દિવસેને દિવસે અમદાવાદની રોનક બદલાઈ રહી છે અને શહેરની સ્કાયલાઈન વૈશ્વિક સ્તરની બની રહી છે. દુબઈ જેવી ભવ્ય બિલ્ડિંગો હવે ધીમે ધીમે અમદાવાદમાં પણ નિર્માણ પામી રહી છે. ત્યારે અમદાવાદીઓ માટે એક ખૂબ જ મોટા અને રોમાંચક સમાચાર સામે આવ્યા છે. અમદાવાદ મ્યુનિસિપલ કોર્પોરેશન (AMC) દ્વારા શહેરના પોશ વિસ્તાર ગણાતા સિંધુ ભવન રોડ પર રૂ. 570 કરોડના મસમોટા ખર્ચે ‘અમદાવાદ સિટી સ્ક્વેર’ (Ahmedabad City Square) આઈકોનિક ટાવર બનાવવાનું ભવ્ય આયોજન કરવામાં આવ્યું છે.
દુબઈની પ્રસિદ્ધ ‘જુમેરાહ સ્કાયલાઇન’ની તર્જ પર બનનારો આ ટાવર અમદાવાદની નવી ઓળખ બનશે. આ પ્રોજેક્ટ વિશેની તમામ ખાસ વાતો અહીં જાણીએ:
પ્રોજેક્ટની મુખ્ય વિશેષતાઓ અને ઊંચાઈ
ઊંચાઈ અને માળ: આ આઈકોનિક ટાવર આશરે 175 મીટર (574 ફૂટ) ઊંચાઈ ધરાવતો હશે, જે અંદાજે 55 થી 57 માળ જેટલો ઊંચો હશે.
નાઇટ વ્યૂનો આનંદ: આ ટાવરની ઊંચાઈ પરથી કોફી પીતા-પીતા અમદાવાદનો અદ્ભુત નાઇટ વ્યૂ (Night View) નિહાળવાનો રોમાંચક અનુભવ નાગરિકોને મળશે.
વિશાળ વિસ્તાર: આ પ્રોજેક્ટ કુલ 13,144 ચોરસ મીટર પ્લોટમાં આકાર લેશે, જેમાંથી 12,091 ચોરસ મીટરમાં બાંધકામ થશે. ગ્રાઉન્ડ ફ્લોર પર 5,990 ચો.મી. વિસ્તારમાં આકર્ષક પ્લાન્ટેશન અને લેન્ડસ્કેપિંગ વિકસાવાશે.
મનોરંજન, શોપિંગ અને ડાઈનિંગનું મુખ્ય કેન્દ્ર
આ આઈકોનિક ટાવર માત્ર એક બિલ્ડિંગ નહીં, પરંતુ નાગરિકો માટે મનોરંજન, શોપિંગ અને ડાઈનિંગનું હબ બનશે:
સ્કાય ડેક અને વ્યુ ગેલેરી: 175 મીટરની ઊંચાઈએ સ્કાય ડેક-વોક અને વ્યુ ગેલેરી બનશે, જ્યાં એકસાથે 50 મુલાકાતીઓ શહેરનો નજારો માણી શકશે.
રેસ્ટોરેન્ટ અને કેફે: 29.50 મીટરથી 47.25 મીટરની ઊંચાઈ વચ્ચે ત્રણ વિવિધ રેસ્ટોરેન્ટ્સ અને 4 કિઓસ્ક હશે. આ ઉપરાંત, 40 મીટરની ઊંચાઈએ 1200 લોકોની ક્ષમતા ધરાવતી બે માળની રેસ્ટોરેન્ટ તથા ટેરેસ કેફે મુખ્ય આકર્ષણ રહેશે.
શોપિંગ અને કલ્ચર: બિલ્ડિંગમાં અંદાજે 50 જેટલી દુકાનો, આર્ટ ગેલેરી અને 310 બેઠક ક્ષમતા ધરાવતું એમ્ફીથિયેટર (Amphitheatre) પણ બનાવવામાં આવશે.
અધ્યાધુનિક સુવિધાઓ અને પાર્કિંગની વ્યવસ્થા
લિફ્ટ અને ડિજિટલ સ્ક્રીન: મુલાકાતોની સરળ અવરજવર માટે બિલ્ડિંગમાં કુલ 17 આધુનિક લિફ્ટ મૂકવામાં આવશે. વળી, 40 થી 175 મીટર વચ્ચે વિશાળ ડિજિટલ સ્ક્રીન અને સોલર ટ્રી સાથે અર્બન પ્લાઝા તૈયાર કરાશે.
વિશાળ પાર્કિંગ: મુલાકાતીઓની સગવડ માટે 3 લેવલના બેઝમેન્ટમાં 385 કાર અને 1109 ટુ-વ્હીલરના પાર્કિંગની વ્યવસ્થા હશે. આ ઉપરાંત, ટાવરની સામેના ભાગે વધુ 450 કાર પાર્ક થઈ શકે તેવી વધારાની જગ્યા પણ ફાળવવામાં આવી છે.
ટેન્ડર પ્રક્રિયા અને સમયમર્યાદા
AMC દ્વારા આ મહત્વાકાંક્ષી પ્રોજેક્ટ માટે 25 ઓક્ટોબર, 2026 ના રોજ અધિકૃત ટેન્ડર પ્રસિદ્ધ કરી દેવામાં આવ્યું છે. કોન્ટ્રાક્ટરો સાથે ઓરિએન્ટેશન અને પ્રિ-બિડ મીટિંગ બાદ અઢી મહિનામાં ટેન્ડર પ્રક્રિયા ફાઇનલ કરવામાં આવશે. એકવાર કામ શરૂ થયા બાદ આ સમગ્ર પ્રોજેક્ટ 42 મહિના (એટલે કે સાડા ત્રણ વર્ષ) ની સમયમર્યાદામાં પૂર્ણ કરવાનો લક્ષ્યાંક રાખવામાં આવ્યો છે.
આ પ્રોજેક્ટ પૂર્ણ થવાથી અમદાવાદની સ્કાયલાઈન વૈશ્વિક સ્તર પર ચમકશે અને તે પ્રવાસીઓ તેમજ સ્થાનિક નાગરિકો માટે એક અનોખું લેન્ડમાર્ક સાબિત થશે.
