Repo Rate Unchanged : રિઝર્વ બેંક ઓફ ઈન્ડિયા (RBI)ની મોનેટરી પોલિસી કમિટી (MPC)ની બેઠકના પરિણામો જાહેર કરવામાં આવ્યા છે. 8 ઓગસ્ટના રોજ શરૂ થયેલી છ સભ્યોની એમપીસીની બેઠકમાં લેવાયેલા નિર્ણયોની માહિતી આપતા ગવર્નર શક્તિકાંત દાસે જણાવ્યું હતું કે આ વખતે પણ પોલિસી રેટ એટલે કે રેપો રેટને યથાવત રાખવામાં આવ્યો છે. એટલે કે રેપો રેટ 6.5 ટકા પર રહેશે અને હોમ લોન અથવા ઓટો લોન લેનારાઓ પર EMI બોજ વધશે નહીં.
લોન લેનારાઓ પર EMI બોજ વધશે નહીં
રેપો રેટમાં કોઈ ફેરફાર નહીં કરવાની જાહેરાત કરવાની સાથે RBI ગવર્નર શક્તિકાંત દાસે એલાન કર્યુ કે ભારત સાચા માર્ગ પર આગળ વધી રહ્યું છે અને આવનારા સમયમાં તે વિશ્વનું ગ્રોથ એન્જિન બનશે. આપણે વિશ્વની 5મી સૌથી મોટી અર્થવ્યવસ્થા છીએ અને આપણી અર્થવ્યવસ્થામાં સતત વૃદ્ધિ થઈ રહી છે. વૈશ્વિક અર્થતંત્રમાં થઈ રહેલા ફેરફારોનો લાભ લેવા માટે ભારત હાલમાં શ્રેષ્ઠ સ્થિતિમાં છે. ભારતીય અર્થતંત્ર વૈશ્વિક વૃદ્ધિમાં લગભગ 15 ટકા યોગદાન આપી રહ્યું છે.
ફેબ્રુઆરીથી રેપો રેટમાં કોઈ ફેરફાર થયો નથી
દેશમાં ફુગાવાના ઊંચા સ્તરે પહોંચ્યા પછી, રિઝર્વ બેંકે મે 2022થી સતત નવ વખત રેપો રેટમાં વધારો કર્યો હતો, આ સમયગાળા દરમિયાન આ દરમાં 250 બેસિસ પોઈન્ટનો વધારો કરવામાં આવ્યો હતો. જો કે, મોંઘવારી પર નિયંત્રણ સાથે, કેન્દ્રીય બેંકે તેના વધારા પર બ્રેક લગાવી દીધી છે અને ફેબ્રુઆરી 2023થી તેમાં કોઈ ફેરફાર કરવામાં આવ્યો નથી. રેપો રેટ સ્થિર રાખવા સાથે, આરબીઆઈએ એમએસએફ, બેંક રેટ 6.75 ટકા, જ્યારે એસડીએફ રેટ 6.25 ટકા પર રાખવાનો નિર્ણય કર્યો છે.
આરબીઆઈએ નાણાકીય વર્ષ 2024માં જીડીપી વૃદ્ધિ 6.5 ટકા રહેવાનો અંદાજ મૂક્યો છે, જ્યારે આગામી વર્ષે 2025ના એપ્રિલ-જૂન ક્વાર્ટરમાં જીડીપી વૃદ્ધિ 6.6 ટકા રહેવાનો અંદાજ છે. શક્તિકાંત દાસે કહ્યું કે નાણાકીય વર્ષ 24 ના પ્રથમ ક્વાર્ટરમાં વાસ્તવિક જીડીપી વૃદ્ધિ 8 ટકા રહી શકે છે.
ટામેટાના ભાવે ચિંતા વધારી
MPC મીટિંગના પરિણામોની જાહેરાત કરતા, RBI ગવર્નર શક્તિકાંત દાસે દેશમાં ટમેટાના ભાવ વધારાનો ઉલ્લેખ કર્યો. તેમણે કહ્યું કે ટામેટાં સહિત અન્ય શાકભાજીના ભાવમાં વધારાથી સામાન્ય લોકોની સાથે સાથે નીતિ નિર્માતાઓની ચિંતા પણ વધી છે. તેમણે કહ્યું કે જુલાઈ-ઓગસ્ટ મહિનામાં મોંઘવારી વધવાની ધારણા છે. શાકભાજીના ભાવ વધવાને કારણે મોંઘવારી વધવાની શક્યતા છે. રિઝર્વ બેંકે બિઝનેસ નાણાકીય વર્ષ 2024 માટે રિટેલ ફુગાવાનો દર 5.4 ટકા રહેવાનો અંદાજ મૂક્યો છે. જ્યારે, અગાઉ આ અંદાજ 5.1 ટકા હતો.
