Jabalpur MBA Student Shooting: મધ્યપ્રદેશના જબલપુરમાં MBAની 26 વર્ષની વિદ્યાર્થિની વેદિકા ઠાકુર આખરે 10 દિવસ પછી જીવનની લડાઈ હારી ગઈ. 16 જૂને બીજેપી નેતા પ્રિયાંશ વિશ્વકર્માએ તેની ઓફિસમાં વેદિકાને ગોળી મારી હતી, ત્યારબાદ સારવાર દરમિયાન હોસ્પિટલમાં તેનું મોત થયું છે. મળતી માહિતી મુજબ જ્યારે વેદિકાને ગોળી મારવામાં આવી ત્યારે તેની મિત્ર પાયલ પણ તેની સાથે હતી જે ઘટના બાદથી ગુમ છે. વેદિકા ઠાકુરના કાકા અશોક ઠાકુરે જણાવ્યું કે 16 જૂને વેદિકા તેની મિત્ર પાયલ સાથે બીજેપી નેતા પ્રિયાંશ વિશ્વકર્માને મળવા તેની ઓફિસ ગઈ હતી.
12.30 થી 1 વાગ્યાની વચ્ચે મારી ભત્રીજી વેદિકાને ગોળી વાગી, ત્યારપછી પાયલ ગુમ થઈ ગઈ. તે ક્યાં છે તે પોલીસે હજુ સુધી જણાવ્યું નથી. તેમણે કહ્યું, મારી ભત્રીજીને પ્રિયાંશ વિશ્વકર્માએ ગોળી મારી હતી અને તે પછી તે જગ્યાએ જગ્યાએ ભટકતી હતી. આ પછી સાંજે 6 વાગ્યે હોસ્પિટલમાં મૂકીને આરોપી ભાગી ગયો. વેદિકાના કાકાએ કહ્યું કે લોકો સત્ય જાણે છે. તેના (પ્રિયાંશનું) પોસ્ટર શહેરના ધારાસભ્યો સાથે રાજ્યના મુખ્યમંત્રીની સાથે પ્રદર્શિત કરવામાં આવ્યું છે. હવે ભાજપનું કહેવું છે કે તે પાર્ટીનો સભ્ય નથી. જનપ્રતિનિધિઓ આવું બોલે તે મોટી વિડંબનાની વાત છે. વેદિકાને ગોળી મારવાના આરોપમાં પોલીસે 19મી જૂને પ્રિયાંશ વિશ્વકર્માની ધરપકડ કરી હતી.
આ હત્યા કેસમાં તપાસ દરમિયાન જાણવા મળ્યું કે વેદિકાને તેની ઓફિસમાં ગોળી માર્યા બાદ પ્રિયાંશ તેની સાથે 7 કલાક સુધી તેની કારમાં ફરતો રહ્યો અને બાદમાં તેને તેના પરિચિતની હોસ્પિટલમાં મૂકીને તે ભાગી ગયો. આ દરમિયાન સ્થળ પર પુરાવાનો નાશ કરવાનો પ્રયાસ પણ કરવામાં આવ્યો હતો. આરોપી પ્રિયાંશે પોતાની પાસે રહેલા સીસીટીવી કેમેરાનું ડીવીઆર તો લઈ લીધું જ પરંતુ જે પિસ્તોલમાંથી ગોળી ચલાવવામાં આવી હતી તે પિસ્તોલ લઈને પણ ફરાર થઈ ગયો હતો. વેદિકાના મૃત્યુ બાદ ડોક્ટરે પોસ્ટમોર્ટમ કરાવ્યા બાદ તેના શરીરમાંથી ગોળી કાઢી હતી.
જે પોલીસ દ્વારા જપ્ત કરવામાં આવી છે. પોલીસે તે બુલેટ FSL ટીમને તપાસ માટે મોકલી આપી છે. બેલેસ્ટિક એક્સપર્ટ દ્વારા પુષ્ટિ કરવામાં આવશે કે વેદિકાના પેટમાં જે ગોળી મળી તે પ્રિયાંશ પાસે જે પિસ્તોલ હતી તેની જ છે કે નહિ. પોલીસે આ મામલે ઝીણવટભરી તપાસ હાથ ધરી છે. આ સમગ્ર ગોળીબાર પાછળનું સાચું કારણ હજુ સ્પષ્ટ થયું નથી. વેદિકાને તેની ઓફિસમાં ગોળી મારનાર કથિત બીજેપી નેતા પ્રિયાંશ વ્યવસાયે બિલ્ડર છે. વેદિકાના મૃત્યુ બાદ પ્રિયાંશ વિશ્વકર્માની ઓફિસમાં સીસીટીવી અને ડીવીઆર બંધ હોવાનો પણ ખુલાસો થયો છે. હવે પોલીસની છેલ્લી આશા સર્વર કંપની પાસેથી છે.
