કપિલ શર્માની સાથે સાથે રાજપાલ યાદવ, સુગંધા મિશ્રા, રેમો ડિસોઝાને પણ મળી જાનથી મારી નાખવાની ધમકી- પાકિસ્તાનથી આવ્યા ઇ-મેઇલ
મનોરંજન ઉદ્યોગના ત્રણ મોટા કલાકારોને જાનથી મારી નાખવાની ધમકી મળી છે. બોલિવૂડ અભિનેતા રાજપાલ યાદવ, કોમેડિયન-સિંગર સુગંધા મિશ્રા અને ડાંસર-પ્રોડ્યુસર રેમો ડિસોઝાને પાકિસ્તાનથી ધમકીભર્યો મેઇલ મળ્યો છે. પ્રાપ્ત માહિતી અનુસાર, મનોરંજન ઉદ્યોગના ત્રણ નામો- રેમો ડિસોઝા, સુગંધા મિશ્રા અને રાજપાલ યાદવને અલગ અલગ દિવસોમાં ઈમેલ દ્વારા ધમકીઓ મળી છે. રાજપાલ યાદવની ફરિયાદ પર મુંબઈ પોલીસે FIR નોંધી છે.
આ કેસમાં વધુ તપાસ ચાલી રહી છે. કોમેડિયન કપિલ શર્માને પણ આવો જ ધમકીભર્યો મેઇલ મળ્યો છે, જેના સંદર્ભમાં અંબોલી પોલીસ સ્ટેશનમાં ફરિયાદ નોંધાવવામાં આવી છે. ધમકી આપનાર વ્યક્તિનું નામ ઇ-મેઇલમાં વિષ્ણુ હોવાનું જાણવા મળ્યુ છે. મેઇલમાં લખ્યું છે, ‘અમે તમારી તાજેતરની ક્રિયાઓ પર નજર રાખી રહ્યા છીએ. અમારું માનવું છે કે એક સંવેદનશીલ બાબત તમારા ધ્યાન પર લાવવી મહત્વપૂર્ણ છે.
આ કોઈ પબ્લિસિટી સ્ટંટ નથી કે તમને હેરાન કરવાનો પ્રયાસ નથી. અમે તમને આ સંદેશને ખૂબ જ ગંભીરતાથી લેવા અને ગુપ્તતા જાળવવા વિનંતી કરીએ છીએ. મેલમાં આગળ કહેવામાં આવ્યું છે કે જો મેઇલ કરનારની સૂચનાઓનું પાલન કરવામાં નહીં આવે, તો રાજપાલ યાદવ, સુગંધા મિશ્રા અને રેમો ડિસોઝાને ખતરનાક પરિણામોનો સામનો કરવો પડશે.
મેઇલ મોકલનારે સ્ટાર્સ પાસેથી 8 કલાકની અંદર જવાબ પણ માંગ્યો છે. મેઇલમાં લખ્યું છે- ‘આમ કરવામાં નિષ્ફળતાના ખતરનાક પરિણામો આવી શકે છે જે તમારા વ્યાવસાયિક અને વ્યક્તિગત જીવનને અસર કરી શકે છે.’ અમને આગામી 8 કલાકમાં તમારા તરફથી તાત્કાલિક પ્રતિસાદની અપેક્ષા છે. જો અમને જવાબ નહીં મળે, તો અમે માની લઈશું કે તમે આ બાબતને ગંભીરતાથી લઈ રહ્યા નથી અને જરૂરી પગલાં લઈશું. વિષ્ણુ.
