રાજ્યમાં હજુ ઠંડીનું જોર વધે એ પહેલા જ માવઠાને લઈને થઇ ગઈ આગાહી, સ્વેટર અને ઝેકેટ સાથે રેઇન કોટ અને છત્રી પણ રાખજો બહાર, હવામાન નિષ્ણાત અને હવામાન વિભાગની આગાહી
Unseasonal rains in Gujarat : ગુજરાતમાં દિવાળીથી ઠંડીનો ચમકારો જોવા મળ્યો છે. રાજ્યના મોટાભાગના શહેરોમાં હવે સાંજ બાદ વાતાવરણ ઠંડુ જોવા મળે છે. જો કે હજુ પણ દિવસ દરમિયાન ગરમી થતી પણ જોવા મળે છે. ત્યારે રાજ્યના ઘણા બધા વિસ્તારોમાં વાતાવરણમાં પણ પલટો જોવા મળી રહ્યો છે. જેને લઈને હાલ ગુજરાતમાં માવઠાને લઈને પણ આગાહી કરવામાં આવી રહી છે. આગાહી પ્રમાણે ગુજરાતમાં આજથી એટલે કે 24 નવેમ્બરથી 27 નવેમ્બર સુધી વરસાદ થવાની શક્યતા છે.
હવામાન વિભાગની આગાહી :
આ બાબતે હવામાન વિભાગ દ્વારા આગાહી કરવામાં આવી છે, જેમાં રાજયમાં આજે શુક્રવારથી માવઠાનું અનુમાન છે. આ સમય દરમિયાન તાપમાનમાં પણ 3થી 4 ડિગ્રીનો ઘટાડો જોવા મળશે, ઉપરાંત સૌરાષ્ટ્રના કેટલાક જિલ્લાઓમાં વરસાદનું પણ અનુમાન સેવાઈ રહ્યું છે. આ ઉપરાંત વલસાડ, ડાંગ, દાદરાનગર હવેલીમાં પણ રસાદની આગાહી કરવામાં આવી છે. હવામાન વિભાગ દ્વારા કરવામાં આવેલી આગાહી પ્રમાણે વાતાવરણના પલટો થવાના કારણે અમદાવાદમાં પણ વાદળછાયું વાતાવરણ રહેશે.
24થી 27 નવેમ્બર કમોસમી વરસાદ :
ત્યારે આ માવઠાની આગાહીને લઈને ખેડૂતોમાં પણ ચિંતાનો માહોલ જોવા મળી રહ્યો છે. માવઠાની આગાહી કરતા હવામાન નિષ્ણાત પરેશ ગોસ્વામીએ જણાવ્યું હતું કે રાજયમાં 24થી 27 નવેમ્બર દરમિયાન કમોસમી વરસાદ થશે, આ ઉપરાંત તેમને એમ પણ કહ્યું કે ઘણા વિસ્તારોમાં ગાજવીજ અને ભારે પવન સાથે બેથી ત્રણ ઇંચ સુધી વરસાદ થવાની શક્યતા છે. તેમને જણાવ્યું કે ઉત્તર ભારત પરથી એક પછી એક વેસ્ટર્ન ડિસ્ટર્બન્સ પસાર થઇ રહ્યા છે. દક્ષિણ ભારતમાં ઈશાનના ચોમાસાની શરુઆત થઇ રહી છે અને અરબી સમુદ્રમાંથી ભેજ આવશે જેના કારણે ગુજરાતના હવામાનમાં અસ્થિરતા જોવા મળશે.
આ વિસ્તારોમાં થશે માવઠું :
પરેશ ગોસ્વામીની આગાહી પ્રમાણે જામનગર, દ્વારકા, પરોબંદરમાં સામાન્ય વરસાદ, કચ્છમાં પણ કમોસમી વરસાદ અને મધ્ય ગુજરાત આણંદ, નડીયાદ, ખેડા, ખંભાત અને વડોદરા જિલ્લામાં પણ સૌરાષ્ટ્રમાં પણ 2 ઈંચ અથવા તેથી વધારે વરસાદ થવાનુ અનુમાન છે. તેમને દક્ષિણ ગુજરાતમાં પણ માવઠાનું અનુમાન વ્યક્ત કર્યું છે. આ ઉપરાંત રાજપીપળા, ગોધરા, દાહોદમાં સામાન્ય વરસાદી ઝાપટાં જોવા મળશે. જયારે ઉતર ગુજરાત બનાસકાંઠા, સાબરકાંઠા, અરવલ્લી, મહેસાણા જિલ્લામાં પણ વાદળછાયું વાતાવરણ જોવા મળશે અને સામાન્ય વરસાદનુ અનુમાન છે.
