ગુજરાતમાંથી અવાર નવાર આપઘાતના મામલા સામે આવે છે, ત્યારે હાલમાં રાજકોટમાંથી આપઘાતનો ચોંકાવનારો મામલો સામે આવ્યો.19 ઓક્ટોબરના રોજ લોધીકાના મોટાવડાની સરકારી શાળામાં ધોરણ 11માં અભ્યાસ કરતા એક વિદ્યાર્થીએ ગળે ફાંસો ખાઈ આપઘાત કરી લીધો. આ વિદ્યાર્થીએ આપઘાત પહેલા સુસાઇડ નોટ લખી હતી અને એક વીડિયો પણ બનાવ્યો હતો. વીડિયોમાં રડતાં રડતાં તે સુસાઈડ નોટ બતાવી રહ્યો હતો. એવું કહેવામાં આવી રહ્યુ છે કે સુસાઈડ નોટમાં વિદ્યાર્થીએ પોતાની શાળાના શિક્ષકના કારણે આપઘાત કર્યો હોવાનો ઉલ્લેખ છે.
મૃતક તેના માતા-પિતાનું એકનું એક સંતાન હતો, ત્યારે તેના આપઘાત બાદ પરિવારની હાલત ખરાબ છે. હાલ તો મૃતક વિદ્યાર્થીના પરિવારજનો શિક્ષકોને સસ્પેન્ડ કરવાની માંગ કરી રહ્યા છે અને સાથે 10 વર્ષની સજાની પણ માગ કરી રહ્યા છે. હાલ તો તપાસ અધિકારીના જણાવ્યા પ્રમાણે પ્રથામિક દૃષ્ટિએ થયેલી તપાસમાં કોઇ કારણ સામે આવ્યું નથી. મૃતક વિદ્યાર્થી ધ્રુવિલ વરૂના કાકાએ જણાવ્યું કે, તેમનો ભત્રીજો સ્કૂલેથી ઘરે આવવા માટે બસમાં બેઠો ત્યારે મિત્રોને વાત કરી કે મને મજા નથી આવતી. તેમણે આગળ કહ્યુ કે ધ્રુવિલ સ્કૂલનો મોનિટર હતો અને ભણવામાં પણ ખૂબ હોશિયાર હતો. તેને ધોરણ 10માં 70 ટકાથી વધુ આવ્યા હતા.
જો તે પરીક્ષામાં ચોરી પણ કરતો હોય તો જ્યારે તેને મૌખિક પૂછવામાં આવ્યું તો ત્યારે બધુ આવડી ગયું હતું. ધ્રુવિલ 12:30 વાગ્યા આસપાસ મોટાવડા સ્કૂલેથી છાપરા ગામે ઘરે આવ્યો, ત્યારે ઘરે કોઈ નહોતુ. તે સમયે તેણે સુસાઇડ નોટ લખી અને વીડિયો ઉતાર્યા બાદ આપઘાત કરી લીધો. આ ઉપરાંત મૃતકના કાકાએ વધુમાં જણાવ્યું કે, 11:30 વાગ્યે શાળાએથી છૂટ્યા બાદ તેને ફરી શાળામાં બોલાવવામાં આવ્યો અને શિક્ષકો દ્વારા ધમકાવવામાં આવ્યો કે તને સજા પડશે અને પોલીસવાળા ઉપાડી જશે. એટલે ધ્રુવિલ ગભરાઈ ગયો.
2 શિક્ષિકા અને 1 શિક્ષક દ્વારા ધમકી આપવામાં આવી હતી. આપઘાત પહેલા ધ્રુવિલે સુસાઇડ નોટમાં લખ્યુ- આઇ લવ યુ મોમ, આઇ લવ યુ પાપા. મમ્મી અને પપ્પા મારો કોઈ વાંક ન હતો, મેં સાબિત કરીને આપ્યું કે પેપર મેં ઘરે નથી લખ્યું તો પણ મને પોલીસની ધમકી આપી અને મારા પેપરમાં ચોકડા માર્યા, આવું પહેલીવાર નથી થયુ. કાલે મેં ખુદે પેપર એના હાથમાં આપ્યું હતું તોય એણે મને પોલીસની ધમકી આપી. BAના પેપરમા મારું બધું સાચું લખાણ હતું તો બીજા કોઈને નહિ મારા એક પર જ એવું કરે. મને મોઢે પ્રશ્ન પૂછ્યા અને તેને એકમ કસોટીના પેપરમાં પણ આવું જ કર્યું હતું. ત્યાં પણ મારી પાસે મોઢે પેપર લખ્યાવ્યું અને મારે 25માંથી 23 માર્ક આવ્યા.
મમ્મી જો આજે આ પગલું ના ભર્યું હોત તો સોમવારે હું પોલીસ સ્ટેશનમાં હોત. હું સાચું બોલું છું મમ્મી તારા સમ ખાઈને કહું છું મેં પેપર નથી લખ્યું. મેં સરને ખૂબ જ સમજવાનો પ્રયાસ કર્યો પણ તેઓ મારા પર પોલીસ કેસ કરવાના છે એટલે મેં આ પગલું ભર્યું છે. આ ઉપરાંત તેણે લખ્યુ- મારી સાથે એકમ કસોટીના પેપરમાં કર્યું હતું. સોલંકી સર મારી સાથે પણ મોસમી મેડમ અને સચિન સર અને વિભૂતિ મેડમે મારી સાથે એવું કર્યું. મમ્મી હંસલો મારા ભાઈ જેવો છે એટલે તેને તારો દીકરો માની લેજે. મારા મિત્રોએ મને સાથ આપ્યો છે. મારો પરિવાર ખુશ રહેજો. આ નોટમાં તેણે છેલ્લે લખ્યુ હતુ કે મોબાઈલમાં મારો વીડિયો જુઓ.
