ક્રિકેટ જગતમાંથી આવ્યા દુઃખદ સમાચાર! IND vs PAKની મેચ જોવા માટે ગયેલા MCAના અધ્યક્ષને આવ્યો કાર્ડિયેક એરેસ્ટ, થયું મોત
MCA President Amol Kale Dies : T20 વર્લ્ડ કપ 2024માં રવિવારે 9 જૂનના રોજ ભારતીય અને પાકિસ્તાન ટીમ વચ્ચે ખૂબ જ રોમાંચક મેચ રમાઈ હતી. આ મેચમાં રોહિત શર્માની કેપ્ટન્સીમાં ભારતીય ટીમે 6 રનથી મજબૂત વિજય નોંધાવ્યો હતો. પરંતુ આ મેચ દરમિયાન ભારતીય ક્રિકેટ માટે એક ખરાબ સમાચાર પણ સામે આવ્યા છે. મુંબઈ ક્રિકેટ એસોસિએશન (MCA)ના પ્રમુખ અમોલ કાલેનું કાર્ડિયાક અરેસ્ટને કારણે નિધન થયું છે. તે ભારત અને પાકિસ્તાન વચ્ચે T20 વર્લ્ડ કપ 2024ની મેચ જોવા ન્યૂયોર્ક પહોંચ્યો હતો.
અમોલ 47 વર્ષના હતા. ન્યૂયોર્કના સ્ટેડિયમની તેમની તસવીર પણ સામે આવી હતી. તેમણે રવિવારે મુંબઈ ક્રિકેટ એસોસિએશનના સેક્રેટરી અજિંક્ય નાઈક અને એપેક્સ કાઉન્સિલના સભ્ય સૂરજ સામત સાથે મેચ જોઈ હતી. જોકે, મેચ બાદ તેમની તબિયત બગડી હતી અને તેમનું મોત થયું હતું. અમોલ કાલે ઓક્ટોબર 2022 માં નજીકની હરીફાઈમાં સંદીપ પાટીલને હરાવીને એમસીએ પ્રમુખ તરીકે ચૂંટાયા હતા. તેમણે આવનારી સિઝનથી મુંબઈના સિનિયર પુરુષોની મેચ ફી બમણી કરવાના MCAના નિર્ણયમાં મહત્ત્વની ભૂમિકા ભજવી હતી.
આટલું જ નહીં, ગયા વર્ષે અમોલના નેતૃત્વમાં મુંબઈ ક્રિકેટ એસોસિએશને ODI વર્લ્ડ કપ 2023ની મેચોનું સફળતાપૂર્વક આયોજન કર્યું હતું. નાગપુરનો રહેવાસી અમોલ કાલે એક દાયકા કરતાં વધુ સમયથી મુંબઈમાં રહેતા હતા. તેઓ મહારાષ્ટ્રના નાયબ મુખ્ય પ્રધાન દેવેન્દ્ર ફડણવીસના નજીકના સાથી ગણાતા હતા. એમસીએનું ટોચનું પદ સંભાળવા ઉપરાંત, અમોલ કાલે ઈન્ડિયન સ્ટ્રીટ પ્રીમિયર લીગના સહ-પ્રમોટર પણ હતા. તે ટેનિસ-બોલ ફ્રેન્ચાઈઝી ક્રિકેટ લીગ છે.
તેમના નેતૃત્વમાં મુંબઈને સ્થાનિક ક્રિકેટમાં પણ મોટી સફળતા મળી હતી. મુંબઈએ તાજેતરમાં સમાપ્ત થયેલી 2023-24 સિઝનમાં રણજી ટ્રોફી જીતી હતી. મુંબઈ ક્રિકેટ એસોસિએશનના ઉપાધ્યક્ષ સાંકેય નાઈકને આ ક્રિકેટ એસોસિએશનની વચગાળાની જવાબદારી સોંપવામાં આવી શકે છે.
