આપણો દેશ ચાહકોથી ભરેલો પડ્યો છે, બોલીવુડના સિતારાઓ અને ક્રિકેટરોના ચાહકો તમને આખી દુનિયામાં જોવા મળશે, પરંતુ ભારતના ચાહકોમાં જે પાગલપન છે તે કદાચ તમને બીજે ક્યાંય જોવા નહિ મળે. સેલેબ્સના જન્મ દિવસ ઉપર કે કોઈ ખાસ પ્રસંગે તેમના ચાહકો તેમના માટે કંઈક અવનવું કરતા જોવા મળતા હોય છે, ત્યારે હાલમાં જ IPL-2022નો ખિતાબ પોતાને નામ કરનારા ગુજરાત ટાઇટન્સની ટીમના કપ્તાન હાર્દિક પંડ્યાના ચાહકે જે કર્યું તેની કોઈ કલ્પના પણ ના કરી શકે.
ટીમની જીતના હીરો બનેલા હાર્દિક પંડ્યાના ચાહકો આ જીતની ખૂબ જ ઉજવણી કરી રહ્યા છે. બિહારમાં પણ આવો જ એક જબરા ફેન સામે આવ્યો છે. બિહારના નવાદામાં રહેતો રવિ હાર્દિક પંડ્યાનો એટલો ચાહક છે કે તેણે પોતાના નામમાં પંડ્યા સરનેમ ઉમેર્યું છે અને પોતાનું નામ બદલીને રવિ પંડ્યા રાખ્યું છે.
રવિએ પોતાના ફેવરિટ ખેલાડી હાર્દિક પંડ્યા પ્રત્યેનો પ્રેમ ખૂબ જ સારી રીતે વ્યક્ત કર્યો છે. રવિ એક સલૂન ચલાવે છે અને ક્રિકેટનો પણ મોટો ફેન છે. રવિએ પોતાના સલૂનનું નામ પણ પંડ્યા જેન્ટ્સ પાર્લર રાખ્યું છે. તેમજ ગુજરાત ટાઇટન્સની જીત બાદ સલૂન એક દિવસ માટે ફ્રી કરવામાં આવ્યું હતું.
ગુજરાત ટાઇટન્સના ફાઇનલ જીતવા ઉપર રવિએ સલૂનમાં આવેલા ગ્રાહકો માટે ફ્રી હેર કટિંગ અને શેવિંગ કર્યું. રવિએ સલૂનની બહાર પોસ્ટર લગાવીને અનોખી રીતે જીતની ઉજવણી કરી. નવાદાના નગર પોલીસ સ્ટેશન વિસ્તારના અકૌના રોડ પર રવિની દુકાન આવેલી છે. ક્રિકેટ પ્રત્યેનો તેમનો જુસ્સો અને હાર્દિક પંડ્યા આખા શહેરમાં ચર્ચાનો વિષય બન્યો છે.
રવિએ ખુશી વ્યક્ત કરી કે ગુજરાત ટાઇટન્સ તેની ફેવરિટ ટીમ છે અને હાર્દિક તેનો ફેવરિટ પ્લેયર છે. રવિએ સોશિયલ મીડિયા પર સલૂનમાં ફ્રી સર્વિસની જાહેરાત કરી હતી. આ પછી સવારથી જ લોકો તેના પાર્લર પર આવવા લાગ્યા. રવિએ કહ્યું કે હાર્દિક પંડ્યાને મળવાની તેની હાર્દિક ઈચ્છા છે.
