બર્ફીલા પહાડમાં ટીન બોક્સમાં ફસાઇ ગયુ હતુ હિમાલયી રીંછનું માથુ, આર્મીએ રેસ્ક્યુ બાદ કર્યુ દિલને સ્પર્શી જાય એવું કામ

ઇન્ડિયન આર્મી દેશની સુરક્ષા માટે સીમાઓ પર ડટેલી રહે છે. અન્ય દેશો સાથેની ભારતની સરહદમાં કેટલીક એવી જગ્યાઓ છે જ્યાં હંમેશા હિમવર્ષા થતી રહે છે. આવી સ્થિતિમાં ઈન્ટરનેટ પર એક વીડિયો વાયરલ થઈ રહ્યો છે, જેમાં સેનાના જવાનો બરફીલા પહાડો પર બચાવ અભિયાન હાથ ધરતા જોવા મળી રહ્યા છે.

આ રેસ્ક્યુ ઓપરેશનમાં આર્મીના તમામ જવાનો હિમાલયન બ્રાઉન રીંછને બચાવતા જોવા મળે છે. રીંછનું માથું ટીનના બોક્સમાં અટવાયું છે જેના કારણે તે ખૂબ જ ડરી ગયો છે. સેનાના જવાનો દ્વારા બચાવ દરમિયાન પણ તે ઘણી વખત તેમની પકડમાંથી છટકવાનો પ્રયાસ કરે છે. પરંતુ સેનાના જવાનોએ તેને સફળતાપૂર્વક બચાવી લીધો. બચાવ પછી સેનાના જવાનો જે કરે છે તે દરેકના હૃદયને સ્પર્શી જાય છે.

વીડિયોમાં બ્રાઉન હિમાલયન રીંછનું માથું ટીનના ડબ્બામાં ફસાયેલુ જોવા મળી રહ્યુ છે. રીંછ તેનું માથું બોક્સમાંથી બહાર કાઢવા માટે સંઘર્ષ કરી રહ્યો છે. આ દરમિયાન લગભગ 5-6 સૈનિકો તેને પકડીને તેમની ચોકી પર લઈ જાય છે. જ્યારે આર્મી મેન તેને પોસ્ટ પર લઈ જાય છે, ત્યારે તે વધુ ડરી જાય છે. આ પછી આર્મીમેન બ્રાઉન રીંછના માથામાંથી ટીન બોક્સને સંપૂર્ણ ગંભીરતા સાથે હટાવવાનું શરૂ કરે છે.

લગભગ દોઢ મિનિટ સુધી રીંછને નુકસાન પહોંચાડ્યા વિના, તેઓ નરમાશથી તેના માથામાંથી ટીન દૂર કરે છે અને તેને મુક્ત કરે છે. જો કે વીડિયોના અંતમાં સેનાના જવાનો તેને બરફના પહાડોની વચ્ચે છોડીને જાય છે પરંતુ તે પહેલા તે તેને ખાવાનું પણ આપે છે. આર્મીના જવાનો હિમાલયન બ્રાઉન રીંછને ‘બહાદુર’ ઉપનામ પણ આપે છે. આ પછી રીંછ ત્યાંથી નીકળી જાય છે. હવે જ્યારે આ ક્લિપ વાયરલ થઈ છે, ત્યારે યુઝર્સ પણ તેના પર ઉગ્ર પ્રતિક્રિયા આપી રહ્યા છે.