આજે દુનિયા ભલે ગમે તેટલી આધુનિક કેમ ના બની જાય, પરંતુ તેને પુસ્તકોનો સહારો તો લેવો જ પડે છે. દુનિયાભરમાં ઠેર ઠેર લાઈબ્રેરીઓ બનતી હોય છે અને તેમાં પણ ઘણા લોકો વાંચવા માટે જતા હોય છે, આજે ટેક્નોલોજી પણ વિકસી છે અને તેના કારણે આજે લાઈબ્રેરી પણ હાઈટેક બની ગઈ છે. ત્યારે હાલમાં દુનિયાની સૌથી મોંઘી લાઈબ્રેરીને ખુલ્લી મુકવામાં આવી છે.
ઉપરાષ્ટ્રપતિ, વડા પ્રધાન અને દુબઈના શાસક મહામહિમ શેખ મોહમ્મદ બિન રશીદ અલ મકતુમ AED1 બિલિયની “મોહમ્મદ બિન રાશિદ લાઇબ્રેરી”નું ઉદ્ઘાટન કર્યું. મોહમ્મદ બિન રશીદ લાઇબ્રેરી AED1 બિલિયન ($272.3 મિલિયન) એટલે કે 2151 કરોડ રૂપિયાથી વધુના રોકાણ સાથે બનાવવામાં આવી છે.
જે કદાચ વિશ્વની સૌથી મોંઘી લાઇબ્રેરી છે. જો કે આ અંગે હજુ સુધી આવો કોઈ દાવો કરવામાં આવ્યો નથી. પુસ્તકાલયનો ઉદ્દેશ્ય વ્યક્તિગત અને સામાજિક બંને સ્તરે સર્જનાત્મકતા, જ્ઞાન અને કળાના વિકાસને ટેકો આપતી વખતે વાંચનની સંસ્કૃતિ વિકસાવવાનો છે. પુસ્તકાલયનું નામ દુબઈના શાસક મોહમ્મદ બિન રશીદના નામ પરથી રાખવામાં આવ્યું છે.
અલ જદ્દાફ સ્થિત પુસ્તકાલયમાં 10 લાખથી વધુ પ્રિન્ટ અને ડિજિટલ પુસ્તકો છે. આ પુસ્તકાલયનું માળખું લાકડાના સ્ટેન્ડનું આકાર લે છે જે ‘રાહલ’ તરીકે ઓળખાય છે. આ પુસ્તકાલયનું કુલ કદ 54,000 ચોરસ મીટર છે. શેખ મોહમ્મદ બિન રશીદ લાઇબ્રેરી એ સાત માળની ઇમારત છે જેમાં નવ વિભાગો અને 10 લાખથી વધુ પ્રિન્ટ અને ડિજિટલ વોલ્યુમ છે.
જનરલ લાઈબ્રેરી, અમીરાત લાઈબ્રેરી, યંગ એડલ્ટ લાઈબ્રેરી, ચિલ્ડ્રન્સ લાઈબ્રેરી, મીડિયા એન્ડ આર્ટ લાઈબ્રેરી, ધ બિઝનેસ લાઈબ્રેરી, સ્પેશિયલ કલેક્શન લાઈબ્રેરી, મેપ એન્ડ એટલાસ લાઈબ્રેરી અને પીરીઓડીકલ લાઈબ્રેરી સહિત નવ વિભાગો છે. પુસ્તકાલય સત્તાવાર રીતે 16 જૂન 2022 ના રોજ જાહેર જનતા માટે ખુલ્લું મૂકવામાં આવ્યું છે.
ખલીજ ટાઈમ્સના અહેવાલ મુજબ, આ નવી હાઈટેક અને ડિજિટલ લાઈબ્રેરીમાં 75 હજાર વીડિયો, 5 હજાર હસ્તપ્રતો અને 35 હજાર અખબારની નકલો પણ વાંચવામાં આવશે. આ ઉપરાંત અહીં 325 વર્ષ જૂના પુસ્તકો પણ રાખવામાં આવ્યા છે.
આ પુસ્તકાલયમાં માત્ર ભૌતિક પુસ્તકો જ નહીં પરંતુ ડિજિટલ પુસ્તકો પણ છે. અહીં આવા પુસ્તકોનો વિશાળ સંગ્રહ છે. આ લાઈબ્રેરીમાં લોકોની મદદ માટે આર્ટિફિશિયલ ઈન્ટેલિજન્સનો પણ ઉપયોગ કરવામાં આવ્યો છે.એટલે કે અહીં આવનાર મુલાકાતીઓ રોબોટિક ગાઈડની મદદથી પોતાના મનપસંદ પુસ્તકોની પસંદગી કરી શકશે. આ માટે અહીં AI કિઓસ્ક પણ લગાવવામાં આવ્યા છે.
મુલાકાતીઓ દરેક પુસ્તકો મેળવી શકે તે માટે લાયબ્રેરી વિશાળ બનાવવામાં આવી છે, તેની પણ વ્યવસ્થા કરવામાં આવી છે. બહુમાળી બુક શેલ્ફ પર પુસ્તકો સરળતાથી મળી રહે તે માટે બુકશેલ્ફને ઓટોમેટિક સિસ્ટમ સાથે જોડવામાં આવ્યું છે. એટલે કે મુલાકાતી ઉપર શેલ્ફમાં મુકેલ પુસ્તકને બટન દ્વારા નીચેની શેલ્ફમાં લાવી શકે છે.
આ પુસ્તકાલયમાં બાળકો માટેના પુસ્તકો પણ ઉપલબ્ધ રહેશે. આ ઉપરાંત અહીં દર 3 મહિને દુબઈના ફોટો સાથે સંબંધિત એક પ્રદર્શન પણ યોજાશે. જેના કારણે અહીં આવતા લોકો દુબઈના દરેક વિસ્તારની સુંદરતાથી પરિચિત થઈ શકશે.