જબલપુર પોલીસે સીસીટીવી સાથે જોડાયેલ સર્વર કંપનીને પત્ર લખ્યો છે. આ સમગ્ર મામલે પ્રિયાંશ વિશ્વકર્મા જેલમાં છે અને હવે તેની મુસીબતો વધવાની ખાતરી છે કારણ કે હવે તેની સામે હત્યાનો કેસ પણ નોંધવામાં આવ્યો છે.પોસ્ટ મોર્ટમ બાદ વેદિકાના મૃતદેહને નેતાજી સુભાષ ચંદ્ર બોઝ મેડિકલ કોલેજ હોસ્પિટલમાંથી લઈ જવામાં આવ્યો હતો. ઈન્કમટેક્સ ચોકના ઘર તરફ મૃતદેહ લઈ ગયેલો જોઈને વેદિકાની માતા અને બહેન રડવા લાગ્યા. વેદિકાના પરિવારે જણાવ્યું કે તેમની પુત્રી વાંચન અને લેખનમાં ખૂબ જ હોંશિયાર હતી.વેદિકા ઠાકુર જબલપુરના ખૂબ જ સામાન્ય પરિવારમાંથી હતી.
તેમના પરિવારમાં એક ભાઈ અને બે બહેનો છે. વેદિકાના પિતાનું અવસાન થઈ ચૂક્યું છે જ્યારે તેની માતા ગૃહિણી છે.વેદિકાના પિતા એપેક્સ બેંકમાં ગાર્ડ તરીકે નોકરી કરતા હતા. પોલીસના જણાવ્યા અનુસાર ઘટના બાદ પ્રિયાંશ વિશ્વકર્માએ ઓફિસમાં લાગેલા સીસીટીવી અને ડીવીઆરની હાર્ડ ડિસ્ક બહાર કાઢી હતી અને તાળુ મારી દીધુ હતુ. ઘટનાની જાણ થતા પોલીસે ઓફિસના તાળા તોડી તલાશી લીધી અને આ પછી ઓફિસને સીલ કરી દેવામાં આવી. વેદિકા ઠાકુર પર થયેલા ગોળીબારને લઈને બીજેપી નેતા પ્રિયાંશ વિશ્વકર્માએ કહ્યું કે તેની પિસ્તોલ ખામીયુક્ત હતી અને તેમાં માત્ર એક જ ગોળી હતી,
પિસ્તોલની સ્પ્રિંગ ખેંચવાને કારણે ફાયરિંગ થયું હતું અને ગોળી વેદિકાને વાગી હતી. પોલીસે પ્રિયાંશ વિશ્વકર્માના આ નિવેદનને સરળતાથી સ્વીકારી લીધું હતું. પોલીસે પ્રિયાંશને પૂછ્યું ન હતું કે તેને લાયસન્સ વિના પિસ્તોલ ક્યાંથી મળી, અને તે દિવસે શું થયું કે પ્રિયાંશે વેદિકાની સામે પિસ્તોલ કાઢી, પોલીસે તેને પૂછ્યું પણ નહીં કે જ્યારે તે નિર્દોષ હતો ત્યારે તેણે વેદિકાને શા માટે હોસ્પિટલ છોડી અને ભાગી ગયો. પ્રિયાંશની ઓફિસમાં લાગેલા સીસીટીવી કેમેરામાં એ રહસ્ય છે જે જણાવશે કે વેદિકાને કેવી રીતે ગોળી મારવામાં આવી હતી. ઘટના બાદ પ્રિયાંશ ફરાર થઇ ગયો હતો પણ તે 19 જૂને જબલપુર આવ્યો હતો અને તેણે ધનવંતરી નગર પોલીસ ચોકીમાં આત્મસમર્પણ કર્યું.
આ દરમિયાન પ્રિયાંશની સાથે તેના ડઝનબંધ સમર્થકો પણ હાજર હતા. વેદિકા ગોળીની ઘટનાને લઈને હોસ્પિટલ મેનેજમેન્ટ પણ સકંજામાં જોવા મળી રહ્યું છે. પ્રિયાંશ ઘાયલ વેદિકા સાથે લગભગ 6 કલાક સુધી શહેરની અલગ-અલગ હોસ્પિટલમાં રખડતો રહ્યો. પહેલા પ્રિયાંશ વેદિકાને બાયપાસ હોસ્પિટલમાં લઈ ગયો જ્યાં તેણે તેનું ECG કરાવ્યું અને પાટો બાંધ્યો, પછી તે વેદિકાને ITI પાસેની હોસ્પિટલમાં લઈ ગયો, પરંતુ ત્યાં પણ તેની હાલતમાં કોઈ સુધારો ન થતાં તે તેને મેટ્રો હોસ્પિટલ લઈ ગયો. કહેવામાં આવી રહ્યું છે કે મેટ્રો હોસ્પિટલ મેનેજમેન્ટે પણ પોલીસને માહિતી આપવામાં વિલંબ કર્યો.
