મૃત્યુ પહેલા દીકરી કૃતિએ પિતાને પ્રેમથી ખખડાવી નાખ્યા હતા, જન્મદિવસ પર પિતાએ ચિતાની તૈયારી કરવી પડી
કેદારનાથમાં ઘટેલી હેલીકૉપ્ટર દુર્ઘટનામાં ભાવનગરની ત્રણ દીકરીઓના દુઃખદ મોત થયા. આ અકસ્માતમાં કુલ 7 લોકો માર્યા ગયા જેમાં 3 તો ભાવનગરની દીકરીઓ હતી, તેમના મોત બાદ તેમના પરિવારમાં પણ શોકનો માહોલ ફરી વળ્યો છે, વળી સૌથી દુઃખદ વાત તો એ છે કે આ ત્રણ દીકરીઓમાંથી એક દીકરીનો તો એજ દિવસે જન્મદિવસ પણ હતો અને પરિવારે સવારે જ ફોન ઉપર વાત કરી હતી.
બે દિવસ પહેલા જ એટલે કે 18 ઓક્ટોબરના રોજ સવારે લગભગ 11.34 વાગ્યે આર્યન કંપનીનું હેલિકોપ્ટર કેદારનાથથી ગુપ્તકાશી (મસ્તા) માટે છ મુસાફરો સાથે ટેકઓફ થયું હતું પરંતુ ગરુડચટ્ટી દેવદર્શિનીમાં ગાઢ ધુમ્મસ વચ્ચે હેલિકોપ્ટરના પાયલટને સાચી દિશા દેખાઈ ન હતી અને સવારે 11.36 વાગ્યે હેલિકોપ્ટર અચાનક ટેકરી સાથે ટકરાઈ ગયું હતું અને તૂટીને જમીન પર પડ્યું.
આ દુર્ઘટનામાં પાયલોટ સમેત 7 લોકોના મોત નિપજ્યા હતા, આ દુર્ઘટનામાં ભાવનગરની પણ ત્રણ દીકરીઓ સામેલ હતી. ભાવનગરમાં રહેતી બે પિતરાઈ બહેનો ઉર્વી જયેશભાઈ બારડ અને કૃતિ કમલેશભાઈ આ દુર્ઘટનામાં મોતને ભેટી જયારે અન્ય એક યુવતી પૂર્વા રામાનુજ ભાવનગર જિલ્લાના સિહોરની રહેવાસી હતી. આ ઘટનાની જાણ થતા જ પરિવાર માથે દુઃખોનું આભ તૂટી પડ્યું હતું.
આ ત્રણેય યુવતીઓ કેદારનાથ દર્શન માટે ગઈ હતી. જેમાં પૂર્વા રામાનુજે તેના સોશિયલ મીડિયામાં કેદારનાથ દર્શનની તસવીરો પણ શે કરી હતી, સાથે જ હેલીકૉપ્ટરમાં બેઠા બાદ એક વીડિયો પણ બનાવ્યો હતો. જેમાં આકાશમાંથી કેદારનાથનો નજારો તેને બતાવ્યો હતો, આ તેનો અંતિમ વીડિયો બની ગયો. આ વીડિયો બનાવ્યાના થોડા સમય બાદ જ હેલીકૉપ્ટર દુર્ઘટના ગ્રસ્ત બન્યું અને અંદર બેઠેલા તમામ લોકો મોતને ભેટ્યા.
આ દુર્ઘટનામાં મોતને ભેટેલ ભાવનગરમાં રહેતી કમલેશ બારડની દીકરી કૃતિ બારડ આજ દિવસે 30 વર્ષની થઇ હતી. ત્યારે આ ખાસ દિવસ ઉપર તેને પોતાની બહેન ઉર્વી સાથે જ કેદારનાથ ધામમાં દર્શન કર્યા. આ દરમિયાન પરિવાર સાથે પણ ફોનમાં વાત થઇ હતી અને કૃતિ તેના જન્મ દિવસે આ ખાસ જગ્યાની મુલાકાત અને દર્શનને લઈને ખુશ હતી. પરંતુ તેની ખુશી વધુ લાંબો સમય ના ચાલી અને બે કલાક બાદ જ હેલીકૉપ્ટર ક્રેશમાં તેનું નિધન થવાની ખબર આવી.
