એવું કહેવાય છે કે આપણને હંમેશા બીજાની જીંદગી સુખદ લાગે છે, ફિલ્મો જોયા પછી આપણને બધાને લાગે છે કે સેલિબ્રિટીઓનું જીવન કેટલું વૈભવી હશે, પણ દરેક તસવીર પાછળનું સત્ય કંઈક બીજું જ હોય છે. અહીંની દુનિયા દૂરથી ચમકદાર અને ગ્લેમરથી ભરેલી દેખાય છે, પરંતુ નજીકથી તે એકલતા અને પીડાથી ભરેલી હોય છે. જ્યારે આ દર્દ હદથી વધી જાય છે, ત્યારે સ્ટાર્સ જીવનને ભૂલીને મૃત્યુને ભેટી લેવાનું શ્રેષ્ઠ માને છે. ત્યારે આ યાદી એટલી લાંબી છે કે તમે પણ વિચારવા પર મજબૂર થઈ જશો.
પ્રત્યુષા, આ નામ લેતા જ તમને બાલિકા વધુની મોટી આનંદીનો ચહેરો યાદ આવ્યો હશે, જેણે પોતાના ઘરે ફાંસી લગાવી આત્મહત્યા કરી લીધી હતી, પરંતુ આજે અમે જે પ્રત્યુષાની વાત કરી રહ્યા છીએ તે ટીવી એક્ટ્રેસ નહિ સાઉથની જાણીતી એક્ટ્રેસ હતી. પ્રત્યુષાની કારકિર્દી ઝડપથી આગળ વધી રહી હતી અને તે તેનાથી ખૂબ જ ખુશ પણ હતી. પણ તેના અંગત જીવનમાં તે પ્રેમ માટે ઝંખતી હતી. તે સિદ્ધાર્થ રેડ્ડી નામના છોકરાને પ્રેમ કરતી હતી અને તેની સાથે લગ્ન કરવા માંગતી હતી, પરંતુ સિદ્ધાર્થના પરિવારને આ સંબંધ મંજૂર ન હતો અને આખરે પ્રત્યુષાએ માત્ર 20 વર્ષની ઉંમરે આત્મહત્યા કરી લીધી.
પ્રત્યુષા સિદ્ધાર્થ સાથે રિલેશનશિપમાં હતી પરંતુ 23 ફેબ્રુઆરી 2002ના રોજ કંઈક એવું બન્યું જેની કોઈએ કલ્પના પણ નહોતી કરી. મીડિયા રિપોર્ટ્સ અનુસાર, સિદ્ધાર્થ પ્રત્યુષાને બ્યુટી પાર્લરમાં મળ્યો હતો અને પછી તેને તેની કારમાં ક્યાંક લઈ ગયો હતો. બંનેએ રસ્તામાં એક દુકાન પર કાર રોકી અને ત્યાંથી જંતુનાશક દવા ખરીદી બાદમાં સિદ્ધાર્થના રૂમમાં જઈને કોલ્ડ ડ્રિંકમાં જંતુનાશક દવા ભેળવીને પી લીધી. જ્યારે પાડોશીઓને કંઈક અઘટિત થવાની શંકા ગઈ ત્યારે તેઓ સિદ્ધાર્થના ઘરે ગયા. આ પછી તેમણે રૂમમાં બંનેને બેભાન હાલતમાં જોયા.
પ્રત્યુષાના મોઢામાંથી ફીણ નીકળી રહ્યું હતું, બંનેને તાત્કાલિક હોસ્પિટલમાં લઈ જવામાં આવ્યા પણ પ્રત્યુષાનું રસ્તામાં જ મોત થઈ ગયું અને સારવાર બાદ સિદ્ધાર્થ બચી ગયો. દીકરી પ્રત્યુષાના મૃત્યુના સમાચાર સાંભળીને માતા અને ભાઈ હતાશ સ્થિતિમાં હોસ્પિટલ પહોંચ્યા, પણ ત્યાં સુધીમાં ઘણું મોડું થઈ ચૂક્યું હતું. પ્રત્યુષાએ આ દુનિયાને અલવિદા કહી દીધું હતુ. આ પછી પંજાગુટ્ટા પોલીસે પ્રત્યુષાના શંકાસ્પદ મૃત્યુનો કેસ નોંધ્યો અને બોયફ્રેન્ડ સિદ્ધાર્થની પૂછપરછ કરી. જો કે, પ્રત્યુષાનો પોસ્ટમોર્ટમ રિપોર્ટ આવ્યો ત્યારે ચોંકાવનારા ખુલાસા થયા.
