પશ્ચિમ આફ્રિકન દેશ નાઇજીરિયાના દક્ષિણ-પશ્ચિમ વિસ્તારમાં આવેલા ઓંડો રાજ્યમાં નાઇજીરિયન વાયુસેનાનું એક સૈન્ય વિમાન દુર્ઘટનાગ્રસ્ત થતાં દેશભરમાં ભારે શોકનો માહોલ છવાઈ ગયો છે. બેનિન સિટીથી લાગોસ તરફ પોતાની નિયમિત સફર પર નીકળેલા ATR-42 મોડેલના આ વિમાનમાં 25 સામાન્ય મુસાફરો અને 7 સૈન્ય ક્રૂ સભ્યો મળીને કુલ 32 લોકો સવાર હતા. ઉડાન ભર્યાના થોડા જ સમયમાં એર ટ્રાફિક કંટ્રોલ સાથેનો સંપર્ક તૂટી જતાં પ્લેન ઇગ્બોકોડા વિસ્તાર નજીક અનિયંત્રિત થઈને તૂટી પડ્યું હતું. આ ભયાનક હોનારતમાં સવાર તમામ 32 લોકોના મોત થયા હોવાની આશંકા વ્યક્ત કરવામાં આવી છે, જેમાં કોઈ પણ વ્યક્તિ જીવિત બચવાની શક્યતા નહિવત્ છે. દેશના પ્રમુખ બોલા અહમદ ટિનુબુએ આ અકસ્માતની સત્તાવાર પુષ્ટિ કરીને મૃતકોના પરિવારજનો પ્રત્યે ઊંડી સંવેદના વ્યક્ત કરી છે.
નિયમિત મિશન દરમિયાન સર્જાયો ભયાનક અકસ્માત
આ દુર્ઘટનાગ્રસ્ત ATR-42 વિમાન કોઈ વિશેષ ઇમરજન્સી કે ઓપરેશનલ ફ્લાઇટ પર નહોતું, પરંતુ બેનિન સિટીથી લાગોસ માટેની રોજિંદી સામાન્ય સૈન્ય સફર પર હતું. વિમાને ઉડાન ભર્યાના થોડા જ સમયમાં ઓંડો રાજ્યના ઇગ્બોકોડા વિસ્તાર નજીક અચાનક એર ટ્રાફિક કંટ્રોલ સાથેનો તેનો સંપર્ક કાપી નાખ્યો હતો અને જોતજોતામાં પ્લેન જમીનદોસ્ત થઈ ગયું હતું.
કોસ્ટલ વિસ્તારમાંથી કાટમાળ મળતાં સર્ચ ઓપરેશન શરૂ
નાઇજીરિયાના ઉડ્ડયન મંત્રી ફેસ્ટસ કીયામોએ બનાવની વિગતો આપતાં જણાવ્યું કે સોમવારે સવારે વિમાન ગુમ થયા બાદ તેનો કાટમાળ તટવર્તી (કોસ્ટલ) વિસ્તારમાંથી મળી આવ્યો હતો. ઘટનાની જાણ થતાં જ તાબડતોબ બચાવ ટુકડીઓ સ્થળ પર દોડી ગઈ હતી અને બોટની મદદથી પાણી તેમજ કાંઠાના વિસ્તારોમાં મોટા પાયે સર્ચ ઓપરેશન હાથ ધરવામાં આવ્યું હતું.
ટેકનીકલ અને હવામાન કારણોની તપાસ માટે કડક આદેશ
પ્રમુખ બોલા અહમદ ટિનુબુએ આ કરુણ દુર્ઘટનાને પગલે વાયુસેનાને તાત્કાલિક અસરથી સમગ્ર અકસ્માતની નિષ્પક્ષ અને ઊંડાણપૂર્વક તપાસ કરવાનો આદેશ આપ્યો છે. આ તપાસનો મુખ્ય હેતુ અકસ્માત પાછળ કયા ટેકનિકલ ખામી કે હવામાન સંબંધિત કારણો જવાબદાર હતા તે જાણવાનો છે, જેથી ભવિષ્યમાં આવા જીવલેણ બનાવોને અટકાવી શકાય.
🚨 BREAKING: Nigerian military aircraft NGR 931 crashed near Igbokoda, Ondo State. 32 people were aboard. Local reports say all 32 may have died, but officials have yet to confirm the casualty figure as rescue operations continue. https://t.co/oQXOCDF9FN
— HINT News (@9415st) October 5, 2026
નાઇજીરિયામાં સૈન્ય વિમાન દુર્ઘટનાઓનો ઇતિહાસ
નાઇજીરિયા માટે સૈન્ય વિમાન ક્રેશ થવાની આ પહેલી ઘટના નથી, ભૂતકાળમાં પણ આવી મોટી હોનારતો બની ચૂકી છે. મે 2021માં સેનાના સર્વોચ્ચ અધિકારી લેફ્ટનંત જનરલ ઇબ્રાહિમ અત્તાહિરુ સહિત 11 ઉચ્ચ સૈન્ય અધિકારીઓના વિમાન દુર્ઘટનામાં મોત થયા હતા, જ્યારે ઓગસ્ટ 2015માં અન્ય એક સૈન્ય વિમાન ક્રેશ થતાં 7 સૈનિકોએ પોતાના જીવ ગુમાવ્યા હતા.
