સાઉદી અરેબિયાના પૂર્વીય ભાગમાં આવેલા દમ્મામના કિંગ ફહદ આંતરરાષ્ટ્રીય એરપોર્ટ અને શાયબાહ સ્થિત ‘અરામકો’ ઓઇલ સુવિધા પર તાજેતરમાં થયેલા હુમલાઓએ સમગ્ર ગલ્ફ ક્ષેત્રમાં ભારે તણાવ ઊભો કર્યો છે. આ હુમલાઓમાં કુલ 3 લોકોના કરૂણ મોત થયા છે અને 8 લોકો ગંભીર રીતે ઘાયલ થયા છે, જેમાં મૃતકોમાં નેપાળ અને ફિલિપાઇન્સના નાગરિકો તથા ઘાયલોમાં એક ભારતીય નાગરિક પણ સમાવિષ્ટ છે. દમ્મામ એરપોર્ટ પર થયેલા હુમલાથી ભૌતિક નુકસાન થવાની સાથે કેટલીક ફ્લાઇટ્સને અન્યત્ર વાળવી પડી હતી. જોકે ઓઇલ ડેપો પર છોડાયેલા ડ્રોનને સાઉદી એર ડિફેન્સ સિસ્ટમે તોડી પાડ્યું હતું, પરંતુ તેના કાટમાળથી વાહનમાં આગ લાગી હતી. આ ઘટનાઓ બાદ ત્યાં કામ કરતા વિદેશી કામદારોની સુરક્ષા સામે ગંભીર સવાલો ઊભા થયા છે અને પરિસ્થિતિની ગંભીરતા જોઈને અમેરિકાએ પોતાના રાજદ્વારીઓના પરિવારોને દેશ છોડવા આદેશ આપ્યો છે.
દમ્મામ એરપોર્ટ પર હુમલો અને નુકસાન :
ગલ્ફ ક્ષેત્રના મુખ્ય હવાઈ કેન્દ્ર ગણાતા દમ્મામના કિંગ ફહદ આંતરરાષ્ટ્રીય એરપોર્ટ પર બુધવારે મોડી રાત્રે અચાનક હુમલો થયો હતો. સાઉદી જનરલ ઓથોરિટી ઓફ સિવિલ એવિએશનના જણાવ્યા મુજબ, આ ઘટનામાં સાઉદી અરેબિયાના એક નાગરિકનું મોત થયું હતું અને આઠ લોકો ઘાયલ થયા હતા. હુમલાને કારણે એરપોર્ટના પરિસરને ભૌતિક નુકસાન પહોંચ્યું હતું જેના કારણે ફ્લાઇટ વ્યવહાર પ્રભાવિત થયો હતો. સત્તાવાળાઓ હાલમાં થયેલા નુકસાનનું આંકલન કરી રહ્યા છે અને સુરક્ષા વ્યવસ્થા સઘન બનાવી દેવામાં આવી છે.
અરામકો ઓઇલ સુવિધા પર ડ્રોન એટેકનો પ્રયાસ :
એરપોર્ટ પર હુમલા પહેલાં સાઉદીના દક્ષિણ-પૂર્વ ભાગમાં આવેલી દેશની અગ્રણી ‘અરામકો’ ઓઇલ સુવિધાને ડ્રોન દ્વારા નિશાન બનાવવાનો પ્રયાસ કરવામાં આવ્યો હતો. સાઉદીની હવાઈ સંરક્ષણ પ્રણાલીએ સમયસૂચકતા વાપરીને ડ્રોનને હવામાં જ તોડી પાડ્યું હતું. જોકે, ડ્રોનનો સળગતો કાટમાળ નીચે પડતાં એક કોન્ટ્રાક્ટરના વાહનમાં આગ લાગી ગઈ હતી. આ દુર્ઘટનામાં નેપાળ અને ફિલિપાઇન્સના એક-એક નાગરિકનું મોત થયું હતું, પરંતુ રાહતની વાત એ રહી કે ઓઇલ સુવિધાના ઉત્પાદનમાં કોઈ અવરોધ આવ્યો નથી.
વિદેશી કામદારોની સુરક્ષા અને ભારતીય ઈજાગ્રસ્ત :
સાઉદી અરેબિયામાં સતત થઈ રહેલા આ પ્રકારના હુમલાઓને કારણે ત્યાં રોજીરોટી અર્થે વસેલા લાખો વિદેશી કામદારોની સલામતી પર મોટો ખતરો મંડરાઈ રહ્યો છે. અરામકો ઓઇલ ફિલ્ડ પર થયેલા હુમલાના કાટમાળથી જે બે લોકો ઘાયલ થયા છે તેમાં એક ભારતીય અને એક પાકિસ્તાની નાગરિકનો સમાવેશ થાય છે. સામાન્ય રીતે યમનના ઈરાન-સમર્થિત હુથી બળવાખોરો આવી તબાહી મચાવતા હોય છે. જોકે, આ તાજેતરના હુમલાની જવાબદારી હજુ સુધી કોઈ સંગઠને સ્વીકારી નથી, છતાં વિદેશી નાગરિકોમાં ભારે ફાફડાટ વ્યાપી ગયો છે.
અમેરિકાની ચિંતા અને રાજદ્વારીઓને દેશ છોડવા આદેશ
સાઉદી અરેબિયાની મહત્વપૂર્ણ આર્થિક અને મુસાફરી સુવિધાઓ પર વધી રહેલા ટાર્ગેટ એટેકને પગલે વૈશ્વિક સ્તરે ચિંતાની લહેર ફરી વળી છે. પરિસ્થિતિને વધુ વણસતી જોઈને યુનાઇટેડ સ્ટેટ્સ (અમેરિકા) એ તાત્કાલિક ધોરણે મોટો નિર્ણય લીધો છે. અમેરિકી સરકારે સાઉદી અરેબિયામાં તૈનાત પોતાના કેટલાક રાજદ્વારીઓ અને સરકારી કર્મચારીઓના પરિવારોને સુરક્ષાના કારણોસર તુરંત દેશ છોડી દેવાની સૂચના આપી દીધી છે. સમગ્ર ગલ્ફ ક્ષેત્રમાં યુદ્ધ જેવા સંકટના એંધાણ વર્તાઈ રહ્યા છે.
