પાલનપુરમાં 2 પાક્કા મિત્રોને મજાક મજાકમાં મળ્યું મોત, આવી મસ્તી કરતા પહેલા ચેતી જજો નહિ તો સીધા ભગવાન પાસે પહોંચી જશો
ગુજરાતમાં છેલ્લા કેટલાય સમયથી અકસ્માતની ઘણી બધી ઘટનાઓ સામે આવી રહી છે, આવા અકસ્માતમાં કેટલાય લોકો પોતાનો જીવ પણ ગુમાવતા હોય છે, ઘણીવાર મસ્તી મજાક કરવા દરમિયાન કંઈક એવું થઇ જાય છે જેના કારણે પણ કોઈનો જીવ જતો હોય છે, હાલ એવી જ એક ઘટના પાલનપુરમાંથી સામે આવી છે. જ્યાં મજાક મસ્તીમાં જ એક મિત્ર મોતને ભેટ્યો હતો.
આ બાબતે પ્રાપ્ત માહિતી અનુસાર પાલનપુર હાઇવે ઉપર આવેલા એક કોમ્પ્લેક્સના ત્રીજા માળની રેલિંગ ઉપર એક મિત્ર બેઠો હતો, ત્યારે જ બીજો મિત્ર ત્યા આવ્યો અને તેની સાથે મસ્તી કરવા માટે ગયો, આ દરમિયાન જ તેમનું સંતુલન બગડ્યું અને તે બંને ત્રીજા માળેથી નીચે પટકાયા હતા. આ ઘટનામાં એક મિત્રનું મોત નીપજ્યું હતું જયારે અન્ય એક મિત્ર ગંભીર રીતે ઘાયલ થતા તેને સારવાર માટે હોસ્પિટલમાં ખસેડવામાં આવ્યો હતો.
આ સમગ્ર ઘટના કોમ્પ્લેક્સમાં લાગેલા સીસીટીવી કેમેરામાં કેદ થઇ ગઈ હતી, જેનો વીડિયો પણ હાલ સોશિયલ મીડિયામાં વાયરલ થઇ રહ્યો છે, જેમાં જોવા મળી રહ્યું છે કે એક મિત્ર શાંતિથી રેલિંગ ઉપર બેઠો છે, ત્યારે જ એક બીજો મિત્ર આવે છે અને બીજા મિત્રની કમર ઉપર હાથ મૂકે છે. ત્યારે રેલિંગ ઉપર બેઠેલો મિત્ર નીચો નમે છે અને બંને પોતાનું સંતુલન ખોઈ બેસે છે અને નીચે પટકાય છે.
આ ઘટનાની જાણ થતા જ લોકોના ટોળા પણ ઉમટી પડ્યા હતા.પોલીસ પણ તાત્કાલિક ઘટના સ્થળે દોડી આવી હતી અને અકસ્માતનો ગુન્હો નોંધીને વધુ તપાસ હાથ ધરી છે. આ ઘટનામાં મોતને ભેટનાર યુવકનું નામ હાર્દિક રમેશભાઈ ઠક્કર છે, જયારે અન્ય મિત્ર મોહણીક રમેશભાઈ ઠક્કરને ગંભીર ઈજાઓ પહોંચી છે. જે હાલ સારવાર હેઠળ હોસ્પિટલમાં છે.