યુવકને પ્રેમ કરવાની તાલિબાની સજા અપાઈ:દશેરાની રાત્રે ઢોર માર મારીને બેભાન અવસ્થામાં બેડજની સીમમાં ફેંકી દીધા; એકને હોશ આવતા ઘટના સામે આવી
ગુજરાતના અરવલ્લીમાંથી પ્રેમ પ્રકરણમાં તાલિબાની સજાનો એક મામલો સામે આવ્યો છે, જે બાદ ખળભળાટ મચી ગયો છે. દશેરાની રાત્રે મોડાસાના મુલોજ ગામનો પ્રેમી યુવક તેના પિતરાઈ ભાઈ સાથે મેઘરજના બ્રાહ્મણકોટડા ગામમાં તેની પ્રેમિકાને મળવા ગયો હતો અને આ દરમિયાન યુવતિના પરિવારજનોએ પ્રેમી અને તેના પિતરાઈ ભાઈને ઢોર માર માર્યો હતો અને તાલિબાની સજા આપતા હોય તેમ ક્રૂર બન્યા હતા, અને બંનેને ઝાડ સાથે બાંધી દીધા હતા અને પછી માર મારી છોડી મુક્યા હતા.
જો કે, જેમ તેમ કરી પ્રેમી અને તેનો પિતરાઈ ભાઈ બાઇક લઇ ઘરે પહોંચે એ પહેલા જ તેઓ બેભાન થઇ ઢળી પડ્યા અને બંનેને બેભાન હાલતમાં સ્થાનિક સારવાર કરાવી અમદાવાદ સિવિલમાં દાખલ કરવામાં આવ્યા. જો કે, એક યુવકને ભાન આવ્યા બાદ તેણે સમગ્ર હકીકત તેના પરિવારને જણાવી હતી અને એક મહિના બાદ ઇસરી પોલીસ સ્ટેશનમાં ફરિયાદ નોંધાવી. ત્યારે ફરિયાદ નોંધાયા બાદ હવે પોલીસે તપાસનો ધમધમાટ શરૂ કર્યો છે.
પ્રાપ્ત માહિતી અનુસાર, મોડાસાના મુલોજના રમેશ ખાંટને મેઘરજના બ્રાહ્મણ કોટડાની મંજુલા ડામોર સાથે પ્રેમ સંબંધ હતો અને બંને અવાર નવાર ફોન પર અને મેસેજ પર તેમજ કોલ કરી વાતચીત કરતા. જો કે, ગત 24 ઓક્ટોબરના રોજ સાંજના સમયે મંજુલાના ફોનમાં રમેશનો ફોન અને વોટ્સએપ મેસેજ હતો અને બંને એકબીજા સાથે વાત કરી રહ્યા હતા ત્યારે આ ખબરની જાણ મંજુલાના પરિવારને થઇ અને દશેરાના દિવસે યુવતીના પરિવારજનોએ રમેશને રાત્રે મેઘરજના ઘેલી માતાના મંદિરે ગરબા જોવા મેસેજ કર્યો.
ત્યારે રમેશ અને તેના કાકાનો દીકરો બંને મોટરસાયકલ લઈને ગયા અને રમેશને યુવતીના ફોનથી મેસેજ આવ્યો બેડજ ગામ નજીક મળવા માટેનો. જેથી કાળું ખાંટ રમેશને બેડજ પાસે મૂકી આવ્યો. પણ થોડીવાર પછી યુવતીના પરિવારજનોએ કાળું ખાંટને રમેશનું બાઇક બગડ્યું છે એમ જણાવી બેડજ બોલાવ્યો અને બંનેને ઢોર માર માર્યો. તે બાદ બેભાન અવસ્થામાં બેડજની સીમમાં ફેંકી દીધા.
જો કે, સવારે બંનેના પરિવારજનો તેમની શોધખોળ કરી રહ્યા હતા ત્યારે એક બાઇક અને બે યુવકો બેડજની સિમમાં પડ્યા હોવાના સમાચાર મળ્યા. ત્યારથી લઇને 23 ડિસેમ્બર સુધી બંને અમદાવાદ સારવાર હેઠળ હતા. જ્યારે તબિયતમાં થોડો સુધારો જણાયો તો બંનેને ઘરે રહી આઉટડોર સારવાર લેવા જણાવાયુ. આ પછી તેઓ મુલોજ ખાતે ડોકટરની સલાહ મુજબ સારવાર લઈ રહ્યા હતા. ત્યારે પ્રેમીના પિતરાઈ ભાઈ કાળુંને થોડો હોશ આવતા સમગ્ર હકીકત સામે આવી.
