ગર્લફ્રેન્ડને ક્રૂરતાપૂર્વક માર મારી તેનું મોત નિપજાવવાના કેસમાં યુકેની એક કોર્ટે ગુજરાતી મૂળના એક વ્યક્તિને આજીવન કેદની સજા ફટકારી છે. ગયા સપ્તાહે હાથ ધરાયેલી અદાલતી કાર્યવાહીમાં બ્રિટનના લેઈસેસ્ટરમાં રહેતા 50 વર્ષીય રાજ સિદપરા નામના વ્યક્તિને ગર્લફ્રેન્ડની હત્યા કરવાના કેસમાં દોષી ઠેરવવામાં આવ્યો હતો. અદાલતે જાહેર કર્યું કે સિદપરા અનેક ગુનાહીત ઇતિહાસ ધરાવે છે, જેમાં 46 ગુનાઓ માટે અગાઉના 24 સજાઓનો સમાવેશ થાય છે, જેમાંથી કેટલાક ભૂતપૂર્વ ભાગીદારો સામે ધમકીઓ અને ઉત્પીડન સામેલ છે.
બ્રિટિશ કોર્ટે ભારતીય મૂળના 50 વર્ષીય રાજ સિદપરાને તેની ગર્લફ્રેન્ડ તરનજીત રિયાઝ ઉર્ફે તરનજીત ચગ્ગરની હત્યા માટે આજીવન કેદની સજા ફટકારી છે. આરોપીએ ઈંગ્લેન્ડના ઈસ્ટ મિડલેન્ડ વિસ્તારમાં પોતાના ઘરમાં આ દુષ્કર્મ આચર્યું હતું, જોકે પોલીસે આ ઘટનાને ઘરેલું શોષણનો મામલો ગણાવ્યો હતો અને કહ્યું હતું કે પીડિતાને ન્યાય મળવો જરૂરી છે, જેથી આવી ઘટનાઓ અટકાવી શકાય.
જાણો શું છે સમગ્ર મામલો?
આ કેસમાં લેસ્ટરશાયર પોલીસનું કહેવું છે કે,. સિદપરાને ગયા શુક્રવારે આજીવન કેદની સજા સંભળાવવામાં આવી હતી, જેમાં પેરોલ મેળવતા પહેલા તેને ઓછામાં ઓછા 21 વર્ષ જેલમાં વિતાવવાની જોગવાઈ છે. બંને છેલ્લા પાંચ મહિનાથી રિલેશનશિપમાં હતા. આ વર્ષે 6 મેના રોજ તરનજીતની હત્યા કરવામાં આવી હતી. આરોપી સિદપરાએ 6 મેના રોજ તરબત રોડ પરના તેના ઘરે એમ્બ્યુલન્સ બોલાવી હતી, પરંતુ એમ્બ્યુલન્સ પહોંચે ત્યાં સુધીમાં તરનજીતના ચહેરા પર ગંભીર ઈજાઓ હતી અને ઘણી પાંસળીઓ તૂટી ગઈ હતી.
સુનાવણી દરમિયાન કોર્ટે નિર્ણયમાં શું કહ્યું?
પોલીસ પૂછપરછમાં સિદપરાએ હત્યાની કબૂલાત કરી હતી. આ દરમિયાન તેણે દાવો કર્યો હતો કે ઈજાઓ તેણે જ કરી હતી, પરંતુ તેનો રિયાઝને મારવાનો ઈરાદો નહોતો. જો કે, સતત અને ઘાતકી હુમલાના પુરાવા સાંભળ્યા બાદ કોર્ટે તેને હત્યા માટે દોષિત ઠેરવ્યો હતો. ન્યાયાધીશ વિલિયમ હાર્બેગે સિદપરાને સંબોધતા કહ્યું હતું કે “તે સ્પષ્ટ છે કે તમે તેના પર ક્રૂર અને નિર્દય રીતે હુમલો કર્યો હતો; તમે સતત હુમલામાં તેના પર મુક્કો માર્યો, લાત મારી અને થોભ્યા. કોર્ટે જાહેર કર્યું કે સિદપરા હિંસાનો ઈતિહાસ ધરાવે છે, જેમાં અગાઉના 46 ગુનાઓમાંથી કેટલાક ભૂતપૂર્વ ભાગીદારો સામે ધમકીઓ અને ઉત્પીડનથી સંબંધિત છે.