ફોરેન્સિક એક્સપર્ટે ઓટોપ્સી રિપોર્ટમાં જણાવ્યું કે પ્રત્યુષાનું મોત ગળું દબાવવાથી થયું છે, એટલું જ નહીં તેમણે પ્રેસ કોન્ફરન્સમાં જણાવ્યું કે પુંજાગુટ્ટા પોલીસે આત્મહત્યાથી લઈને બળાત્કાર અને હત્યા સુધીનો કેસ નોંધ્યો છે. ફોરેન્સિક રિપોર્ટના આધારે પોલીસને શંકા હતી કે પ્રત્યુષાના મૃત્યુ પહેલા તેનું યૌન શોષણ થયું હતું, તેની માતા સરોજિની દેવીએ એક ઈન્ટરવ્યુમાં કહ્યું હતું કે તેની પુત્રી આત્મહત્યા કરી શકે નહીં. 23 ફેબ્રુઆરી, 2002ના રોજ તેની પુત્રીના મૃત્યુના અઢી કલાક પહેલા તેણે તેની સાથે વાતચીત કરી હતી.
આ વાતચીતમાં તે ખૂબ જ ખુશ હતી અને તેને કહ્યું હતું કે દિગ્દર્શક તેજાએ તેને જયમ રવિની ડેબ્યુ ફિલ્મ ‘જયમ’ માટે હીરોઈન તરીકે સાઈન કરી હતી. સરોજિની દેવીએ એ પણ જણાવ્યું હતું કે પ્રત્યુષા સિદ્ધાર્થ સાથે ડિરેક્ટર તેજાને મળવા જઈ રહી હતી, પરંતુ થોડા કલાકો પછી તેમને આવા સમાચાર મળ્યા. પ્રત્યુષાની માતાએ સિદ્ધાર્થ, કેટલાક મિનિસ્ટર્સના દીકરા અને એક MLA પર પ્રત્યુષાનો ત્રણવાર રેપ કરવાનો આરોપ લગાવ્યો. તેમણે એમ પણ કહ્યું કે પ્રત્યુષાને હોસ્પિટલમાં દાખલ કરતા પહેલા જાણીજોઈને ઝેર પીવા માટે દબાણ કરવામાં આવ્યું હતું, સિદ્ધાર્થે તેના હોઠ પર થોડુ ઝેર લગાવ્યું હતું, જેથી લોકો એવું વિચારે કે તેણે પ્રત્યુષા સાથે ઝેર પીધું હતું પણ તે બચી ગયો.
જો કે, પ્રત્યુષાની માતાએ એવો પણ આરોપ લગાવ્યો હતો કે હોસ્પિટલ ઓથોરિટીએ બળાત્કારના પુરાવા છુપાવવા અને નષ્ટ કરવાનો પ્રયાસ કર્યો હતો કારણ કે મંત્રી અને તેમના પુત્ર સામેલ હતા. આ હાઈપ્રોફાઈલ કેસ પર ઘણી હસ્તીઓએ તેલંગાણા સરકારને સત્ય બહાર લાવવા માટે CBI તપાસ કરાવવાની વિનંતી કરી હતી, ત્યારબાદ ફોરેન્સિક રિપોર્ટના આધારે તેલંગાણા સરકારે પ્રત્યુષા કેસની તપાસ CBIને સોંપી. સીબીઆઈએ પ્રત્યુષાના બોયફ્રેન્ડ સિદ્ધાર્થને દોષિત માનીને કેસની તપાસ શરૂ કરી. તપાસ દરમિયાન ફોરેન્સિક રિપોર્ટમાં કરવામાં આવેલા દાવાઓ પણ ખોટા હોવાનું જણાયું,
જે બાદ રિપોર્ટ બનાવનારને સીબીઆઈએ પ્રત્યુષાના બોયફ્રેન્ડ સિદ્ધાર્થ રેડ્ડી પર લગાવેલા હત્યાના આરોપોને હટાવી દીધા. પ્રત્યુષાને આત્મહત્યા માટે ઉશ્કેરવા બદલ તેની સામે કેસ દાખલ કરવામાં આવ્યો જે અંતર્ગત તેને 5 વર્ષની સજા અને 5000 રૂપિયાનો દંડ ફટકારવામાં આવ્યો હતો. જો કે, બાદમાં સિદ્ધાર્થની સજામાં બે વર્ષનો ઘટાડો કરવામાં આવ્યો હતો. પ્રત્યુષા આ દુનિયામાંથી ચાલી ગઈ છે, પરંતુ તેની માતા તેને લોકોના મનમાં હજુ પણ જીવંત રાખે છે. તે હૈદરાબાદમાં પ્રત્યુષા ચેરિટેબલ ટ્રસ્ટ ચલાવે છે, જેની સ્થાપના તેણે 2002માં કરી હતી. તેના દ્વારા તે ગરીબ મહિલાઓ અને બાળકોને આર્થિક મદદ કરે છે.
