મુખ્યમંત્રી વિજય રૂપાણીના દીકરાના મે મહિનામાં લગ્ન હોવાને કારણે સરકારે લોકડાઉન કર્યું નથી. આ મેસેજ ખૂબ જ વાયરલ થતા અને સમગ્ર રાજ્યમાં ફરી વળતાં આખરે આ મામલે મુખ્યમંત્રીને સ્પષ્ટતા કરવાની ફરજ પડી હતી.
છેલ્લા કેટલાક સમયથી સોશિયલ મીડિયામાં મુખ્યમંત્રી રૂપાણીના દીકરાના લગ્નને લઈને ચર્ચા ચાલી રહી છે. કોરોનાનુ સંક્રમણ બેકાબૂ બનતા હાઇકોર્ટની ટકોર બાદ લોકોને હતું કે લોકડાઉન લાગશે, પણ રુપાણી સરકારે 20 શહેરોમાં રાત્રિ કર્ફ્યૂ જ લાગુ કરવાની જાહેરાત કરી હતી. ત્યાર બાદ સોશિયલ મીડિયા પર મુખ્યમંત્રીની મજાક થઇ રહી હતી કે કોઇ લોકડાઉન નહીં લાગે મારા છોકરાના લગ્ન છે. જો કે સોશિયલ મીડિયામાં વાયરલ થયેલા ન્યૂઝ ફેક છે.
CM રૂપાણીએ સોશિયલ મીડિયામાં ચાલતા તેમના પુત્ર અંગેના સમાચારને ફેક ગણાવ્યા છે. ખુદ મુખ્યમંત્રીએ પોતાના સોશિયલ મીડિયા પર એક પોસ્ટ કરી છે. જેમાં પોતાના પુત્રના લગ્ન અંગે ચાલતી ચર્ચાને અફવા ગણાવી છે અને તમામ માહિતી પાયાવિહોણી હોવાનું જણાવ્યું છે. મુખ્યમંત્રીએ કહ્યું કે, આ પ્રકારનું કોઈ આયોજન ન તો પહેલાથી નિર્ધાર હતું. ના મે મહિનામાં લગ્નનું કોઈ આયોજન છે. સાથે સ્પષ્ટતા પણ કરી કે, અત્યારે અમારુ ધ્યાન માત્ર કોરોનાની સ્થિતિ પર છે.
મારા દીકરાના લગ્ન મે મહિનામાં હોવાની વાતો પાયા વિહોણી છે. આ પ્રકારનું કોઈ જ આયોજન ના પહેલેથી નિર્ધારિત હતું કે ના મે મહિનામાં કોઈ આયોજન છે. આ માત્ર સોશિયલ મીડિયામાં વહેતા થયેલા Fake news છે. અત્યારે મારું અને મારી સરકારનું એક માત્ર આયોજન ગુજરાતમાં કોરોનાના સંક્રમણને અટકાવવાનું છે
— Vijay Rupani (@vijayrupanibjp) April 7, 2021
