સુરતમાં ભાજપ મહિલા નેતા દીપિકા પટેલનાં આપધાતથી ચકચાર મચ્યો છે. સુરતના અલથાણા વોર્ડ નંબર 30માં ભાજપ મહિલા મોરચાના પ્રમુખ દીપિકા પટેલે પોતાના જ ઘરમાં દુપટ્ટા વડે ફાંસો ખાઈ આત્મહત્યા કરી લીધી છે. રાજકીય ક્ષેત્રે હાલ આ બનાવ ટોક ઓફ ધી ટાઉન બન્યો છે. દીપિકા પટેલના પોસ્ટમોર્ટમ રિપોર્ટમાં આત્મહત્યાની પુષ્ટિ થઈ છે. હાલ પોલીસ તેના મોબાઈલની કોલ ડિટેઈલની તપાસ કરી રહી છે. દીપિકા પટેલે શા માટે આટલું મોટું પગલું ભર્યું તેનું કારણ હજુ સામે આવ્યું નથી.
છેલ્લો ફોન ભાજપના કાઉન્સિલર ચિરાગ સોલંકીને કરવામાં આવ્યો હતો
34 વર્ષની દીપિકા સુરતના અલથાણ વિસ્તારમાં રહેતી હતી. તેણીના લગ્ન નરેશભાઈ પટેલ સાથે થયા હતા. પરિવારમાં બે પુત્ર અને એક પુત્રી છે. પતિ ખેતી કામ કરે છે અને દીપિકા ભાજપ સાથે સક્રિયપણે સંકળાયેલી હતી. ભાજપે દીપિકાને વોર્ડ 30ના મહિલા મોરચાના પ્રમુખની જવાબદારી સોંપી હતી. મીડિયા રિપોર્ટ અનુસાર, દીપિકા માત્ર 2 વર્ષ પહેલા જ કાઉન્સિલર ચિરાગ સોલંકીના સંપર્કમાં આવી હતી.દીપિકા પટેલે આપઘાત કર્યો તે પહેલા પોલીસે તેના ઘરની બહારના સીસીટીવી ફૂટેજ કબજે કર્યા છે.
પોલીસ સૂત્રો પાસેથી એવી માહિતી મળી છે કે દીપિકાએ છેલ્લે સુરત મ્યુનિસિપલ કોર્પોરેશનના કાઉન્સિલર ચિરાગ સોલંકીને ફોન કર્યો હતો જેમાં તેણે ચિરાગને કહ્યું હતું કે તે આત્મહત્યા કરી રહી છે. ત્યારબાદ વારંવાર ફોન કરવા છતાં દીપિકાએ ફોન ન ઉપાડ્યો ત્યારે ચિરાગ સોલંકી દીપિકાના ઘરે પહોંચ્યો હતો, જેની પુષ્ટિ સીસીટીવીમાં થઈ છે.
શું કોઈ દીપિકાને બ્લેકમેલ કરી રહ્યું હતું?
પરિવારના આક્ષેપ બાદ પોલીસે ભાજપના કાઉન્સિલર ચિરાગ સોલંકીની ત્રણ કલાક સુધી પૂછપરછ કરી હતી. પોલીસ દીપિકાની આત્મહત્યા પાછળના કારણોની તપાસ કરી રહી છે. એવી આશંકા વ્યક્ત કરવામાં આવી રહી છે કે શું કોઈ દીપિકાને બ્લેકમેલ કરી રહ્યું છે? ડીસીપી વિજય સિંહ ગુર્જરના જણાવ્યા અનુસાર, ડોકટરોએ ફાંસીથી મૃત્યુની પુષ્ટિ કરી છે.
