ગુજરાતમાંથી ઘણીવાર રહસ્યમય મોતના મામલા સામે આવે છે, ત્યારે હાલમાં જ વડોદરામાંથી આવો મામલો સામે આવ્યો. એક વિદ્યાર્થી જે ફિઝિયોથેરાપી કોલેજમાં અભ્યાસ કરતો હતો તેનું રહસ્યમય મોત નિપજ્યું હોવાનું સામે આવ્યુ છે. પલવેપુરના મકાનમાં વિદ્યાર્થી રાતે સુઇ ગયા બાદ સવારે ઉઠ્યો જ હતો. પ્રાપ્ત જાણકારી અનુસાર, લુણાવાડાના સોનિયાના મુવાડા ખાતે પટેલ ફળિયામાં રહેતો 19 વર્ષિય અક્ષય ચૌધરી રાજસ્થાનના ઉદયપુર ખાતેની ફિઝિયોથેરાપી કોલેજમાં અભ્યાસ કરતો હતો.
તે પહેલા વડોદરા નજીકની કોલેજમાં અભ્યાસ કરતો હોવાથી બે દિવસ પહેલાં વડોદરા નજીક અક્ષર રેસિડેન્સી ખાતે રહેતા મિત્રોને મળવા અને તેમની સાથે રહેવા માટે આવ્યો હતો. ત્યારે ગતરોજ મિત્રો સાથે પુલાવ ખાઇ છાસ પીધા બાદ તે બીજા મિત્રના રૂમમાં જઇને ઊંઘી ગયો અને બીજા દિવસે સવારે તેનો મિત્ર અક્ષયને ઊંઘમાં જ મૂકીને કોલેજ જતો રહ્યો.
જો કે તેણે બાદમાં અક્ષયને ફોન કર્યો પણ તેણે ફોન ના ઉઠાવતા ચિંતામાં આવી મિત્રોએ રૂમમાં આવી તપાસ કરી તો અક્ષય બેભાન જણાઇ આવ્યો અને આ પછી તેને તાત્કાલિક હોસ્પિટલ લઇ જવાયો. જો કે ત્યાં સુધી તેનું મોત થઇ ગયુ હતુ. ડોક્ટરના પ્રાથમિક અભિપ્રાય મુજબ ઝેર પીધું હોવાનું કહેવાઇ રહ્યુ છે. હાલ તો વાઘોડિયા પોલીસે અકસ્માત મોતની નોંધ કરી, તપાસ શરૂ કરી છે. જો કે મોતનું સાચું કારણ તો રિપોર્ટ આવ્યા બાદ જ ખબર પડશે.
