ જ ખુશ છે. ત્યાં અનીસાની બહેન આકાંક્ષા મલ્હોત્રાએ પણ અભિનંદન પાઠવ્યા હતા. જણાવી દઈએ કે અરમાન વ્યવસાયે એક્ટર છે, તો અનીસા એક મોડલ અને બ્લોગર છે.
અરમાને વર્ષ 2014માં ફિલ્મ ‘લેકર હમ દિવાના દિલ’થી પોતાના કરિયરની શરૂઆત કરી હતી. એક્ટિંગની દુનિયામાં આવતા પહેલા અરમાને આસિસ્ટન્ટ ડિરેક્ટર તરીકે કામ કર્યું હતું. તેણે ‘એક મેં ઔર એક તુ’ અને ‘સ્ટુડન્ટ ઑફ ધ યર’ જેવી ફિલ્મોમાં આસિસ્ટન્ટ ડિરેક્ટર તરીકે કામ કર્યું છે.
