પૃથ્વી શોએ રણજી ટ્રોફીમાં પોતાના બેટથી રનનો વરસાદ કરી દીધો. તેણે અસમ વિરૂદ્ધ એક મુકાબલામાં 383 બોલોનો સામનો કરતા 49 ચોક્કા અને 4 છક્કાની મદદથી 379 રનની તોફાની પારી રમી. આ દરમિયાન તેનો સ્ટ્રાઇક રેટ 98.96નો રહ્યો, જે દર્શાવે છે કે આ નાના કદનો ખેલાડી કેટલો વિસ્ફોટક અંદાજમાં રમ્યો. એવું નથી કે પૃથ્વી પહેલીવાર આવી રીતે રમ્યો છે. પહેલા પણ તેણ આવી રીતની બેટિંગ કરી છે, પણ સિલેકટર્સ અને ટીમ ઇન્ડિયાનું મેનેજમેન્ટ તેને નજરઅંદાજ કરતુ રહ્યુ.
એ વાત સમજથી પરે છે કે એક યુવા ટેલેન્ટ જોરદાર પ્રદર્શન છત્તાં ટીમ ઇન્ડિયામાં કેમ નથી, જ્યારે એવા ઘણા ખેલાડીઓ છે જેના પર લાંબા સમયથી સવાલ ઉઠી રહ્યા છે. T20 વર્લ્ડ કપ 2021માં ખરાબ પ્રદર્શનને કારણે હાર્દિક પંડ્યાને ટીમમાંથી બહાર કરી દેવામાં આવ્યો હતો અને IPLમાં જોરદાર પ્રદર્શન સાથે પરત ફર્યો હતો. કેએલ રાહુલ લાંબા સમયથી પ્રદર્શન કરી શક્યો નથી, પરંતુ તેને પ્લેઈંગ ઈલેવનમાં જગ્યા મળી રહી છે. વિરાટ કોહલી પણ પ્રદર્શન કરવામાં નિષ્ફળ રહ્યો હતો પરંતુ તેને ટીમ મેનેજમેન્ટ, કેપ્ટન અને કોચ દ્વારા ટેકો મળ્યો હતો.
ચેતેશ્વર પુજારા અને અજિંક્ય રહાણે સાથે પણ કંઈક આવું જ થયું છે. આમાં પણ કંઈ ખોટું નથી. ખરાબ દિવસોમાં દરેકને સાથ મળવો જોઈએ, પરંતુ પૃથ્વી શૉનું નામ આવતા જ અંગત જીવન વિશે ફરિયાદો શરૂ થઈ જાય છે, જે સમજની બહાર છે. પૃથ્વી શૉ જે કવર ડ્રાઈવથી લઈને પુલ શોટ સુધીના ક્રિકેટિંગ શોટ્સ ઉડાવવામાં માહેર છે, ન તો એવા કોઈ સમાચાર છે, જે કોઈ ખેલાડી વિશે ન હોવા જોઈએ, ન તો તેની સામે કોઈ આરોપ છે. સૌથી નવાઈની વાત એ છે કે જો પૃથ્વી શૉ ડોમેસ્ટિક ક્રિકેટ રમવા માટે ફિટ છે તો તે ઈન્ટરનેશનલ કેમ નથી રમી શકતો ?
જો આંતરરાષ્ટ્રીય ટીમમાં પસંદગીનો માપદંડ સારો દેખાવ અને ફિટનેસ હોય તો પૃથ્વીમાં આવી કોઈ ઉણપ નથી. દરેક જણ સંમત છે કે પ્રદર્શન સારું છે. જો વ્યક્તિગત જીવન ટીમની પસંદગી માટે મહત્વનો માપદંડ હોય તો તે દરેક માટે હોવો જોઈએ. મોહમ્મદ શમી પર તેની પત્ની હસીન જહાંએ કેટલા આરોપ લગાવ્યા છે, પરંતુ જુઓ આ ફાસ્ટ બોલર કોર્ટમાં ચાલી રહેલા કેસ છતાં ટીમમાં રમી રહ્યો છે. ક્રિકેટરના અંગત જીવનમાં શું થઈ રહ્યું છે તેને રમત સાથે કોઇ લેવાદેવા ન હોવો જોઇએ.
