જય માતા જી લેટ્સ રોક એક ગુજરાતી કોમેડી-ડ્રામા છે જે વૃદ્ધાવસ્થા અને કૌટુંબિક ગતિશીલતાના ખ્યાલને તાજગીભર્યો અને રમૂજી અભિગમ આપે છે. મનીષ સૈની દ્વારા દિગ્દર્શિત, આ ફિલ્મ એક 80 વર્ષીય મહિલાની આસપાસ ફરે છે જેનું જીવન સરકારી યોજનાને કારણે અણધાર્યું વળાંક લે છે, જેનાથી તેને ચાર આકર્ષક વિકલ્પોની ખબર પડે છે: બદલો, રોમાંસ, વૈભવી અને અરાજકતા.
ફેમિલી ફલિકસ અને અમદાવાદ ફિલ્મ્સ પ્રોડકશનના બેનર હેઠળ બનેલી આ ફિલ્મના પ્રોડ્યુસર્સ સિદ્ધાર્થ વડોદરિયા, કાજલ વડોદરિયા અને રવિન્દ્ર સંઘવી છે. ફિલ્મની કાસ્ટની વાત કરીએ તો, તેમાં મલ્હાર ઠાકર, ટીકુ તલસાણીયા, વંદના પાઠક, શેખર શુક્લા, વ્યોમા નંદી અને નીલા મુલ્હેરકર જેવા મોટાગજાના કલાકારો છે.
મનીષ સૈની અને આકાશ શાહ નિર્માતા અને સચિન પટેલ સહ-નિર્માતા અને અનિરુદ્ધ સિંહ રહેવાર એસોશિએટ પ્રોડ્યુસર છે. ફિલ્મની વાર્તા મનીષ સૈનીએ લખી છે અને ડાયલોગ્સ મનીષ સૈની અને નિરેન ભટ્ટે લખ્યા છે. મલ્હાર ઠાકરે પ્રશંસનીય અભિનય કર્યો છે, તે તેના પાત્રમાં ઊંડાણ અને રમૂજ લાવ્યો છે.
ટીકુ તલસાનિયાએ પણ પોતાનું વિશિષ્ટ આકર્ષણ ઉમેર્યું છે, જેનાથી કલાકારોના સમૂહમાં એક સંપૂર્ણ સંતુલન સર્જાયું છે. ફિલ્મની કહાનીને રસપ્રદ બનાવવામાં વંદના પાઠક અને વ્યોમા નંદીએ પણ મહત્વપૂર્ણ યોગદાન આપ્યું છે.આ ફિલ્મની કહાની એક 80 વર્ષીય વિધવા (નીલા મુલ્હેરકર) ની આસપાસ ફરે છે, જેને બે પુત્રો અને એક પૌત્ર છે અને તે ગુજરાતના એક નાના શહેરમાં મધ્યમ વર્ગની જીવનશૈલી જીવે છે.
તેના દીકરાઓ તેને થોડા સમય માટે વૃદ્ધાશ્રમમાં છોડી દે છે, પરંતુ એક દિવસ તેનો મોટો દીકરો (ટીકુ તલસાનિયા) તેને ઘરે પાછો લાવે છે. આ દરમિયાન ગુજરાત રાજ્ય સરકારે 80 વર્ષથી વધુ ઉંમરના નાગરિકો માટે એક યોજનાની જાહેરાત કરી છે. સરકારી યોજના મુજબ 80 વર્ષથી વધુ ઉંમરના દરેક વરિષ્ઠ નાગરિકને દર મહિને 1 લાખ રૂપિયા મળશે.
આ તેમના મોટા દીકરા માટે ખરેખર સારા સમાચાર હતા, પરંતુ જે ક્ષણે તેમના નાના દીકરા ગુલાબ (શેખર શુક્લા) ને આ યોજના વિશે ખબર પડે છે ત્યારે તે રૂપિયા મેળવવાના ઇરાદાથી માતાને ઘરે લઈ જવાનો પ્રયાસ કરે છે. આ દરમિયાન બે ભાઈઓ વચ્ચે સંઘર્ષ વધી જાય છે અને બંને માતાને પોતાના ઘરમાં રાખવા માંગે છે. જો કે આ કહાનીમાંએક જબરો ટ્વિસ્ટ આવે છે.
નીલા મુલ્હેરકરનો જૂનો પ્રેમ તેમના જીવનમાં આવે છે અને આ ઉંમરે લગ્નનો પ્રસ્તાવ મૂકે છે. ત્યારે હવે આગળ શું થાય છે…શું બંને દીકરાઓને સરકારી યોજનાનો લાભ મળે છે ? શું સરકારી લાભ અને રૂપિયાના ચકકરમાં દિકરાઓના વર્તનમાં કોઈ ફેર આવે છે ? શું દાદી લગ્નનો પ્રસ્તાવ સ્વીકારે છે ? આ બધા સવાલોના જવાબ તમને આ ફિલ્મ જોયા પછી જ મળશે.
View this post on Instagram
