ફિલ્મોની અંદર આપણે ઘણા એક્શન સીન જોઈએ છીએ, જેમાં ગુનેગારો કાર લઈને ભાગતા હોય છે અને પોલીસ તેનો પીછો કરતી હોય છે, ત્યારે ઘણીવાર આવા અપરાધીઓને રોકવા માટે પોલીસ ફાયરિંગ પણ કરતી હોય છે, ત્યારે આવું રિયલ લાઈફમાં થવું અશક્ય જેવું લાગે. પરંતુ હાલ એવા જ કેટલાક દૃશ્યો જોવા મળ્યા, જેણે “ફાસ્ટ એન્ડ ફ્યુરિયસ” ફિલ્મની યાદ અપાવી દીધી હતી.
ફિરજોપૂર્ણ સરહદી જિલ્લાના બંસી ગેટમાં દારૂના દાણચોરો ઝડપભેર સ્વીફ્ટ કાર ચલાવીને લોકોને કચડી નાખતા ભાગી રહ્યા હતા. ત્યારબાદ પોલીસે પીછો કરીને બજાર વચ્ચે ગોળીબાર કર્યો હતો, જ્યારે 10 કિમીના અંતરે બે દાણચોરોને 10 ગ્રામ હેરોઈન સાથે દબોચી લીધા હતા. સમગ્ર દ્રશ્ય ફિલ્મી શૈલીમાં થતું જોવા મળ્યું હતું. પોલીસ અને તસ્કરો વચ્ચેની અથડામણ એટલી ખતરનાક હતી કે આસપાસના લોકો પણ ડરી ગયા હતા અને સમગ્ર મામલો સીસીટીવી કેમેરામાં કેદ થઈ ગયો હતો.
તસ્કરો બેફામ રીતે કારને હંકારી રહ્યા હતા અને કેટલીય કાર તેમજ વાહન ચાલકોને પણ ઈજાઓ થઇ છે, સાથે જ ઘણા પોલીસકર્મીઓ પણ ઘાયલ થવાના અહેવાલ મળી રહ્યા છે. પોલીસ સ્ટેશનના પ્રભારી મોહિત ધવને જણાવ્યું હતું કે પોલીસ દ્વારા નિયમિત ચેકિંગ કરવામાં આવી રહ્યું હતું કે જ્યારે એક સ્વિફ્ટ કારને રોકવાનો પ્રયાસ કર્યો, ત્યારે કાર ચાલકે તેજ ગતિએ ભગાડવાનું શરૂ કર્યું. પોલીસે શંકાના આધારે પીછો કરતાં તસ્કરોએ કારને તેજ ગતિએ ભગાડી જવાનો પ્રયાસ કર્યો હતો.
આ દરમિયાન તસ્કરોના વાહનને કારણે બજારમાં અન્ય વાહનો પર સવાર અનેક લોકો પડી ગયા હતા. પોલીસ કર્મચારીઓ પણ ઘાયલ થયા હતા. પોલીસે સ્વિફ્ટ વાહનને રોકવા માટે ટાયર પર ગોળીબાર કરી પંક્ચર કર્યું હતું. આ દરમિયાન જ્યારે તસ્કરો તેમની કાર આડેધડ રોડ તરફ હંકારી ગયા ત્યારે પોલીસ પણ તેમની પાછળ પડી હતી જે આરીફકે નજીક પોલીસના કાબૂમાં આવી હતી.
યુવકોની ઓળખ માન સિંહ અને રાજબીર સિંહ તરીકે થઈ છે. પોલીસે તેમની પાસેથી પારદર્શક પોલિથીનમાં 10 ગ્રામ હેરોઈન જપ્ત કર્યું છે. પોલીસ દ્વારા યુવકોની પૂછપરછની પ્રક્રિયા ચાલી રહી છે. શહેર પોલીસે યુવકો સામે આઈપીસી અને એનડીપીએસ એક્ટ હેઠળ ઈરાદાપૂર્વક હત્યા અને અન્ય આરોપો હેઠળ ગુનો નોંધ્યો છે. આ ઘટનાનો એક સીસીટીવી ફૂટેજ પણ સામે આવ્યો છે, જેમાં તસ્કરો કાર લઈને ભાગતા અને પોલીસ તેમનો પીછો કરતી જોવા મળી રહી છે.
In ‘#Bollywood Style’ #Punjab police chase and caught two drug peddlers in #Ferozepur district near Bansi gate, during the checking of both peddlers police recovered 10-gm Heroin.#PunjabPolice #india pic.twitter.com/drvhRESf7t
— Siraj Noorani (@sirajnoorani) August 8, 2022
ઈન્સ્પેક્ટર મોહિત ધવને ડ્રગ્સ સ્મગલરો અને ગુંડા તત્વોને ચેતવણી આપી છે કે જો તમારે શહેરમાં રહેવું હોય તો શાંતિથી જીવો. તેમણે કહ્યું કે જે કોઈ પણ ગુનામાં માથું ઊંચું કરવાનો પ્રયાસ કરશે તે કાયદાની નજરથી બચશે નહીં અને તેની સામે કડક કાર્યવાહી કરવામાં આવશે. તેમણે કહ્યું કે શહેરમાં સ્નેચરો, ડ્રગ્સ સ્મગલરો, ગુંડાઓ અને છેતરપિંડી કરનારાઓને માથું ઊંચકવા દેવામાં આવશે નહીં.
