શહીદ કમાન્ડો જ્યોતિ પ્રકાશ નિરાલા જે ભારતીય વાયુસેના વીર સપૂત હતા તેમને કાશ્મીરના બાંદિપોરામાં દેશની રક્ષા કરતા સમયે આતંકવાદીઓ સામેની લડતમાં પોતાના પ્રાણ ન્યોછાવર કરી દીધા હતા. થોડા વર્ષો પહેલા જ તેમની બહેન શશીકલાના લગ્ન હતા. જેના લગ્નમાં ભાઈ શહીદ થયા હોવાના કારણે હાજર નહોતો, પરંતુ આ ખોટ 100 ભાઈઓએ ભેગા મળીને પૂર્ણ કરી.
ગરુડ કમાન્ડોની ટીમના જાંબાજ કમાન્ડો નીરાલાની બહેન શશીકલાના લગ્નમાં આવી પહોંચ્યા હતા. આ 100 કમાન્ડોએ શશીકલાને ભાઈની ખોટ મહેસુસ ના થવા દીધી.બહેનના લગ્નમાં પહોંચેલા આ 100 ભાઈઓએ બધાનું દિલ જીતી લીધું હતું અને આ દૃશ્ય જોઈને ગામના લોકો સાથે જાનૈયાઓ પણ ભાવુક થઇ ગયા હતા.
ગરુડ કમાન્ડોના આ 100 કમાન્ડોએ ગામની પરંપરા નિભાવતા પોતાની લાડલી બહેન સામે જમીન ઉપર હથેળી રાખીને ઘરમાંથી વિદાય પણ આપી હતી. સ્નેહ અને કરુણાની આ ક્ષણમાં નીરાલાના પિતાએ તેમના ઘરે લગ્નમાં આવેલા એ બધા જ જવાનોનો આભાર પણ વ્યક્ત કર્યો હતો.
શહીદ નિરાલાની બહેન શશીકલાના લગ્ન બિહારના પાલી રોડ ડહેરીના રહેવાવાળા સુજીત કુમાર સાથે ખુબ જ ધામધૂમથી કરવામાં આવ્યા. એટલું જ નહીં પરિવારના એકમાત્ર સદસ્ય નિરાલાના શહીદ થયા બાદ બહેનના લગ્ન માટે 100 ગરુડ કમાન્ડો ભાઈઓએ 5 લાખ રૂપિયા દાન પણ આપ્યા. જેના કારણે બહેન લગ્નમાં કોઈ કમી ના રહી જાય.
