દેશના જાણિતા સિંગર અને ભારત રત્ન લતા મંગેશકર લાખો લોકોના દિલની ધડકન હતા, પરંતુ 6 ફેબ્રુઆરીએ તેઓ આ દુનિયાને હંમેશ માટે અલવિદા કહી ચાલ્યા ગયા. તેમના નિધનથી સમગ્ર દેશ શોકમાં ગરકાવ થઈ ગયો હતો. ચાહકો આજે પણ તેમની યાદોમાં ડૂબેલા છે. લતા દીદીના પરિવારના સભ્યો માટે આ ખૂબ જ મુશ્કેલ સમય છે. આ દરમિયાન, સ્વર કોકિલાના નિધન પર, તેમની નાની બહેન આશા ભોંસલેની પૌત્રી જનાઈ ભોંસલેએ સ્વર્ગસ્થ લતાજીની આત્મા માટે પ્રાર્થના કરી, જેની તસવીરો સોશિયલ મીડિયા પર ખૂબ વાયરલ થઈ રહી છે.
જનાઇ ભોંસલેએ તેના ઈન્સ્ટાગ્રામ પર બે તસવીરો શેર કરી છે. જેમાં જોઈ શકાય છે કે તે લતા મંગેશકરની આત્માની શાંતિ માટે પ્રાર્થના કરી રહી છે. તે શિવલિંગ પર દૂધ ચડાવી રહી છે અને પંડિત સાથે ભગવાન શિવની પૂજા કરતી જોવા મળે છે. આ તસવીરો શેર કરતાં તેણે કેપ્શનમાં લખ્યું- ‘તેમની આત્માની શાંતિ માટે પ્રાર્થના.’ આ પહેલા જનાઈ ભોસલેએ લતા મંગેશકરના નિધન પોતાનો એક થ્રોબેક ફોટો શેર કર્યો હતો, જેમાં તે લતા દીદી સાથે જોવા મળી હતી.
તમને જણાવી દઈએ કે જનાઈ ભોસલે આશા ભોંસલેના પુત્ર આનંદ ભોંસલેની પુત્રી છે. લતા મંગેશકર આશા ભોસલેની મોટી બહેન છે. તે પોતાના વડીલોના પગલે ચાલીને ગાયનમાં પણ કારકિર્દી બનાવી રહી છે. તેણે ખૂબ નાની ઉંમરે ગાવાનું પણ શરૂ કર્યું હતું. તે સોશિયલ મીડિયા પર ઘણી એક્ટિવ રહે છે.જનાઈ સચિન તેંડુલકરની પુત્રી સારા તેંડુલકરની મિત્ર છે.
ઉલ્લેખનીય છે કે, લતા મંગેશકરના નિધનથી સમગ્ર દેશમાં શોકની લહેર છવાઈ ગઈ છે. લતાજીએ લગ્ન કર્યા ન હતા પરંતુ ભાઈ-બહેનના પરિવારના સભ્યો લતાની ખૂબ જ નજીક હતા અને તેમનું ધ્યાન રાખતા હતા.
