“આદિપુરુષ” ફિલ્મ વિરુદ્ધ કોર્ટમાં દાખલ થઇ PIL, હિન્દુઓની લાગણીને દુભાવવાનો લાગ્યો આરોપ, જાણો સમગ્ર મામલો
PIL Against Adipurush : દર્શકો જેની આતુરતાથી રાહ જોઈને બેઠા હતા એ ફિલ્મ “આદિપુરુષ” ગઈકાલે જ થિયેટરમાં રિલીઝ થઇ. ફિલ્મ રિલીઝ થઇ એ પહેલા લોકોમાં ફિલ્મને લઈને ખુબ જ ઉત્સાહ જોવા મળ્યો હતો. પરંતુ ફિલ્મ જોયા બાદ દર્શકોએ આ ફિલ્મને લઈને પોતાનો ગુસ્સો પણ વ્યક્ત કર્યો છે. ફિલ્મ રિલીઝ થતા પહેલા પણ ઘણા વિવાદોમાં હતી, ત્યારે હવે રિલીઝ બાદ પણ આ ફિલ્મને લઈને વિવાદ વકર્યો છે.
ફિલ્મમાં રામાયણની વાર્તા અને સંવાદોના સ્તર સાથે છેડછાડથી દર્શકોની ભાવનાઓને ઠેસ પહોંચી છે, ત્યાર બાદ હવે હિન્દુ સેનાએ ‘આદિપુરુષ’ વિરુદ્ધ દિલ્હી હાઈકોર્ટમાં રિટ પિટિશન દાખલ કરી છે. આ અરજીમાં હિન્દુ સેનાએ ‘આદિપુરુષ’ના જાહેર પ્રદર્શન પર પ્રતિબંધ મૂકવાની માંગ કરી છે. હિન્દુ સેનાના રાષ્ટ્રીય અધ્યક્ષ વિષ્ણુ ગુપ્તાએ કહ્યું કે તેમણે દિલ્હી હાઈકોર્ટમાં આદિપુરુષ વિરુદ્ધ જાહેર હિતની અરજી (PIL) દાખલ કરી છે.
‘આદિપુરુષ’ સામે દાખલ કરાયેલી રિટ અરજીમાં જણાવાયું છે કે તે ભારતના બંધારણની કલમ 226 હેઠળ જાહેર હિતની અરજી છે. આ હેઠળ, ધાર્મિક નેતાઓ/પાત્ર/આકૃતિઓ ખોટી રીતે બતાવવાની રહેશે અને વાંધાજનક દ્રશ્યો દૂર કરવાના રહેશે અને ફીચર ફિલ્મને જાહેર સ્ક્રીનિંગ માટે પ્રમાણિત કરવાની જરૂર રહેશે નહીં.
જણાવી દઈએ કે અરજીમાં ‘આદિપુરુષ’ પર ફિલ્મમાં ધાર્મિક નેતાઓ, પાત્રો અને વ્યક્તિઓને ખોટી રીતે રજૂ કરવાનો આરોપ લગાવવામાં આવ્યો છે, જેનાથી હિન્દુ સમુદાયની ભાવનાઓને ઠેસ પહોંચી છે. મહર્ષિ વાલ્મીકિ જેવા લેખકો દ્વારા લખવામાં આવેલી રામાયણમાં જે રીતે હિંદુ ધાર્મિક પાત્રો કહેવામાં આવ્યા છે, તે રીતે ફિલ્મમાં ખોટા દ્રશ્યો દર્શાવવામાં આવ્યા છે.
તમને જણાવી દઈએ કે ઓમ રાઉતની ‘આદિપુરુષ’ હિંદુ મહાકાવ્ય રામાયણ પર આધારિત ફિલ્મ છે. ફિલ્મમાં પ્રભાસ ‘ભગવાન રામ’ના રોલમાં, કૃતિ સેનન ‘સીતા’ના રોલમાં અને સની સિંહ ‘લક્ષ્મણ’ના રોલમાં જોવા મળશે. સાથે જ સૈફ અલી ખાને ‘રાવણ’નો રોલ કર્યો છે. આ ફિલ્મનું ટ્રેલર રિલીઝ થયું ત્યારથી વિવાદોમાં ઘેરાયેલું હતું, ત્યારપછી નિર્માતાઓએ ઘણા ફેરફાર કરવા પડ્યા હતા. હવે આ ફિલ્મ રિલીઝ થઈ ગઈ છે, જેને જોયા બાદ દર્શકો તેના પર મિશ્ર પ્રતિભાવો આપી રહ્યા છે.
