વિદેશમાં ફરવા જતાં ભારતીય પ્રવાસીઓના વિવાદાસ્પદ વર્તનની વધુ એક અત્યંત શરમજનક અને ચોંકાવનારી ઘટના સામે આવી છે, જેણે સોશિયલ મીડિયા પર નવો વિવાદ છેડ્યો છે. આ વખતે વિયેતનામના એક ખુબ જ ધમધમતા અને ભરચક નાઈટ માર્કેટની વચ્ચે એક ભારતીય મહિલાએ શરીર પર માત્ર એક સફેદ રંગનો ટૂવાલ લપેટીને જાહેર રસ્તા પર ડાન્સ કર્યો હતો. આ ઘટનાનો વીડિયો ઇન્ટરનેટ પર સામે આવતાની સાથે જ વાયરલ થઈ ગયો છે અને લોકો આ ભારતીય પ્રવાસી યુવતીની હરકત જોઈને આશ્ચર્યમાં મુકાઈ ગયા છે.
વાયરલ થઈ રહેલા આ વીડિયોમાં જોઈ શકાય છે કે આ ભારતીય યુવતી બોલિવૂડની પ્રખ્યાત ફિલ્મ દિલવાલે દુલ્હનિયા લે જાયેંગેના સુપરહિટ ગીત ‘મેરે ખ્વાબોં મેં જો આયે’ પર જોરદાર એનર્જી સાથે નાચી રહી છે. નવાઈની વાત એ છે કે તેના શરીર પર કપડાંને બદલે માત્ર એક નાનો સફેદ ટૂવાલ લપેટેલો દેખાય છે. ડાન્સ કરતી વખતે આ ટૂવાલ વારંવાર પોતાની જગ્યા પરથી ખસી રહ્યો હતો અને તે ખુબ જ અશ્લીલ લાગી રહ્યું હતું, તેમ છતાં આ મહિલા લજ્જા છોડીને હસતાં-હસતાં તેને વારંવાર એડજસ્ટ કરીને પોતાનો ડાન્સ ચાલુ રાખતી જોવા મળે છે.
આ અજીબોગરીબ નજારો જોઈને નાઈટ માર્કેટમાં હાજર વિદેશી પ્રવાસીઓ અને ત્યાંના સ્થાનિક લોકો સરેઆમ સ્તબ્ધ થઈ ગયા હતા. વીડિયોમાં સ્પષ્ટ દેખાય છે કે આસપાસ ઉભેલી ભીડમાંથી કેટલાક લોકો પોતાના મોબાઈલ કાઢીને આ શરમજનક ડાન્સનો વીડિયો રેકોર્ડ કરી રહ્યા હતા, જ્યારે કેટલાક પ્રવાસીઓ નવાઈ પામીને યુવતીની હરકત સામે જોઈ રહ્યા હતા. વીડિયોમાં એક સમયે એવું પણ જોવા મળે છે કે યુવતી જાણીજોઈને લોકોની સામે ફરીને ટૂવાલને ખોલવાનો પ્રયાસ કરે છે, જે સોશિયલ મીડિયા પર ભારે ટીકાનું કારણ બન્યું છે.
ઇન્ટરનેટ પર આ વીડિયો વાયરલ થતાં જ સોશિયલ મીડિયા યુઝર્સ આ મહિલા પર જોરદાર ગુસ્સે ભરાયા છે અને તેની આકરી નિંદા કરી રહ્યા છે. એક ગુસ્સે થયેલા યુઝરે કમેન્ટ બોક્સમાં લખ્યું કે માત્ર વાયરલ થવાના ચક્કરમાં લોકો વિદેશ જઈને પોતાની સંસ્કૃતિ અને દેશની ઇજ્જત કેમ ભૂલી જાય છે? જ્યારે અન્ય એક યુઝરે ચિંતા વ્યક્ત કરતાં લખ્યું કે આવા લોકોના કારણે જ ભારતીય પ્રવાસીઓ હવે આખી દુનિયામાં બદનામ થઈ રહ્યા છે. જોકે આ વિવાદાસ્પદ ડાન્સ કરનારી મહિલાની અસલી ઓળખ હજુ સુધી સાર્વજનિક થઈ નથી.
An Indian tourist’s viral towel dance that shows a complete lack of civic sense. pic.twitter.com/3W1QDNbiDP
— Damn. (@Theonenameddamn) June 8, 2026
અત્રે ઉલ્લેખનીય છે કે છેલ્લા કેટલાક મહિનાઓથી દુનિયાના કેટલાય દેશોમાં ભારતીય પ્રવાસીઓની ગેરવર્તણૂકને લઈને ફરિયાદો સતત વધી રહી છે. અગાઉ પણ કેટલાક પ્રવાસી દેશોએ સત્તાવાર રીતે ચિંતા વ્યક્ત કરી હતી કે ભારતીય પર્યટકો વિદેશી ધરતી પર ગંદકી ફેલાવે છે, મોટેથી ઘોંઘાટ કરે છે અને સ્થાનિક કાયદા કે નિયમોનું સન્માન નથી કરતા. હવે વિયેતનામની બજારમાં બનેલી આ ટૂવાલ ડાન્સવાળી ઘટનાએ વિદેશમાં ભારતીયોની છબી અને તેમની સભ્યતા પર ચાલી રહેલી વૈશ્વિક ચર્ચાને એક નવો અને વિવાદાસ્પદ વળાંક આપી દીધો છે.
