જ્યોતિષશાસ્ત્રમાં શનિદેવને ન્યાયના દેવતા માનવામાં આવે છે, જે દરેક વ્યક્તિને તેના કર્મો અનુસાર ફળ આપે છે. આજથી આગામી 58 દિવસ એટલે કે 11 ડિસેમ્બર સુધી શનિ વક્રી (ઊંધી ચાલ) અવસ્થામાં મીન રાશિમાં બિરાજમાન રહેશે. શનિની આ વક્ર દૃષ્ટિને કારણે કેટલીક રાશિના જાતકોએ વિશેષ સાવધાની રાખવાની જરૂર છે. જો કે, શનિના વક્રી થવાથી ડરવાની જરૂર નથી, કારણ કે શનિ સજા નહીં પરંતુ આપણને આપણા કર્મોનો અરીસો બતાવે છે અને જીવનને સુધારવાની તક આપે છે.
આગામી 58 દિવસ સુધી કઈ રાશિઓ પર રહેશે શનિનો પ્રભાવ અને તેનાથી બચવા માટે કયા ઉપાયો કરવા જોઈએ, આવો જાણીએ વિગતવાર.
કર્ક, સિંહ અને મીન રાશિ પર રહેશે શનિની વક્ર દૃષ્ટિ
૧. કર્ક રાશિ
ચંદ્રની આ રાશિના જાતકો માટે આ સમય થોડો મુશ્કેલ બની શકે છે.
-
ખર્ચ અને બચત: ખર્ચા અને બચત વચ્ચે યોગ્ય સંતુલન (Balance) જાળવવું ખૂબ જરૂરી છે. વણજોઈતા ખર્ચા પર કાપ મૂકો.
-
પર્સનલ અને પ્રોફેશનલ લાઇફ: ઘરમાં કોઈ બાબતે વાદ-વિવાદ થઈ શકે છે, જેનાથી મન અશાંત રહેશે. નોકરી કે ધંધામાં જવાબદારીઓ વધવાથી ગૂંચવણો વધી શકે છે.
-
સલાહ: આ સમય દરમિયાન દલીલબાજીથી દૂર રહો અને પોતાને શાંત રાખવાનો પ્રયાસ કરો.
૨. સિંહ રાશિ
સિંહ રાશિના નોકરિયાત અને વેપારી વર્ગના લોકોએ વિશેષ સતર્ક રહેવું પડશે.
-
કામમાં અડચણો: નોકરીમાં કામ ગૂંચવાઈ શકે છે અને ધાર્યા પરિણામો ન મળવાથી મન ઉદાસ થઈ શકે છે.
-
ગુસ્સા પર કાબૂ: મહેનતનું પૂરું ફળ મોડું મળી શકે છે, પરંતુ તે મળશે ચોક્કસ. આ સમયમાં ગુસ્સા પર નિયંત્રણ રાખવું જરૂરી છે.
-
વેપાર: બિઝનેસ સાથે જોડાયેલા લોકોએ દરેક દસ્તાવેજ કે બાબતને ઝીણવટપૂર્વક ચકાસીને જ આગળ વધવું.
૩. મીન રાશિ
મીન રાશિમાં જ શનિ વક્રી અવસ્થામાં છે, તેથી આ રાશિવાળાએ ફૂંકી-ફૂંકીને પગલાં મૂકવાનો સમય છે.
-
માનસિક દબાણ: પ્રોફેશનલ લાઇફમાં થોડું પ્રેશર અનુભવાશે, પરંતુ આ સ્થિતિ થોડા દિવસો પૂરતી જ છે.
-
સાવધાની: કોઈપણ પ્રકારના ઉતાવળિયા નિર્ણયો લેવાનું ટાળો. અટકેલા કે અધૂરાં કામોને પ્રાથમિકતા આપીને પૂરાં કરો.
શનિના પ્રકોપથી બચવાના 7 અચૂક ઉપાય
જો તમે શનિની વક્ર દૃષ્ટિના નકારાત્મક પ્રભાવથી બચવા માંગતા હોવ, તો આ 7 સરળ ઉપાયો અપનાવી શકો છો:
-
શનિવારનું દાન: દર શનિવારે શનિ મંદિરે જાઓ અને કાળા તલ કે યથાશક્તિ અનુસાર વસ્તુઓનું દાન કરો.
-
જરૂરિયાતમંદોની મદદ: અક્ષમ અથવા જરૂરિયાતમંદ લોકોને પોતાની ક્ષમતા મુજબ મદદ કરો.
-
વડીલોનું સન્માન: ઘરના વડીલો અને વરિષ્ઠ નાગરિકોનું સન્માન કરો તથા તેમની સલાહને મહત્ત્વ આપો.
-
નબળા વર્ગ પ્રત્યે દયા: પોતાનાથી નબળા કે સહાયક વર્ગના લોકોને ક્યારેય ન સતાવો કે નીચા ન દેખાડો.
-
સ્વચ્છતા અને નિયમિતતા: તમારી આસપાસ સફાઈ રાખો અને જીવનમાં એક યોગ્ય દિનચર્યા (Routine) બનાવો.
-
અટકેલા કામો પૂરા કરો: તમારા જે પણ કાર્યો લાંબા સમયથી પેન્ડિંગ છે, તેને એક પછી એક પૂરા કરવાનું શરૂ કરો.
-
પીપળાના વૃક્ષની પૂજા: શનિવારે સાંજના સમયે પીપળાના ઝાડ નીચે સરસવના તેલનો દીવો પ્રગટાવો.
