ચંદ્રયાનના સફળ લેન્ડિંગ બાદ વિદેશી મીડિયા પણ કરવા લાગ્યું ભારતના વખાણ, દુનિયા પણ ISRO સાથે કામ કરવા થઇ ગઈ નતમસ્તક, જુઓ
Many countries ready to work with ISRO: ભારતે બુધવારે ચંદ્રના દક્ષિણ ધ્રુવ પર ચંદ્રયાન-3નું સોફ્ટ લેન્ડિંગ કરીને ઈતિહાસ રચ્યો છે. આમ કરીને ભારત ચંદ્રની સપાટી પર પગ મૂકનાર વિશ્વનો ચોથો દેશ બની ગયો છે. તે જ સમયે, ભારત ચંદ્રના દક્ષિણ ધ્રુવ પર લેન્ડર લેન્ડ કરનાર વિશ્વનો પ્રથમ દેશ બની ગયો છે. ચંદ્રયાન-3ના સફળ ઉતરાણ બાદ ભારતીય સંશોધન કેન્દ્ર એટલે કે ઈસરોની વિશ્વભરમાં પ્રશંસા થઈ રહી છે.
ઘણા દેશો ISRO સાથે કામ કરવા તૈયાર :
ઈસરોની આ સફળતા બાદ દુનિયાના ઘણા દેશોએ ભારતને સહયોગ કરવાની ઈચ્છા વ્યક્ત કરી છે. જેમાં સાઉદી અરેબિયા, દક્ષિણ કોરિયા સહિત ઘણા દેશોના નામ સામેલ છે. ટાઈમ્સ ઓફ ઈન્ડિયાના અહેવાલ મુજબ દક્ષિણ કોરિયા, સિંગાપોર, સાઉદી અરેબિયાએ તેમના ઘણા પ્રોજેક્ટ માટે ભારતને મદદ કરવાની ઈચ્છા વ્યક્ત કરી છે. આ વાતની પુષ્ટિ કરતા કેન્દ્રીય મંત્રી પીયૂષ ગોયલે કહ્યું કે ભારત સ્પેસ સેક્ટરમાં ઘણા પ્રોજેક્ટ્સ પર સંશોધન કરવા અને વિશ્વના અન્ય દેશોને મદદ કરવા તૈયાર છે.
14 જુલાઈના રોજ થયું હતું લોન્ચ :
ઈસરોના ચંદ્ર મિશન ચંદ્રયાન-3માં 600 કરોડ રૂપિયાથી વધુનો ખર્ચ કરવામાં આવ્યો છે. ચંદ્રયાન 3 14 જુલાઈના રોજ શ્રીહરિકોટાના સતીશ ધવન સ્પેસ સેન્ટરથી લોન્ચ કરવામાં આવ્યું હતું. ચંદ્રયાનના સફળ લેન્ડિંગ પછી, ભારત ચંદ્રના દક્ષિણ ધ્રુવ પર તેના અવકાશયાનને લેન્ડ કરનાર વિશ્વનો પ્રથમ દેશ બની ગયો છે.
વિદેશી અખબારોએ કરી વાહવાહ :
આ ઉપરાંત વિદેશી મીડિયામાં પણ ભારતની વાહ વાહ થઇ રહી છે. સાઉદી અરેબિયાના અખબાર અલ અરેબિયાએ લખ્યું છે કે ભારતે એક ઐતિહાસિક ક્ષણમાં ચંદ્રયાન-3ને ચંદ્રના દક્ષિણ ધ્રુવ પર સફળતાપૂર્વક લેન્ડ કર્યું છે. અમેરિકાના ન્યૂઝ નેટવર્ક સીએનએનએ લખ્યું છે કે ભારતે તેનું ચંદ્રયાન-3 ચંદ્ર પર ઉતાર્યું છે અને આ સિદ્ધિ મેળવનાર ચોથો દેશ બની ગયો છે. બ્રિટનના અખબાર ધ ગાર્ડિયને લખ્યું છે કે એક ઐતિહાસિક ક્ષણ, ભારત ચંદ્રના દક્ષિણ ધ્રુવની નજીક તેનું અવકાશયાન સફળતાપૂર્વક લેન્ડ કરનાર પ્રથમ દેશ બન્યો છે. આ સફળતા પર ભારતમાં ખુશીનો માહોલ છે.
