અમદાવાદ પ્લેન ક્રેશ જેવી ઘટના અમેરિકામાં ! એરપોર્ટ પરથી ઉડાન ભરતા જ વિમાન નીચે પડ્યું ને આગના ગોળામાં તબ્દિલ થયુ- 3ના મોત

અમેરિકામાં વિમાન અકસ્માત, લુઇસવિલે ઇન્ટરનેશનલ એરપોર્ટથી ઉડાન ભરતા જ કાર્ગો પ્લેન થયુ ક્રેશ, આગના ગોળામાં ફેરવાયુ- જુઓ વીડિયો

અમેરિકાના લુઇસવિલે મુહમ્મદ અલી ઇન્ટરનેશનલ એરપોર્ટ પરથી ઉડાન ભરતા જ એક UPS કાર્ગો પ્લેન ક્રેશ થયું અને ભીષણ આગ ફાટી નીકળી, જેના કારણે અધિકારીઓએ એરસ્પેસ બંધ કરવાની ફરજ પડી અને નજીકના રહેવાસીઓને સ્થળાંતર કરવાનો આદેશ આપ્યો. અધિકારીઓએ જણાવ્યું હતું કે UPS ફ્લાઇટ 2976, મેકડોનેલ ડગલસ MD-11F, 4 નવેમ્બરના રોજ સ્થાનિક સમય મુજબ સાંજે 5:15 વાગ્યે ઉડાન પછી તરત જ ક્રેશ થઈ ગઈ.

કાર્ગો પ્લેન લુઇસવિલેથી હોનોલુલુ જઈ રહ્યું હતું. એરપોર્ટ યુએસ ડિલિવરી જાયન્ટ UPS વર્લ્ડપોર્ટનું મુખ્ય મથક છે, જે એર કાર્ગો કામગીરી માટે કંપનીના વૈશ્વિક કેન્દ્ર અને તેની સૌથી મોટી પેકેજ હેન્ડલિંગ સુવિધા તરીકે સેવા આપે છે. યુપીએસની માલિકીનું મેકડોનેલ ડગ્લાસ MD-11 વિમાન 1991 માં બનાવવામાં આવ્યું હતું.

કેન્ટુકીના ગવર્નરે X પર એક પોસ્ટમાં અકસ્માતની પુષ્ટિ કરી છે. UPS દ્વારા જારી કરાયેલા એક નિવેદનમાં કહેવામાં આવ્યું હતું કે ત્રણ ક્રૂ મેંબર સવાર હતા, ઘટના પછી લુઇસવિલે મેટ્રો પોલીસ અને અન્ય ઘણી એજન્સીઓ ઘટનાસ્થળે પહોંચી હતી.

સોશિયલ મીડિયા પરના વીડિયોમાં એરપોર્ટ નજીક કાળા ધુમાડાના મોટા ગોટેગોટા જોવા મળી રહ્યા છે. કેન્ટુકીના ગવર્નર એન્ડી બેશિયરે જણાવ્યું હતું કે વિમાન દુર્ઘટનામાં ઓછામાં ઓછા ત્રણ લોકોના મોત થયા છે, અને 11 ઘાયલ થયા છે. લુઇસવિલે મુહમ્મદ અલી ઇન્ટરનેશનલ એરપોર્ટ UPS માટે વિશ્વનું સૌથી મોટું કેન્દ્ર છે.

કંપનીનું વર્લ્ડપોર્ટ અહીં આવેલું છે, જે 5 મિલિયન ચોરસ ફૂટમાં ફેલાયેલું છે. આ વિશાળ સુવિધામાં 12,000 થી વધુ કર્મચારીઓ દરરોજ આશરે 2 મિલિયન પાર્સલનું પ્રોસેસિંગ કરે છે. આ જ કારણ છે કે આ અકસ્માત UPS માટે મોટી ચિંતાનો વિષય બની ગયો છે.