એવું હોત તો ટેસ્ટ ઈતિહાસના મહાન બોલર શેન વોર્ન ક્યારેય ઓસ્ટ્રેલિયન ટીમમાં સ્થાન મેળવી શક્યા ન હોત. ભૂતપૂર્વ કેપ્ટન અને ભારતીય ક્રિકેટ કંટ્રોલ બોર્ડના ભૂતપૂર્વ પ્રમુખ સૌરવ ગાંગુલી પોતે દિલ્હી કેપિટલ્સ માટે ક્રિકેટના ડિરેક્ટર છે. પૃથ્વી શોનો રિપોર્ટ તેમના કરતા સારો કોની પાસે હશે? તે પહેલા પણ દિલ્હી સાથે સંકળાયેલો હતો અને બધું જ જાણે છે, પરંતુ તેમ છતાં તેનું મૌન આશ્ચર્યજનક છે. સવાલ એ પણ છે કે પૃથ્વીના અંગત જીવનનો કોન્ટ્રાક્ટર કોણ છે, જે સિલેક્શન નથી થવા દેતો ?
જણાવી દઇએ કે વર્ષ 2018માં ટીમ ઈન્ડિયાના ભૂતપૂર્વ કોચ રવિ શાસ્ત્રીએ પૃથ્વી શોને સચિન, સેહવાગ અને લારાનું સંયોજન ગણાવ્યું હતું. ડેબ્યૂ મેચમાં સદી ફટકારવાની સાથે પૃથ્વીએ બે મેચમાં 237 રન ફટકાર્યા હતા. તેણે કહ્યું હતું કે તેનો જન્મ માત્ર ક્રિકેટ માટે થયો હતો. તે 8 વર્ષથી મુંબઈના મેદાનમાં હંગામો મચાવી રહ્યો છે. તેને જોઈને જ રાહત મળે છે. તેની બેટિંગમાં થોડો સચિન છે, થોડો વીરુ છે અને જ્યારે તે ચાલે છે ત્યારે તેનામાં થોડો લારા પણ જોવા મળે છે,
પરંતુ સમય એવો બદલાઈ ગયો છે કે આ યુવા બેટિંગની તોપ આજે ટીમ ઈન્ડિયાની બહાર છે અને તમામ રેકોર્ડ તોડવા છતાં પસંદગીકારો ધ્યાન નથી લઈ રહ્યા. કદાચ આ રેકોર્ડ ઇનિંગ્સ તેની આંખો ખોલશે. પૃથ્વી શોની ઉંમર નાની છે, કદ નાનું છે, પણ સપના મોટા છે. તેણે સપનાને પાંખો આપી અને તે સફળતાની સીડી ચઢતો ગયો. લગભગ ચાર વર્ષની ઉંમરે તેણે તેની માતા ગુમાવી દીધી અને તે બાદ તેને પિતાએ સંભાળ્યા અને ક્રિકેટ માટે પ્રેરિત કર્યો.
પૃથ્વી શોના પિતાએ બિઝનેસ પણ દીકરાના ક્રિકેટ પાછળ છોડી દીધો કારણ કે તેમને વિશ્વાસ હતો કે એક દિવસ દીકરો તેમનું નામ રોશન કરશે અને આવું થયુ પણ. નાની ઉંમરમાં ઇન્ટરનેશનલ ક્રિકેટ રમી ચૂકેલા પૃથ્વી શોએ વર્ષ 2022માં મુંબઇમાં એક મોંઘુ ઘર ખરીદ્યુ હતુ. આ પહેલા તેણે મોંઘી કાર પણ ખરીદી હતી. પોતાનું ઘર ખરીદવું એ બધાનું સપનું હોય છે, આ સપનાને ધાકડ બેટ્સમેન પૃથ્વી શોએ પણ સાકાર કર્યુ. રીપોર્ટ્સ અનુસાર, પૃથ્વી શોએ મુંબઇના બાંદ્રા રિક્લેમેશનમાં એક પ્રીમિયમ રેજિડેન્સિયલ એપાર્ટમેન્ટ સાડા 10 કરોડમાં ખરીદ્યો હતો.
