Fact Check ખબર

“સરકાર GEBના બિલ પર માત્ર 10 હજાર રૂપિયામાં જ એસી આપશે” – જાણો સોશિયલ મીડિયામાં વાયરલ થયેલા આ મેસેજની હકીકત

આપણે બધા જ સોશિયલ મીડિયા પર ખૂબ જ એક્ટિવ છીએ, ત્યારે આપણે જોયા વિચાર્યા વિના જ કોઈ પણ મેસેજને આગળ વહેતો કરી દઈએ છીએ. જેના કારણે ક્યારેક કોઈક ફેક મેસેજ પણ ખૂબ જ વાયરલ થઇ જતો હોય છે. આવો જ એક મેસેજ હાલમાં ખૂબ જ વાયરલ થયો છે જેમાં દાવો કરવામાં આવી રહ્યો છે કે સરકાર GEBના બિલ પર માત્ર 10 હજાર રૂપિયામાં જ એસી આપશે.

Image Source

વાયરલ થયેલા આ મેસેજમાં લખેલું છે કે હાલ ગુજરાતમાં 10 હજાર રૂપિયામાં GEB દ્વારા 1.5 ટનનું એસીનું વેચાણ 17-7-2019થી બીલ ઉપર મળશે. સાથે જ કેટલીક તસવીરો પણ વાયરલ થઇ રહી છે. આ મેસેજમાં એવો દાવો કરવામાં આવી રહ્યો છે કે સરકાર દ્વારા GEBના બિલ પર માત્ર 10 હજાર રૂપિયામાં જ એસીનું વેચાણ કરવામાં આપશે. આ વાયરલ મેસેજને કારણે લોકો એસી મેળવવા માટેની માહિતી માટે વીજ કંપનીમાં તપાસ કરવા લાગ્યા.

Image Source

જો કે હકીકતમાં આવી કોઈ જ યોજના સરકાર દ્વારા બહાર પાડવામાં આવી નથી. પરંતુ વીજ કંપનીમાં એસી મેળવવા માટે લોકોનો ધસારો એટલો વધી ગયો હતો કે વીજ કંપનીએ કંટાળીને ખુલાસો કર્યો કે આવી કોઈ જ યોજના નથી, આ મેસેજ ખોટો છે.

Image Source

ગુજરાત ઊર્જા વિકાસ નિગમ લિમિટેડ (GUVNL)એ એક અખબારી યાદી બહાર પડી જેમાં સ્પષ્ટતા કરવામાં આવી કે રાજ્યની વીજ કંપનીઓમાં આવી કોઈ જ યોજના અમલમાં નથી આવી. આ અખબારી યાદીમાં જણાવવામાં આવ્યું છે કે “થોડા સમયથી સોશિયલ મીડિયામાં ’10 હજાર રૂપિયામાં GEB દ્વારા 1.5 ટનનું એસીનું વેચાણ 17-7-2019થી બીલ ઉપર મળશે’ એ શીર્ષકથી એક ખોટો મેસેજ વાયરલ થયેલો છે. આ અંગે GUVNL અને તેની સંલગ્ન વીજ કંપનીના ગ્રાહકોને જણાવવાનું કે વીજગ્રાહકોને ગેરમાર્ગે દોરવા માટે કોઈક ઈસમે આવો ખોટો મેસેજ વાયરલ કરેલ હોય તેમ જણાય છે.

Image source

આવી કોઈ જ યોજના વીજ કંપનીમાં અમલમાં નથી અને આવી કોઈ યોજના વીજ કંપની ખાતે વિચારણા હેઠળ નથી તેમજ GUVNL અને તેની સંલગ્ન વીજ કંપનીને વાયરલ થયેલા મેસેજ અંગે કોઈ જ લેવા દેવા નથી.” સાથે જ તેમને આવા વાયરલ થયેલા મેસેજથી ગેરમાર્ગે ન દોરવા માટે ગ્રાહકોને વિનંતી પણ કરી છે.