કશ્યપ પ્રમોદ પટેલ (કાશ પટેલ) એ શનિવારે ભગવદ ગીતા પર હાથ રાખી યુએસ તપાસ એજન્સી FBIના ડિરેક્ટર તરીકે શપથ લીધા. આ તપાસ એજન્સીના વડા તરીકે નિયુક્ત થનારા તેઓ નવમાં વ્યક્તિ છે. શપથ ગ્રહણ સમારોહ વોશિંગ્ટનમાં વ્હાઇટ હાઉસ સંકુલમાં આઇઝનહોવર એક્ઝિક્યુટિવ ઓફિસ બિલ્ડીંગ (EEOB) ના ઇન્ડિયન ટ્રીટી રૂમમાં યોજાયો હતો. તેનું આયોજન યુએસ એટર્ની જનરલ પામ બોન્ડીએ કર્યું હતું.
યુએસ પ્રમુખ ડોનાલ્ડ ટ્રમ્પે પટેલની નિમણૂકની પ્રશંસા કરી હતી અને એફબીઆઈ એજન્ટોમાં તેમના આદરની નોંધ લીધી હતી. ટ્રમ્પે કહ્યું, “મને કાશ ગમે છે અને હું તેમને આ પદ પર નિયુક્ત કરવા માંગતો હતો કારણ કે FBI એજન્ટો તેમના માટે આદર રાખતા હતા.” તેમણે કહ્યું, “તેઓ આ પદ માટે શ્રેષ્ઠ રહેશે. તેઓ ખૂબ જ મજબૂત અને કઠિન વ્યક્તિ છે.
તેમના પોતાના વિચારો છે. ટ્રે ગોવડીએ એક મહાન નિવેદન આપ્યું અને કહ્યું કે કાશ એક અસાધારણ વ્યક્તિ છે અને લોકો તેને સમજી શકતા નથી. જ્યારે તેમણે આ કહ્યું, ત્યારે કોઈ શંકા નહોતી. તે એક મહાન નિવેદન હતું, જે એક આદરણીય અને મધ્યમ વિચારસરણી ધરાવતા વ્યક્તિ દ્વારા કરવામાં આવ્યું હતું.” કાશ પટેલની નિમણૂકને ગુરુવારે સેનેટ દ્વારા 51-49 મતથી મંજૂરી આપવામાં આવી હતી. બે રિપબ્લિકન સેનેટર, સુસાન કોલિન્સ (મેઈન) અને લિસા મુર્કોવસ્કી (અલાસ્કા) તેમની નિમણૂકનો વિરોધ કરવામાં ડેમોક્રેટ્સ સાથે જોડાયા.
કાશ પટેલ ભારતીય મૂળના વ્યક્તિનો પુત્ર છે. તેમનો જન્મ એક ગુજરાતી પરિવારમાં થયો હતો. કાશ પટેલના માતા-પિતા યુગાંડાના શાસક ઇજી અમીનના દેશ છોડવાના ફરમાનથી ડરી 1970ના દશકમાં ભાગી કેનેડાના રસ્તે અમેરિકા પહોંચ્યા હતા. 1988માં પટેલના પિતાને અમેરિકાની નાગરિકતા મળ્યા બાદ એક એરોપ્લેન કંપનીમાં નોકરી મળી. કાશ પટેલ અગાઉ આતંકવાદ વિરોધી ફરિયાદી અને સંરક્ષણ સચિવના ચીફ ઓફ સ્ટાફ તરીકે સેવા આપી ચૂક્યા છે.
તે એફબીઆઈના આલોચક પણ રહ્યા છે. તેમની પુષ્ટિથી ડેમોક્રેટ્સમાં ચિંતા વધી છે, જેઓ તેમના નેતૃત્વ હેઠળ એજન્સીની સ્વતંત્રતા અંગે ચિંતિત છે. કાશ પટેલ ક્રિસ્ટોફર રેનું સ્થાન લેશે, જેમને 2017 માં ટ્રમ્પ દ્વારા નિયુક્ત કરવામાં આવ્યા હતા. ટ્રમ્પ સાથેના તેમના ગાઢ સંબંધોને કારણે, શું તેઓ FBI પરંપરાઓનું પાલન કરશે કે કેમ તે અંગે તેમની નિમણૂક અંગે પ્રશ્નો ઉભા થઈ રહ્યા છે. જણાવી દઈએ કે ડિરેક્ટરનો 10 વર્ષનો કાર્યકાળ એજન્સીને રાજકીય પ્રભાવથી બચાવવા માટે છે.
