ભારતમાં જન્મેલો આ હાથી જેના મૃત્યુ થતા જ પાડોશી દેશમાં મનાવાયો શોક, વિદાયમાં આવ્યા સેંકડો લોકો

પ્રાણીઓ અને મનુષ્ય વચ્ચેનો સંબંધ ઘણો જૂનો છે. માનવી છેલ્લી સદીઓથી પશુપાલન કરતો આવ્યો છે. ક્યારેક બંને વચ્ચે એવો સંબંધ બની જાય છે કે તેઓ એકબીજા સાથે ભાવનાત્મક રીતે જોડાઈ જાય છે. આવો જ એક કિસ્સો શ્રીલંકામાં જોવા મળ્યો. એશિયામાં સૌથી મોટા ગણાતા 69 વર્ષીય પ્રખ્યાત ભારતીય હાથીનું સોમવારે મોત  થતાં શ્રીલંકામાં શોકનો માહોલ છે. રાષ્ટ્રપતિ ગોટાબાયા રાજપક્ષેએ નિર્દેશ આપ્યો છે કે હાથીના શબને ભાવિ પેઢીઓ માટે સાચવવામાં આવે અને તેને રાષ્ટ્રીય સંપત્તિ તરીકે નિયુક્ત કરવામાં આવે.

ભારતના મૈસૂરમાં જન્મેલા, નાડુંગમુવે રાજા નામનો આ હાથી સતત 11 વર્ષ સુધી દર વર્ષે ઓગસ્ટમાં કેન્ડીના પ્રખ્યાત બૌદ્ધ મંદિરના વાર્ષિક ઉત્સવમાં ભગવાન બુદ્ધના દાંતના અવશેષોનું મુખ્ય બોક્સ લઈ જતો હતો. દેશના ગમપાહા જિલ્લામાં હાથીનું મોત થયું હતું. રાષ્ટ્રપતિ રાજપક્ષેએ હાથીના રાજાના નિધન પર શોક વ્યક્ત કર્યો છે.

રાજપક્ષેએ ટ્વિટ કર્યું હતું કે તમે ટેમ્પલ ઑફ ટૂથના અવશેષો ધરાવતું બૉક્સ લઈ જવાના તમારા પ્રશંસનીય કાર્ય માટે સ્થાનિક અને વિદેશી લોકોના દિલ જીતી લીધા છે. તમે પવિત્ર બોક્સની યાત્રા કરીને યોગ્યતા પ્રાપ્ત કરી છે. ભગવાન તમારા આત્માને શાંતિ આપે. કોલંબો પેજ ન્યૂઝ પોર્ટલના અહેવાલ મુજબ, રાજાને એશિયાનો સૌથી મોટો હાથી માનવામાં આવતો હતો.

હાથીના માલિક ડૉક્ટર હર્ષ ધર્મવિજયે કહ્યું કે હાથીના અંતિમ સંસ્કારની જાહેરાત પછી કરવામાં આવશે. મીડિયા રિપોર્ટ્સ અનુસાર, હાથી 10.5 ફૂટ લાંબો હતો. રાષ્ટ્રપતિ રાજપક્ષેના કાર્યાલય દ્વારા જારી કરાયેલા એક નિવેદન અનુસાર, તેમણે નિર્દેશ આપ્યો છે કે હાથીના શરીરને ભવિષ્યની પેઢીઓ માટે સાચવવામાં આવે અને તેને રાષ્ટ્રીય સંપત્તિ તરીકે ઓળખવામાં આવે. આ હાથીનો જન્મ ભારતમાં 1953માં થયો હતો અને તે સમયના મૈસૂરના રાજા દ્વારા શ્રીલંકાના બૌદ્ધ સાધુને ભેટમાં આપવામાં આવ્યો હતો.

Shah Jina