ઉત્તર પ્રદેશમાં કોરોના ચેપની સાથે સાથે કોરોનાના નવા વેરિયન્ટ ઓમિક્રોનનો ખતરો હવે વધુને વધુ લોકોને સતાવી રહ્યો છે. જે લોકો થોડા દિવસો પહેલા કોરોના વાયરસના માનસિક તણાવમાંથી બહાર આવ્યા હતા, તેઓ હવે તે જ સ્થિતિમાં જતા જોવા મળી રહ્યા છે. તેનું જીવતું જાગતું ઉદાહરણ શુક્રવારે યુપીના કાનપુરમાં જોવા મળ્યું. એક પ્રોફેસરે કોરોના વાયરસના નવા પ્રકારના ભયથી એટલો બધો માનસિક તણાવ લીધો કે તેણે તેની પત્ની અને બાળકોની હત્યા કરી નાખી.
ઘટનાસ્થળે પહોંચેલી પોલીસે પ્રોફેસરની એક અંતિમ નોટ પણ કબજે કરી હતી. કાનપુરના રહેવાસી પ્રોફેસર સુશીલ સિંહ રામા મેડિકલ કોલેજના ફોરેન્સિક વિભાગના વડા છે. શુક્રવારે સાંજે પોતાની પત્ની અને બાળકોની હત્યા કરીને ફરાર થયેલા પ્રોફેસર સુશીલ સિંહના રૂમમાંથી ખૂબ જ ચોંકાવનારી અંતિમ નોટ મળી આવી હતી. અંતિમ નોટમાં પ્રોફેસરે લખ્યું છે કે ઓમિક્રોન બધાને મારી નાખશે, હવે મૃતદેહોની ગણતરી કરવાની નથી. મારી બેદરકારીને કારણે હું મારી કારકિર્દીના એવા તબક્કે અટવાઈ ગયો છું, જ્યાંથી બહાર નીકળવું અશક્ય છે. મારું કોઈ ભવિષ્ય નથી.
તેથી હું સભાનપણે મારા કુટુંબનો નાશ કરીને મારી જાતને નષ્ટ કરી રહ્યો છું. આ માટે અન્ય કોઈ જવાબદાર નથી. શુક્રવારે સાંજે પત્ની અને બાળકોની હત્યા કર્યા બાદ પ્રોફેસરે તેના ભાઈને વોટ્સએપ દ્વારા ઘટનાની જાણ કરી હતી. પોલીસે ઘરમાંથી પત્ની અને બંને બાળકોના મૃતદેહ કબજે કર્યા હતા. પ્રોફેસર વિશે હાલ કંઈ ખબર નથી. ટ્રિપલ મર્ડરની ઘટનાને અંજામ આપનાર પ્રોફેસરે પોતાની અંતિમ નોટમાં પોતાને કોઈ અસાધ્ય રોગનો દર્દી ગણાવ્યો હતો. પ્રોફેસરે લખ્યું, ‘હું એક અસાધ્ય રોગથી પીડિત છું. કોઈ ભવિષ્ય નથી. મારી પાસે કોઈ વિકલ્પ નથી. હું મારા પરિવારને મુશ્કેલીમાં છોડી શકતો નથી.
તેણે આગળ લખ્યુ કે, હું દરેકને મુક્તિના માર્ગ પર છોડી રહ્યો છું. હું એક જ ક્ષણમાં બધી મુશ્કેલીઓ દૂર કરું છું. હું મારી પાછળ કોઈને મુશ્કેલીમાં જોઈ શકતો નથી. મારો આત્મા મને માફ કરતો નથી. ગુડબાય… આંખની અસાધ્ય બિમારીને કારણે આ પગલું ભરવું પડ્યું. વાંચન એ મારો વ્યવસાય છે. હવે આંખ જ બાકી નથી ત્યારે હું શું કરીશ? કલ્યાણપુર વિસ્તારના ડિવિનિટી એપાર્ટમેન્ટમાં પ્રોફેસર પત્ની અને બે બાળકોની હથોડી વડે હત્યા કરીને ફરાર થઈ ગયો હતો. પ્રોફેસર સુશીલ સિંહ ડિવિનિટી હોમ એપાર્ટમેન્ટ્સના પાંચમા માળે ફ્લેટ નંબર 501માં રહે છે. પત્ની ચંદ્રપ્રભા, પુત્ર શિખર સિંહ અને પુત્રી ખુશી સિંહ ઘરમાં હતા ત્યારે શુક્રવારે સાંજે લગભગ 5.32 કલાકે સુશીલે તેના નાના ભાઈ સુનિલ સિંહને વોટ્સએપ પર મેસેજ કર્યો હતો.
મેસેજ જોઇ સુનિલ સિંહ ચોકી ગયા હતા, કારણ કે તેમાં લખ્યું હતુ કે સુનીલ પોલીસને જાણ કર મેં ડિપ્રેશનમાં ચંદ્રપ્રભા, શિખર અને ખુશીની હત્યા કરી છે. મેસેજ જોઈને સુનીલ તરત જ પીએચસીમાંથી નીકળીને તેના ભાઈના ઘરે પહોંચી ગયો. અહીં ફ્લેટમાં સેન્ટ્રલ લોક હતું, જેને તેણે ગાર્ડની મદદથી તોડી નાખ્યું હતું. જ્યારે તે અંદર પ્રવેશ્યો ત્યારે ત્યાં લોહીથી લથબથ લાશ પડી હતી. આ અંગે સુનિલે પોલીસને જાણ કરી હતી. આ ઘટનાની માહિતી મળતાં જ પોલીસ કમિશનર, એડિશનલ કમિશનર પહોંચી ગયા અને તપાસ શરૂ કરી. પોલીસને સ્થળ પરથી એક ડાયરી મળી. પોલીસનું કહેવું છે કે હત્યારો પ્રોફેસર સુશીલ કુમાર ફરાર છે અને તેની ધરપકડ બાદ જ હત્યા અંગેની માહિતી મળી શકશે.
