230 વર્ષથી અહીંયા ચાલી આવે છે અનોખી પરંપરા, મેયર કરે છે ધામધૂમથી માદા મગર સાથે લગ્ન, દુલ્હનની જેમ તૈયાર થયેલ મગરને ચુંબન પણ કરવામાં આવે છે, જુઓ વીડિયો
Mayor Married a Crocodile : સોશિયલ મીડિયામાં લગ્નને લઈને ઘણા બધા વીડિયો અને તસવીરો વાયરલ થતી હોય છે. ઘણીવાર લગ્નની અનોખી વિધિ પણ ચર્ચામાં આવતી હોય છે, તો ઘણીવાર લગ્ન કરી રહેલ કપલ પણ તેમના દેખાવના કારણે ચર્ચામાં આવતું હોય છે, પરંતુ શું તમે ક્યારેય સાંભળ્યું છે કે કોઈ વ્યક્તિ મગર સાથે લગ્ન કરે ? જાણીને જ નવાઈ લાગે પરંતુ આ હકીકત છે. હાલ સોશિયલ મીડિયામાં એક મેયર અને મગરના લગ્નની તસવીરો ખુબ જ વાયરલ થઇ રહી છે.
દક્ષિણ મેક્સિકોના સાન પેડ્રો હુઆમેલુલા શહેરના મેયર વિક્ટર હ્યુગો સોસાએ પરંપરાગત સમારંભમાં માદા મગર સાથે લગ્ન કર્યા. વાસ્તવમાં અહીંના ઈતિહાસમાં આ સરિસૃપને રાજકુમારી માનવામાં આવે છે. ચોંટલ અને હુવે સ્વદેશી જૂથો વચ્ચેની શાંતિની યાદમાં 230 વર્ષથી આ લગ્નની વિધિ કરવામાં આવે છે. આવી સ્થિતિમાં ચોંટલ રાજાના પ્રતીક એવા મેયરને તે મગર સાથે લગ્ન કરવા પડે છે. મગર સાથે લગ્ન કરવાની પરંપરાને સમૃદ્ધિનું પ્રતીક માનવામાં આવે છે.
આ અનોખા લગ્ન સમારોહ દ્વારા, બંને સમુદાયો પૃથ્વી સાથે જોડાય છે અને વરસાદ, પાકના અંકુરણ અને સંવાદિતા માટે ભગવાનના આશીર્વાદ મેળવે છે. સમારંભ પહેલા, મગરને શણગારવામાં આવે છે અને લોકોના ઘરે લઈ જવામાં આવે છે. મગરને દુલ્હનની જેમ શણગારવામાં આવે છે અને તેનું મોં રક્ષણ માટે બંધ કરવામાં આવે છે. લગ્ન ટાઉન હોલમાં થાય છે, જ્યાં એક સ્થાનિક માછીમાર સારી માદા મગર પકડીને આપે છે.
The mayor of Mexico’s San Pedro Huamelula tied the knot with a crocodile. Locals danced to mark the ritual, which is believed to bring a good harvest pic.twitter.com/LPd8iITrC5
— Reuters (@Reuters) July 2, 2023
મેયર તેની મગરની દુલ્હન સાથે ડાન્સ પણ કરે છે અને આ પ્રસંગ સંસ્કૃતિઓની બેઠકની ઉજવણી કરે છે. સમારોહ સમાપ્ત થાય છે જ્યારે મેયર તેની મગર કન્યાને ચુંબન કરે છે. તમને જણાવી દઈએ કે પરંપરા મુજબ મેયર વિક્ટર હ્યુગો સોસાએ ગયા વર્ષે પણ આવા લગ્ન ગોઠવ્યા હતા અને તેનો વીડિયો પણ વાયરલ થયો હતો. દુનિયાભરમાં આવી ઘણી અનોખી પરંપરાઓ છે જે અવારનવાર ચર્ચામાં આવે છે. આમાં દેડકા-દેડકીના લગ્ન અને વૃક્ષ સાથે માનવ લગ્ન જેવી પરંપરાઓનો સમાવેશ થાય છે.
