મા ઈન્ડોનેશિયન, પિતા ચાઈનીઝ… વર્લ્ડકપની ફાઇનલમાં ઘુસી જનારા પેલેસ્ટાઇન સમર્થકની આખી કુંડળી જુઓ
Who is Wen Johnson : ભારત અને ઓસ્ટ્રેલિયા વચ્ચે રવિવારના રોજ અમદાવાદના નરેન્દ્ર મોદી સ્ટેડિયમમાં યોજાયેલી મેચ દરમિયાનના ઘણા બધા વીડિયો સોશિયલ મીડિયામાં વાયરલ થતા જોવા મળે છે. મેચ દરમિયાન ઘણી એવી એવી ઘટનાઓ પણ સામે આવી જેને દેશ અને દુનિયામાં પણ ચર્ચા જગાવી હતી. આવી જ એક ઘટના હતી ઓસ્ટ્રેલિયન યુવકનું સુરક્ષા કર્મીઓને ચકમો આપીને મેદાનમાં ઘૂસીને વિરાટ કોહલીને ગળે મળવાનો પ્રયત્ન કરવો. જો કે સિક્યુરિટી ગાર્ડે તેને પકડી સ્થાનિક પોલીસના હવાલે પણ કરી દીધો.
પોલીસે જણાવી કુંડળી :
યુવકની ધરપકડ બાદ હવે પોલીસે આ આરોપીની સંપૂર્ણ કુંડળી જાણી લીધી છે. આ કોઈ નવો આરોપી નથી પરંતુ આ પહેલા પણ આવા કૃત્ય કરી ચૂક્યો છે. ઘણા પ્રસંગોએ આના પર ભારે દંડ ફટકારવામાં આવ્યો છે. પરંતુ તેમ છતાં તે ન તો તેના કાર્યોથી બચી રહ્યો છે અને ન તો તેને આમ કરવામાં કોઈ સંકોચ અનુભવાય છે. હવે આ કેસની તપાસ કરી રહેલા ગુજરાત JCP નીરજ કુમારે આ આરોપીની સંપૂર્ણ કુંડળી જણાવી છે.
અગાઉ પણ કરી ચુક્યો છે આવી હરકતો :
આ આરોપીનું નામ વેન જોન્સન છે અને તે મૂળ ઓસ્ટ્રેલિયાનો છે. જારી કરાયેલા નિવેદનમાં કહેવામાં આવ્યું છે કે ગઈકાલની મેચ દરમિયાન એક વ્યક્તિ સ્ટેડિયમમાં ઘૂસ્યો હતો. તેનું નામ વેન જોન્સન છે અને તે ઓસ્ટ્રેલિયાનો છે. તેની માતા ઈન્ડોનેશિયાની છે અને પિતા ચીની છે. જે પણ પૈસા કમાય છે, આ વ્યક્તિ તેનો ઉપયોગ મેચ જોવા માટે કરે છે. તેણે 2020માં રગ્બી મેચ દરમિયાન પણ તે જ રીતે પ્રવેશ કર્યો હતો, જ્યારે તેને US$200 થી વધુનો દંડ ફટકારવામાં આવ્યો હતો.
ઘણીવાર ફટકારવામાં આવ્યો છે દંડ :
2023માં પણ તેણે મહિલા મેચમાં ગેરકાયદેસર એન્ટ્રી કરી હતી અને તેને $500નો દંડ ફટકારવામાં આવ્યો હતો. એવું પણ જાણવા મળ્યું છે કે ફાઇનલ મેચના દિવસે તે ગેટ નંબર એકથી પ્રવેશ્યો હતો અને તેણે વાદળી રંગની જર્સી પણ પહેરી હતી. તે બતાવવા માંગતો હતો કે તે ભારતનો સમર્થક છે. ત્યાર બાદ તેણે 6.5 ફૂટ ઉંચી વાડ પરથી કૂદકો માર્યો હતો. હાલ તો ક્રાઈમ બ્રાન્ચ આ સમગ્ર મામલે તપાસ કરી રહી છે અને એજન્સીએ તેના એક દિવસના રિમાન્ડ પણ મેળવ્યા છે.
