કોરોના વાયરસ છેલ્લા બે વર્ષથી સમગ્ર વિશ્વમાં કહેર વરસાવી રહ્યો છે. તેને કાબુમાં કરવા માટે કોઈ ચોક્કસ દવા નથી બની. હાલમાં માત્ર વેક્સિન જ આધાર છે. વેક્સિન લેવાથી જીવનું જોખમ ઘટી જાય છે. પરંતુ એવો કોઈ દાવો નથી કરી શકતુ કે એકવાર વેક્સિન લીધા બાદ કોરોના નહીં થાય.
પરંતુ આ બધાની વચ્ચે ભારતે દુનિયા માટે એક આશાનું કિરણ શોધ્યું છે. ભારતમાં કોરોનાની સારવાર માટે નાક દ્વારા આપવામાં આવતા નોઝલ સ્પ્રેની શોધ કરી છે. આ સ્પ્રે અંગે એવો દાવો કરવામાં આવી રહ્યો છે કે તેના લીધા બાદ 48 કલાકમાં કોરોનાનો ખાતમો કરી શકાય છે.
આ સ્પ્રેને ભારતીય કંપની ગ્લેનમાર્ક ફાર્માએ કેનેડિયનની બાયોટેક ફર્મ SaNOtize સાથે મળીને તૈયાર કર્યો છે. આ નેશલ સ્પ્રેનું નામ ફેબી સ્પે(Fabispray) રાખવામાં આવ્યું છે. નાક વાટે દેવામાં આવતી આ દવાનું નામ છે નાઈટ્રિક ઓક્સાઈડ.
આ સ્પ્રેનો ઉપયોગ 18 વર્ષથી ઉપરની ઉંમરના કોરોના સંક્રમિત વ્યક્તિ કરી શકે છે. કંપનીએ આ સ્પ્રેના લોન્ચિંગ પહેલા દેશની 20 હોસ્પિટલોમાં 306 દર્દીઓ પર અભ્યાસ કર્યો હતો. ત્યારબાદ કંપનીએ એક નિવેદન જારી કર્યું હતું. જેમા કહેવામાં આવ્યું છે કે, ટ્રાયલના ત્રીજા તબક્કામાં જોવા મળ્યું કે આ સ્પ્રે આપ્યાના 24 કલાક બાદ વાયરસનો લોડ 94 ટકા ઘટી જાય છે જ્યારે 48 કલાક બાદ કોરોનાનો લોડ 99 ટકા સુધી ઘટી જાય છે.
આમ આ સ્પ્રે લીધાના બે દિવસમાં લોકોને કોરોનાથી મૂક્તિ મળે છે. એવુ પણ કહેવામાં આવે છે કે આ સ્પ્રે લીધા બાદ વાયરસ નબળો પડી જાય છે અને તે શ્વાસ નળીમાં જ બેઅસર થઈ જાય છે. જેથી દર્દીને ગંભીર સંક્રમણ થતું નથી. >
આ ઉપરાંત ફેફસામાં સંક્રમણ પહોંચતું ન હોવાથી લોકોના જીવને જોખમ પણ રેહતું નથી. કંપનીએ એવો પણ દાવો કર્યો છે કે આ સ્પ્રેનો અભ્યાસ અમેરિકામાં પણ કરવામાં આવ્યો છે, જેના રિઝર્લ્ટ બતાવે છે કે કોરોનાના આલ્ફા,બીટા, ગામા,ડેલ્ટા અને એપ્સીલોન વેરિએન્ટને આ નોઝલ સ્પ્રે ફક્ત બે મિનિટમાં ખતમ કરી શકે છે.
ગ્લેનમાર્ક ફાર્માને ભારતમાં તેને વેચવા માટે ડ્રગ કંટ્રોલરની મંજૂરી મળી ગઈ છે. કંપની આ દવાને ઈઝરાયલ,થાઈલેન્ડ,બહરીન,ઈન્ડોનેશિયા અને સિંગાપુરમાં પણ વેચશે. જો કે આ સ્પ્રે બજારમાં કઈ તારીખથી મળશે તે અંગે કોઈ ચોક્કસ માહિતી સામે આવી નથી. પરંતુ જો આ સ્પ્રે માર્કેટમાં આવે છે અને કંપનીના દાવા પ્રમાણે રિઝલ્ટ જોવા મળે છે તો આ એક કોરોના સામે મોટી સિદ્ધી હશે.
