ખબર

સુરતમાં 11 વર્ષની માસૂમ બાળકી સાથે દુષ્કર્મ અને હત્યા કરનાર નરાધમો ઝડપાયા, પિતાએ આપી દીકરીની અર્થીને મુખાગ્નિ

સુરતમાંથી તો ગુનાહિત પ્રવૃત્તિઓ અટકવાનું નામ જ નથી લઇ રહી, ગઇકાલના રોજ જ એક કિસ્સો સામે આવ્યો હતો, જેમાં એક નરાધમે 11 વર્ષની માસૂમ બાળકી પર દુષ્કર્મ આચર્યુ હતુ અને બાળકીને કણસતી મૂકી નાસી ગયો હતો. આ કેસમાં પોલિસે આરોપી નરાધમની ધરપકડ કરી લીધી છે. ઉલ્લેખનીય છે કે, આ માસૂમ બાળકીના અંતિમ સંસ્કાર કરવામાં આવ્યા હતા અને ત્યારે પિતાના હૈયાફાટ રુદનની બધાની આંખોમાં આંસુ આવી ગયા હતા. બાળકીના મૃતદેહને કડોદરા સ્મશાન ગૃહ ખાતે અંતિમ સંસ્કાર માટે લઇ જવામાં આવ્યો હતો. બાળકીના અંતિમ સંસ્કાર દરમિયાન મોટી સંખ્યામાં લોકો જોડાયા હતા. આ દરમિયાન પોલિસનો ચુસ્ત બંદોબસ્ત પણ હતો.

ઉલ્લેખનીય છે કે, સુરત રેન્જ આઇજીએ પ્રેસ કોન્ફરન્સ કરી આ ઘટનાની સમગ્ર હકિકત જણાવી હતી. તેમણે કહ્યુ- 11 વર્ષની બાળક સાથે જે નરાધમે દુષ્કર્મ કર્યુ હતુ તે ઝડપાઇ ગયો છે. હાલ દયા અને કાલુરામ નામના બે વ્યક્તિઓની અટકાયત કરવામાં આવી છે. દયારામ અને કાલુરામ બંનેએ બાળકીને લોભામણી લાલચ આપી અને રૂમમાં લઇ ગયા હતા જેના સીસીટીવી ફુટેજ પણ સામે આવ્યા હતા. પ્રાથમિક તપાસમાં સામે આવ્યુ છે કે, દયારામે બાળકી પર દુષ્કર્મ ગુજારી તેની હત્યા કરી છે. કાલુરામે આ દરમિયાન આરોપી દયારામની મદદ કરી હતી. તેણે રૂમની બહાર પહેરેદાર બની અને તાળુ માર્યુ હતું. હાલ એ દિશામાં તપાસ ચાલી રહી છે કે હજી પણ કોઇની સંડોવણી છે કે નહિ.

શું હતો મામલો
સુરતના પલસાણાના જોળવા વિસ્તારમાં ગઇકાલના રોજ એટલે કે રવિવારે ઔદ્યોગિક એકમોની ધમધમતા જોળવાના પરપ્રાંતીય વિસ્તારમાં સાઈબા મિલની સામે આવેલ એક બિલ્ડિંગમાં ભાડેથી રહેતા પરિવારમાં બે બાળકીઓ પણ રહે છે. 20 ફેબ્રુઆરી રવિવારના રોજ બંને બાળકીઓ ઘરે એકલી હતી અને તેમના માતાપિતા નોકરી ઉપર ગયા હતા, ત્યારે સાંજના સમયે 7 વર્ષની બાળા બિસ્કિટ લેવા માટે દુકાને ગઇ હતી અને આ દરમિયાન જ જયારે 11 વર્ષની બાળકી એકલી હતી અને ત્યારે અજાણ્યો નરાધમ આવ્યો અને આ બાળકીને ત્યાંથી એક રૂમમાં લઇ ગયો જયાં તેણે આ બાળકી સાથે દુષ્કર્મ આચર્યુ અને તેને પીંખી નખી..

તે બાદ બાળકી લોહીલુહાણ હાલતમાં કણસતી રહી અને નરાધમ આ માસૂમ બાળકીને ત્યાં જ બેભાન અવસ્થામાં મૂકીને તાળું મારીને ત્યાંથી નાસી ગયો હતો.ઉલ્લેખનીય છે કે, જયારે સાંજે આ બાળકીના માતા-પિતા આવ્યા ત્યારે તેઓએ બાળકીની શોધ કરી પરંતુ તે નજરે પડી નહિ તો તેમણે તપાસ કરી, જે બાદ એક અવાવરું રૂમને તાળું મારેલુ જોઇ પરિવારે રૂમનું તાળું તોડ્યુ અને તેમણે ત્યાં બાળકીને લોહીલુહાણ હાલતમાં જોઇ જે બાદ તેઓ કડોદરાની એક ખાનગી હોસ્પિટલમાં બાળકીને લઇને સારવાર માટે પહોંચ્યા.

પરંતુ ત્યાં ડોક્ટર ન મળતા બાળકીને ત્યાંથી ચલથાણની ખાનગી હોસ્પિટલમાં લઈ જવામાં આવી હતી. જો કે ત્યાં સુધી મોડું થઈ ગયુ હતુ અને બાળકીનું મોત થઇ ચૂક્યુ હતુ. આ સમગ્ર ઘટનાની જાણ સુરતના ઉચ્ચ અધિકારીઓને થતા કાફલો ઘટના સ્થળે દોડી આવ્યો હતો અને શંકમંદોની પૂછપરથ કરી હતી. આ અરેરાટી ફેલાવતી ઘટનામાં નજીકમાં રહેતા નરાધમો સંડોવણીની શકયતા દેખાઈ રહેલી છે. હાલ તો આ મામલે બે શકમંદોની પોલિસ પૂછપરછ કરી રહી છે અને ઘટનાની તપાસ પણ ચાલી રહી છે.