આપણા દેશની અંદર ઘણા લોકો કલાકારોને ભગવાનની જેમ પુંજતા હોય છે, તમે સાઉથમાં જશો તો રજનીકાંતને લોકો આજે પણ ભગવાન માને છે, તો લોકડાઉનમાં ગરીબ લોકોના મસીહા બનેલા સોનુ સુદને પણ લોકોએ ભગવાનનો દરજ્જો આપ્યો અને તેમનું મંદિર પણ બનાવ્યું. ત્યારે હવે વધુ એક મામલો સામે આવ્યો છે જેમાં એક વ્યક્તિએ પોતાના ઘરે અમિતાભ બચ્ચનની પ્રતિમા સ્થાપિત કરી.
એક ભારતીય-અમેરિકન પરિવારે ન્યૂ જર્સીના એડિસન સિટીમાં તેમના ઘરે બોલિવૂડ સુપરસ્ટાર અમિતાભ બચ્ચનની પ્રતિમા સ્થાપિત કરી છે. પ્રતિમાનું ઔપચારિક અનાવરણ સમાજના અગ્રણી આલ્બર્ટ જસાણી દ્વારા કરવામાં આવ્યું હતું. એડિસનમાં રિંકુ અને ગોપી શેઠના ઘરની બહાર લગભગ 600 લોકો એકઠા થયા હતા, જેને ઘણીવાર લિટલ ઈન્ડિયા તરીકે ઓળખવામાં આવે છે.
અહીં મોટી સંખ્યામાં ભારતીય-અમેરિકનો વસવાટ કરે છે. આ પ્રતિમાને એક મોટા કાચના બોક્સની અંદર રાખવામાં આવી છે. ભારતીય સુપરસ્ટારની ફેન ક્લબ દ્વારા સમારોહમાં ફટાકડા ફોડવામાં આવ્યા હતા અને ડાન્સ કરવામાં આવ્યો હતો. ઈન્ટરનેટ સિક્યોરિટી એન્જિનિયર ગોપી સેઠે કહ્યું, ‘તે મારા અને મારી પત્ની માટે કોઈ ભગવાનથી ઓછા નથી. સૌથી મોટી બાબત જે મને તેમના વિશે પ્રેરિત કરે છે તે માત્ર તેમની રીલ લાઇફ જ નહીં પરંતુ તે વાસ્તવિક જીવન પણ છે. તે પોતાના ચાહકોનું ધ્યાન રાખે છે. તે બીજા ઘણા સ્ટાર્સ જેવા નથી. તેથી મેં વિચાર્યું કે મારે તેમની પ્રતિમા મારા ઘરની બહાર રાખવી જોઈએ.”
1990માં પૂર્વ ગુજરાતના દાહોદથી યુએસ આવેલા શેઠ છેલ્લા ત્રણ દાયકાથી ‘બિગ બી એક્સટેન્ડેડ ફેમિલી’ www.BigBEFamily.comની વેબસાઈટ ચલાવી રહ્યા છે. વેબસાઇટનો ડેટાબેઝ બોલિવૂડના સુપરસ્ટાર્સ સાથે પણ શેર કરવામાં આવ્યો છે. શેઠના કહેવા પ્રમાણે, બચ્ચન પ્રતિમા વિશે જાણે છે. સુપરસ્ટારે તેમને કહ્યું હતું કે તે આટલા આદરને પાત્ર નથી, પરંતુ તે તેમને આમ કરવાથી રોકી શક્યા નહિ.
પ્રતિમા બચ્ચનને તેના ‘કૌન બનેગા કરોડપતિ’ ટ્વિસ્ટમાં બેઠેલા દર્શાવે છે. તેને ખાસ રાજસ્થાનમાં બનાવવામાં આવી હતી અને પછી તેને અમેરિકા મોકલવામાં આવી હતા. તેની ડિઝાઇન પણ રાજસ્થાનમાં જ કરવામાં આવી હતી. સમગ્ર પ્રોજેક્ટનો ખર્ચ US$75,000 (અંદાજે રૂ. 60 લાખ)થી વધુ છે.
Awesome. Captured moments. pic.twitter.com/mtr2qPNZPo
— ParinK (@KadakiaParin) August 29, 2022
શેઠે કહ્યું કે તે 1991માં ન્યૂ જર્સીમાં નવરાત્રિની ઉજવણી દરમિયાન પહેલીવાર ‘તેના ભગવાન’ને મળ્યા હતા. ત્યારથી તે તેમના ખૂબ જ મોટા ફેન છે. તેમણે કહ્યું કે તે યુએસ અને વૈશ્વિક સ્તરે તેમના ચાહકોને સંગઠિત કરી રહ્યો છે જે પછીથી વેબસાઇટમાં ફેરવાઈ ગઈ. તેમણે કહ્યું, ‘બચ્ચન સાહેબ તેમના ચાહકો અને સમર્થકોને તેમનો વિસ્તૃત પરિવાર કહે છે. અમેરિકામાં પ્રતિમા સ્થાપિત કરવા માટે ઘણા પડકારોનો સામનો કરવો પડ્યો છે. તે અન્ય કાર્યો કરતાં વધુ મુશ્કેલ હતું.’
