ફરી એકવાર ભાઈજાનને મળી જાનથી મારી નાખવાની ધમકી, પોલીસે તેના ઘરની બહાર વધારી સુરક્ષા, ગેંગસ્ટર ગોલ્ડી બ્રારે સિદ્ધુ મુસેવાલાની હત્યા કબૂલી અને કહ્યું હવે સલમાનની વારી, જુઓ બીજું શું કહ્યું ?
Salman Khan has received a death threat : પંજાબી ગાયક સિદ્ધુ મુસેવાલાની 29 મે 2022ના રોજ તેના ગામ મુસામાં ગોળી મારીને હત્યા કરવામાં આવી હતી. તેના મૃત્યુના લગભગ એક વર્ષ પછી, કેનેડિયન ગેંગસ્ટર ગોલ્ડી બ્રારે તેની હત્યા કરી હોવાની કબૂલાત કરી છે. અગાઉના અહેવાલોમાં કહેવામાં આવ્યું હતું કે લોરેન્સ બિશ્નોઈએ તેની હત્યા કરી હતી, પરંતુ સોમવારે એક ઈન્ટરવ્યુમાં ગોલ્ડી બ્રારે અંગત કારણોસર સિદ્ધુ મુસેવાલાની હત્યા કર્યાની કબૂલાત કરી હતી. તેણે એમ પણ કહ્યું કે તે બોલિવૂડ એક્ટર સલમાન ખાનને પણ ચોક્કસ મારી નાખશે.
અભિનેતા સલમાન ખાનને છેલ્લા ઘણા મહિનાઓથી ઉચ્ચ સુરક્ષામાં રહેવું પડી રહ્યું છે. કારણ કે મોસ્ટ વોન્ટેડ ગેંગસ્ટર ગોલ્ડી બ્રારથી તેનો જીવ જોખમમાં છે. કથિત રીતે હવે એક ટીવી ચેનલને આપેલા ઈન્ટરવ્યુ દરમિયાન ગોલ્ડી બ્રારે પોતાનો લોહિયાળ ઈરાદો જાહેર કર્યો છે. ગેંગસ્ટર ગોલ્ડી બ્રારે તાજેતરમાં પુષ્ટિ કરી છે કે અભિનેતા સલમાન ખાન ખરેખર તેના હિટ લિસ્ટમાં છે.
કેનેડિયન ગેંગસ્ટર ગોલ્ડી બ્રારે ઈન્ડિયા ટુડે સાથેની એક ઇન્ટરવ્યૂમાં જણાવ્યું હતું કે તે ચોક્કસ બોલિવૂડ અભિનેતા સલમાન ખાનને મારી નાખશે, જ્યાં સુધી તે 1998ના કાળિયાર કેસમાં બિશ્નોઈ લોકોની ભાવનાઓને ઠેસ પહોંચાડવા બદલ માફી નહીં માંગે. જણાવી દઈએ કે બિશ્નોઈ સમુદાય દ્વારા કાળા હરણને પવિત્ર માનવામાં આવે છે. ગોલ્ડી બ્રારે કહ્યું કે તેણે ગાયક સિદ્ધુ મુસેવાલાની હત્યા કરી છે અને તે ચોક્કસપણે સલમાન ખાનને પણ મારી નાખશે. મીડિયા રિપોર્ટ અનુસાર, ગોલ્ડી બ્રાર કેનેડા ભાગી ગયો છે. છેલ્લા કેટલાક મહિનામાં સલમાન ખાનને અનેક ધમકીભર્યા કોલ અને પત્રો મળ્યા બાદ આ નિવેદન આવ્યું છે, જે બાદ મુંબઈ પોલીસે સલમાનના ઘરની બહાર સુરક્ષા વધારી દીધી હતી.
સલમાન ખાનને મારી નાખવો એ તેના જીવનનું લક્ષ્ય હોવાનું જણાવતા ગોલ્ડીએ કહ્યું, “ભાઈ સાહબ (લોરેન્સ બિશ્નોઈ)એ કહ્યું હતું કે તે માફી નહીં માંગે. બાબા ત્યારે જ દયા બતાવશે જ્યારે તે દયા કરશે.” “જેમ કે અમે અગાઉ કહ્યું છે કે, તે ફક્ત સલમાન ખાન વિશે નથી. જ્યાં સુધી અમે જીવિત છીએ, અમે અમારા બધા દુશ્મનો સામે અમારા પ્રયાસો ચાલુ રાખીશું. સલમાન ખાન અમારું લક્ષ્ય છે, તેમાં કોઈ શંકા નથી. અમે પ્રયાસ કરીશું, અને ક્યારે અમે સફળ છીએ, તમને ખબર પડશે.”
ગોલ્ડી બ્રારે સ્વીકાર્યું કે તેણે સિદ્ધુ મુસેવાલાની હત્યા કરી હતી અને કહ્યું હતું કે તેને પાઠ ભણાવવો જોઈએ, કારણ કે તે ખૂબ જ ઘમંડી બની ગયો હતો. ગોલ્ડી બ્રારે કહ્યું, “સિદ્ધુ મુસેવાલા ઘમંડી વ્યક્તિ હતા. તેણે પોતાની રાજકીય અને પૈસાની શક્તિનો દુરુપયોગ કર્યો. તેને પાઠ ભણાવવાની જરૂર હતી અને તેને શીખવવામાં આવ્યું.” તમને જણાવી દઈએ કે ભૂતકાળમાં રેપર હની સિંહને પણ ગોલ્ડી પાસેથી એક વોઈસ નોટ મળી હતી જેમાં તેને જાનથી મારી નાખવાની ધમકી આપવામાં આવી હતી. હની તરત જ દિલ્હી પોલીસ હેડક્વાર્ટરમાં ફરિયાદ નોંધાવવા પહોંચી ગયો હતો. તેણે કહ્યું કે તેના મેનેજરે ગોલ્ડી પાસેથી વોઇસ નોટ મેળવી અને કહ્યું કે તે હવે ડરી ગયો છે.
