Family Man 3 ફેમ એક્ટરની થઇ હત્યા ? મિત્રો સાથે ગયો હતો ફરવા, ઝરણા પાસે મળી લાશ- પોસ્ટમોર્ટમ રીપોર્ટમાં થયો મોટો ખુલાસો
મનોજ બાજપેયી સ્ટારર સીરીઝ ‘ફેમિલી મેન 3’માં જોવા મળેલ અભિનેતા રોહિત બાસફોરનો મૃતદેહ શંકાસ્પદ સંજોગોમાં મળી આવ્યો છે. 27 એપ્રિલના રોજ રોહિત તેના મિત્રો સાથે આસામ પિકનિક પર ગયો હતો. જોકે, પાછળથી તેનો મૃતદેહ ગરભંગા જંગલમાં એક ધોધ પાસે મળી આવ્યો. તેના શરીર પર ઘણી જગ્યાએ ઈજાના નિશાન જોવા મળ્યા હતા. સિને વર્કર્સ એસોસિએશને આ મામલે કડક કાર્યવાહીની માંગ કરી છે.
રોહિત બસફોરા આસામનો રહેવાસી છે, જો કે તે કામ માટે મુંબઈમાં રહેતો હતો. થોડા સમય પહેલા તે રજાઓ માણવા ઘરે ગયો હતો. રોહિતના પરિવારે પોલીસને જણાવ્યું છે કે તે રવિવારે એટલે કે 27 એપ્રિલે બપોરે લગભગ 12:30 વાગ્યે તેના મિત્રો સાથે ટ્રિપ પર ગયો હતો. સાંજે જ્યારે પરિવારના સભ્યોએ તેને ફોન કર્યો ત્યારે તેનો ફોન કામ કરતો ન હતો. સાંજે, રોહિતના એક મિત્રએ તેના પરિવારને તેના મૃત્યુ વિશે જાણ કરી.
પરિવારને જાણ કરનાર છોકરાએ કહ્યું કે તે ધોધ પરથી પડી ગયો હતો. પરિવારે તાત્કાલિક SDRF (સ્ટેટ ડિઝાસ્ટર રિસ્પોન્સ ફોર્સ) ને જાણ કરી, ત્યારબાદ સાંજે 6.30 વાગ્યાની આસપાસ તેનો મૃતદેહ જંગલમાંથી મળી આવ્યો અને તેને હોસ્પિટલ લઈ જવામાં આવ્યો. રોહિત બાસ્ફોરના પરિવારે તેના મિત્રો પર હત્યાનો આરોપ લગાવ્યો છે.
રોહિતની માતાએ પોલીસને આપેલા નિવેદનમાં જણાવ્યું હતું કે થોડા સમય પહેલા તેનો તેના મિત્રો સાથે પાર્કિંગ જેવા નાના મુદ્દા પર ઝઘડો થયો હતો, ત્યારબાદ તેના ત્રણ મિત્રોએ તેને મારી નાખવાની ધમકી આપી હતી. રોહિતનો મૃતદેહ મળ્યા બાદ તેની સાથે ટ્રિપ પર ગયેલા તેના ત્રણ મિત્રો ફરાર થઈ ગયા છે. આ લોકોના નામ રણજીત બાસફોર, અશોક બાસફોર અને ધરમ બાસફોર જણાવવામાં આવી રહ્યા છે. પરિવારનો આરોપ છે કે આ ત્રણ મિત્રો સાથે જીમ ટ્રેનર અમરદીપ પણ ત્યાં હતો જે રવિવારે રોહિતને ફરવા બોલાવવા આવ્યો હતો.
રિપોર્ટ મુજબ, રોહિત બાસ્ફોરનો પોસ્ટમોર્ટમ રિપોર્ટ સોમવારે જાહેર કરવામાં આવ્યો હતો. રોહિતને ખૂબ જ ખરાબ રીતે માર મારવામાં આવ્યો હોવાનું સામે આવ્યુ છે. તેના ચહેરા, માથા અને શરીરના વિવિધ ભાગો પર ઈજાના અનેક નિશાન છે. રોહિત બાસફોરના મૃત્યુના સમાચાર પ્રકાશમાં આવ્યા બાદ, ઓલ ઈન્ડિયા સિને વર્કર્સ એસોસિએશને આસામના મુખ્યમંત્રીને પત્ર લખીને તપાસની માંગ કરી છે.
